د طالبانو حکومت هرات کې د ښار په پارکونو کې د حیواناتو او مرغانو د مجسمو سرونه پرې کړل.
د سیمې اوسېدونکي وایي، چې طالبانو دا کار د شریعت خلاف بللی او بندیز یې لګولی، چې نور باید دا ډول کړنې ونه شي.
دا په داسې حال کې ده چې نږدې یوه میاشت وړاندې د طالبانو د امربالمعروف وزارت په قانون کې د ژوندیو شیانو عکسونه منع اعلان شول.
وروسته تر هغې چې جرمني، اسټرلیا، کاناډا او هالنډ د «ښځو پر وړاندې د هر ډول تبعیض د له منځه وړلو له کنوانسیون»څخه د سرغړونې په تړاو د طالبانو پر وړاندې جرمونو له کبله نړیوالې محکمې ته د عاریضې اعلامیه خپره کړه، تازه د ولسي جرګې غړې فوزیه کوفي په دې تړاو له رسمي شکایت ثبتولو هرکلی کړی.
مېرمن کوفي پر اېکسپاڼه لیکلي، دا کنوانسیون یوازینی نړیوال قانوني سند نه دی چې طالبانو تر پښو لاندې کړی.
کوفي زیاتوي، نړیوال سازمانونه باید په قانون کې د«جنسيتي تبعيض» د ثبت لپاره اقدامات وکړي؛ ترڅو بې دفاع خلک په نړیوال حقوقي سیسټم باور وکړي.
د امریکا د بهرنیو اړیکو کمېټې مشر د بایډن له حکومت غوښتي، چې افغانستان کې د بندي امریکایي وګړو د خلاصون لپاره هڅې زیاتې کړي.
مایکل مکال ویلي، ټرمپ باید طالبان قانع کړي چې محمود شاه حبیبي او نور امریکایي بندیان ازاد او دا باید ترې وپوښتي چې القاعده د هغه په نیولو کې کوم رول درلود.
تر دې وړاندې داسې راپورونه خپاره شوي وو، چې محمود شاه حبیبي القاعده ډلې ته سپارل شوی.
طالبان بیا وایي، چې د محمود شاه حبیبي په اړه هیڅ معلومات نه لري.
منځني ختیځ کې د جګړې له زیاتېدو سره پر یو وخت؛ متحده ایالاتو، فرانسې او څو نورو متحدونو یې د اسرائیل او حزب الله ترمنځ د ۲۱ ورځني اوربند غوښتنه کړې.
په دې اړه امریکا، فرانسې، استرالیا، متحده عربي اماراتو، سعودي عربستان او اروپایي ټولنې یوه ګډه اعلامیه خپره کړې او ویلي یې دي، چې دا اوربند به دواړو لورویو ته فرصت ورکړي چې جګړه د خبرو له لارې پای ته ورسوي.
دا غوښتنه په داسې مهال کېږي، چې اسرائیلو تېره ورځ هم پر لبنان حزب الله ډلې برید کړی، چې په پایله کې یې ۷۲ کسان وژل وي او ګڼ شمېر نور ټپیان دي.
زلمی خلیزاد وايي، د دوحې په هوکړه لیک کې د طالبانو له لوري د بشري حقونو د رعایت موضوع نه ده یاده شوې.
نوموړي تېره ورځ پرخپله ایکس پاڼه لیکلي، چې له افغانستانه د امریکایي ځواکونو د وتلو شرایطو، پر هغو د نه حملو او له افغانستانه د ترهګریزو ډلو د ګواښونو مخنیوي ته په کې اشاره شوې ده.
نوموړي زیاته کړې، چې طالبانو هغه مهال هوکړه کړې وه چې د یوه نوي حکومت د جوړېدو او د هغه حکومت د بشري حقونو پر تګلارو به د دوی، پخواني جمهوري حکومت او نورو افغانانو ترمنځ جلا خبرې کېږي.
