د طالبانو حکومت مبلغ جنرال مبین له رسنیو هیله څرګنده کړې چې دی نور بحثونو ته ور ونه غواړي.
نوموړي لیکلي، له ده نه ضمانت اخیستل شوی او رسنۍ یې باید عذر ومني.
مبین ویلي، تر دې وروسته هم نه غواړي خپل وخت په داسې خبرو ضایع کړي چې د ده په باور ګټه نه لري.
نوموړي دغه راز ویلي، چې اوس له خپلو غواګانو سره بوخت دی او هیڅ وخت هم نه لري.
د پاکستان په کراچۍ ښار کې د یوه خره بیه زر ډالرو ته لوړه شوې.
د رپوټونو له مخې د خرو د بیو لوړوالی چین ته د دغو حیواناتو صادرېدل یاد شوي دي.
پاکستان د خرو له پلوه تر چین او ایتوپیا وروسته تر ټولو لوی صادرونکی هېواد دی.
څه موده وړاندې پاکستاني چارواکو ویلي وو، چې دوی به د اقتصادي ستونزو د حل په موخه پاکستان ته د خرو صادرات پیل کړي.
د شهید اوونۍ په مناسبت په یوې انلاین غونډه کې د جمهوري حکومت بېلابېلو چارواکو، د یو شمېر ګوندونو استازو د برهان الدین رباني مبارزه ستایلې.
په دغه ناسته کې عطامحمدنور، محمد محقق، صلاح الدین رباني، محمد اسماعیل، عبدالبصیر انور، حبیب الرحمن سیاف، جنرال دوستم، یونس قانوني او ګڼو نورو چارواکو برخه اخیستې وه.
دوی د صلاح الدین رباني د شخصیت او مبارزې ترڅنګ په افغانستان کې د روان وضعیت په اړه هم خبرې کړي دي.
ویناوالو ویلي، افغانستان کې اوسنی وضعیت د اندېښنې وړ دی او په خلکو ظلمونه روان دي.
په دغه غونډه کې د بلخ پخواني والي عطا محمد نور طالبان په افغانستان کې په تفرقې اچوولو تورن کړي دي.
بل لورته په غونډه کې جنرال دوستم د مقاومت جبهه تورنه کړې چې ټول افغانستان ته د یوې درې«پنجشېر» له سترګو ګوري.
یونس قانوني بیا ویلي، دوی اوس په یوې نوې تجربې کې دي او ټول باید په یو لوی او نوي فکر د یو روښانه افغانستان جوړلو لپاره کار وکړي.
هغه طالبان یوه وسله واله ډله بللې او زیاته کړې یې ده، چې دوی بېرته د ټولو لپاره ګواښ دی.
قانوني ویلي، افغانستان د دوی ټولو پر وړاندې پرانېستی دی او کولای شي، چې یوه جغرافیه یې ونیسي؛ خو ټینګار یې کړی، چې په راتلونکي باید فکر وشي.
اسوشټیډ پریس د خپلو باوري سرچینو په حواله خبر ورکړی، چې طالبانو نن په افغانستان کې د پولیو واکسین کمپاین ځنډولی.
سرچینې تر اوسه د دغه کار علت نه دی په ډاګه کړی.
تر اوسه د طالبانو حکومت په دې اړه څه نه دي ویلي.
دا په داسې حال کې ده چې یوازې سږکال په افغانستان کې د پولیو تر لسو زیاتې مثبتې پېښې ثبت شوې دي.
د طالبانو حکومت د بهرنیو چارو وزارت سرپرست امیر خان متقي وایي، د ټاپي له پروژې بشپړ ملاتړ کوي او هیله لري، چې دخیل هېوادونه هم ورنه په اساسي ډول ملاتړ وکړي.
امیرخان متقي کابل کې یوې غونډې ته ویلي، هیله لري چې دا پروژه په ټاکلي وخت سرته ورسیږي.
د متقي په خبره، دوی د وسله والې مبارزې وخت کې هم د دغې پروژې ملاتړ کړی او اوس یې هم ترکمن لوري ته بشپړ ډاډ ورکړی.
هغه دغه راز زیاته کړې چې افغانستان دغې نل لیکې ته تر ټولو زیاته خاوره ورکړې؛ خو کم ټرانزیټ یې اخلي.