د اسرائیلو دفاع وزارت ویلي چې د حزب الله د استخباراتي شبکې ۶۰ مرکزونه یې بمبار کړي دي.
د اسرائیلو د دفاع وزارت په وینا، دا کار په سمدستي او مستقیم ډول د حزب الله په وړتیا اغیزه کوي چې استخباراتي معلومات راټول، استخباراتي اقدامات همغږي او د جګړې ارزونه وکړي.
د سرچینې د معلوماتو له مخې، دا ځایونه تر ډېره د لبنان په مرکزي سیمه کې وو.
دا په داسې حال کې ده، چې په تېره یوه اوونۍ کې پر لبنان د حزب الله بریدونه تر بل هر وخت زیات شوي.
د ایران مذهبي مشر علي خامنهيي وايي، له حماس او حزب الله څخه ملاتړ واجب دی.
نوموړي نن له یو شمېر چارواکو سر ناسته کې ویلي، چې نړۍ غواړي د ایران پر وړاندې پلمې پیدا کړي او په خبره، یې چې بشري حقونه، اټومي انرژي او نورې ټولې بهانې یوازې غربي نړۍ د دوی د اسلامي نظام پر وړاندې کوي.
هغه ویلي، تر هغې به دا پلمې نه لرې کېږي، ترڅو دوی د هغوی خبرې ومني؛ خو زیاته کړې یې ده، چې ایران به هیڅ وخت چاته تسلیم نه شي.
پر لبنان د اسرائیل له بریدونو ډېرېدو سره پر یو وخت، حزب الله له ایران غوښتي چې پر اسراییل برید وکړي.
اکسیوس نشریې د دوو اسرائیلي چارواکو له قوله ویلي، چې ایران حزب الله ته ویلي چې اوس مهال پر اسرائیل د برید وخت نه دی.
دا په داسې حال کې ده، چې ایران د اسماعیل هنیه تر وژل کېدو وروسته د غچ اخیستې خبره کړې، خو تر اوسه یې پر اسرائیل کوم برید نه دی کړی.
د یادونې ده، چې له تېرو څو ورځو راهیسې د اسرائیلو په بریدونو کې په لبنان کې سلګونه کسان ووژل شول او زرګونه نور ټپیان شول.
د خوست د طالبانو حکومت د امنیه قومنداني ویاند مستغفر ګربز وایي، خوست کې د الخلیج سیاحتي شرکت رییس او دوه کارکونکي د جعل کارۍ په تور نیول شوي او اوس تر څار لاندې دي.
ګربز ویلي، چې دا کار وروسته تر هغه کېږي چې د کام ایر شرکت ته د اماراتو د حکومت له لوري د جعلي وېزې لرونکي شخص د لېږد په تړاو اخطاریه ورکړل شوه.
ګربز زیاته کړې، چې دوی په خپلو څېړنو کې له دغه شرکت او د شرکت د رییس له کور څخه ګڼ جعلي پاسپورټونه، د پاکستان وېزې او پاسپورټونه، پاکستان ته د تګ راتګ جعلي ټاپې او اروپا ته د قاچاق په موخه خلکو ته جوړ کړي جعلي پاسپورټونه ترلاسه کړي دي.
دا په داسې حال کې ده، چې تر دې پېښې یوه ورځ وړاندې هم د دې شرکت دوه نور کارکونکي د جعلي پاسپورتونو پو تور نیول شوي وو.
افغان لوبغاړي راشد کرکټ د نړیوالو یو ورځنیو لوبو په تازه درجه بندۍ کې دریم مقام خپل کړ.
نوموړي د یو ورځنیو لوبو په تازه درجه بندۍ کې د سویلي افریقا له کیشاف مهاراجا او د اسټرالیا د ادم زامپا څخه وروسته په دریم مقام کې راغلی دی.
راشد خان اوس مهال د افغان ملي لوبډلې د شل اوریزو سیالیو لوبډل مشري هم په غاړه لري.