نوموړي همدارنګه د خپلو خبرو پر دوام ویلي، چې له ګاونډیو هېوادونو د متقابل احترام په چوکاټ کې اړیکې غواړي او د عربي نړۍ سره اړیکو ته زیاته ترجیح ورکوي.
د کابل – ننګرهار پر لویه لار د سروبي ولسوالۍ په نغلو سیمه کې د ټرافیکي پېښې له کبله ۱۱ تنو ته مرګ ژوبله اوښتې.
پېښه د یو مسافر وړونکي او بار وړونکي موټر ترمنځ د ټکر له کبله رامنځته شوې چې په پایله کې یې پنځه تنه وژل شوي او ۶ نور ټپیان دي.
په وژل شویو کې یوه ښځه او یو ماشوم هم شامل دي.
د یادونې ده، چې په ټپیانو کې هم د یو شمېر کسانو وضیعت نازک ښودل شوی.
د انګولا پر وړاندې د افغانستان فوټسال ملي لوبډلې بریا ګڼو افغانانو ستایلې ده.
په کور دننه او بهر د ټولنیزو رسنیو کاروونکو، پخواني ولسمشر حامد کرزي، یو شمېر نورو پخوانیو چارواکو او د کرکټ یو شمېر لوبغاړو د دغې سیالۍ له کبله مبارکي ویلي او د افغان لوبډلې هڅه یې ستایلې ده.
افغان لوبډلې د فوټسال په نړۍوال جام کې تېره ورځ ناوخته انګولا ته شپږ پر څلور ماتې ورکړه او خپله لومړۍ لوبه یې وګټله.
د یادونې ده چې افغان لوبډله به راتلونکې چهارشنبه له ارجنټاین سره سیالي ولري.
افغانستان د فوټسال نړیوال جام په سي ګروپ کې دی، چې ارجنټاین او اوکراین لوبډلې هم ورسره دي.
سږنی نړیوال جام د تاشکند په کوربه توب د ۲۴ لوبډلو ترمنځ پیل شوی دی.
جهادي قومندان اسماعیل خان وايي، د طالبانو د مشر فرمانونه هم تر امین او ترکي کم نه دي.
هغه ویلي، دوی افغانستان په یو زندان بدل کړی او مونږ باید خپل خلک له دغه زندان څخه وباسو.
اسماعیل خان په دایکندي کې وروستۍ پېښې ته په اشارې ویلي، چې دوښمن په هیچا رحم نه کوي او اړتیا ده، چې اوس مونږ باید یو بل ومنو.
هغه پر یووالي ټینګار کړی او ویلي یې دي، چې د یوې نوې طرحې پر اساس باید افغانستان له دغه حالت څخه را و وېستل شي.
د مقاومت په نوم جبهې مشر احمد مسعود ویلي، نړۍ د طالبانو پر وړاندې د افغانستان د خلکو پرېکړې ته په تمه ده.
مسعود د شهید اوونۍ په نسبت جوړه شوې غونډه کې یو وار بیا په جګړه ټینګار کړی.
هغه ویلي، دوی د مذاکراتو لار پرانېستو لپاره له جګړې پرته بله لاره نه لري.
نوموړي دغه راز زیاته کړې چې د نړۍ او طالبانو اړیکې د تکتیکي ګټو پر اساس ولاړې دي.
د جمهوري حکومت ستر جنرال عبدالرشید دوستم ویلي، چې د مقاومت جبهې او جمعیت ګوند ټول ازبکان له پامه غورځولي او ټول افغانستان ته د خپلې درې له سترګو ګوري.
نوموړي د مقاومت شورا په یوې انلاین غونډه کې ویلي، چې افغانستان کې د پنجشېر مشرانو ته دوه ځله واک سپارل شوی او ټول قدرت هم له دوی سره و؛ خو پرته له دې چې کابل کې ځمکې ونیسي؛ نور یې هیڅ نه دي کړي.
هغه ویلي، دی خپله اتل دی او احمد شاه مسعود ته کومه اړتیا نه لري.
هغه د امرالله صالح له لوري د طالبانو حکومت پر وړاندې هزاره ګانو ته د جګړې وړاندیز هم نقد کړی او ویلي یې دي، چې یوازې پردي زامن په کې وژل کېږي.