د اسرائیلو لومړي وزیر ویلي، چې دوی په غزه کې د حماس د محاصرې په اړه فکر کوي.
هغه په دې اړه نور څه نه دي ویلي.
بل لورته رویټرز خبر ورکړی، چې دا پلان د پخوانیو پوځي قومندانانو له لوري جوړ شوی.
د پلان له مخې به لومړی له غزې څخه عام خلک اېستل کېږي او بیا به سیمه د پوځ له لوري کلابنده کوي.
تر اوسه حماس په دې اړه څه نه دي ویلي.
واشنګټن پوسټ په یوه راپور کې ویلي، چې پلازمېنه کابل کې دولتي کارکوونکي د ږيرې پرېښودو ته اړ ایستل شوي او اکثره سلمانۍ د ږيرې له کمولو ډډه کوي.
واشنګټن پوسټ دغه راز ویلي، چې ټیکسي چلوونکي له محرم پرته د ښځو د انتقال پر مهال پوښتل کېږي او یو شمېر کسان چې د جماعت لمانځه ته نه ځي، دروازې یې ورټکول کېږي.
د واشنګټن پوسټ په خبره، دا محدودیتونه پخوا هم و، خو په تېرو څو اوونیو کې پراخ او جدي شوي دي.
دا په داسې حال کې ده، چې د طالبانو حکومت د تېرې اګست میاشتې په وروستیو کې د امر بالمعروف لخوا نوی قانون توشیح کړ چې دا قانون په کور دننه او بهر له سختو غبرګونونو سره مخ شو.
له افغان خبریالانو د ملاتړ بنسټ وايي، طالبانو په افغانستان کې رسنیو کې په ژوندۍ بڼه سیاسي خپرونې بندې کړې دي.
یاد سازمان ویلي، چې طالبانو د افغانستان په دا خل کې رسنیو ته د شنونکو نوملړ ورسپارلی، چې تر هغې پرته بل شنونکی نشي راوستلای.
دغه سازمان د طالبانو پر دې کار نیوکه کړې او له رسنیو، د رسنیو ملاتړو بنسټونو، او بشري حقونو بنسټونو یې غوښتي چې د دغې پرېکړې پر وړاندې ودریږي.
دوی دا کار د بیان پر ازادۍ ښکاره تېری بللی دی.
د عوامي نشنل ګوند مشر ایمل ولي خان وایي، چې د یو پاکستاني په توګه وایم، چې له افغانستان سره د پښتونخوا یو ځای کول بېخي غلط کار دی او ددې کار اجازه به چاته ورنکړي.
ایمل ولي خان په دې وروستیو کې په یوه مرکه کې وایي، چې د دوی او د افغانستان د خلکو ژبه، فرهنګ او عنعنات یو ډول دي؛ خو دا په دې معنی نه ده چې دوی افغانستان سره ځان یو ځای کړي.
نوموړي ویلي، چې د “لر او بر یو افغان نعره” دوی ته له نیکونو پاتې ده او افغانستان د دوی د نیکونو وطن دی.
هغه ویلي، هیله لري چې یولسم د اکټوبر قومي جرګه کې د خپل ملک «پاکستان» پر خلاف په کې کوم څه نه وي.
دا په داسې حال کې ده، چې منظور پښتین د شهید ګیله من وزیر د مړینې پر مهال ویلي وو، چې راتلونکی یوولسم د اکټوبر به قومي عدالت جوړوي او دوی به ځینې مهمې پرېکړې اوروي.
د ملګرو ملتونو سرمنشي انتونيو ګوتریش د یاد سازمان د ۷۹مې سرمشریزې پرانیستغونډه کې ویلي، چې دا ناسته یې د نړیوالو بنسټونو د لا پیاوړتیا لپاره راغوښتې.
د هغه په وینا، غواړي د ژورو اصلاحاتو پام کې نیولو سره د دغه سازمان د منشور پر ارزښتونو ولاړ بنسټونه لا اغېزناک ثابت کړي.
د یادونې ده چې دغه ناسته نن پیل شوه، چې د طالبانو حکومت ته پکې د ګډون بلنه نه ده ورکړل شوې.
د یادونې ده، چې نن په قطر کې د طالبانو حکومت د سیاسي دفتر مشر سهیل شاهین د ملګرو ملتونو عمومي غونډه کې د خپل حکومت د نه ګډون په اړه نیوکه کړې وه او ویلي وو، چې د نړۍوالو دا کړنه یوازې اختلافاتو ته لمن وهل دي.
خیبر پښتونخوا کې د ۱۲ هېوادونو دیپلوماتانو پر موټریز کاروان ماین چاودنه شوې.
د خیبر پښتونخوا پولیس وایي، په پېښه کې یو پولیس وژل شوی او درې نور ټپیان دي.
د سرچینو د معلوماتو له مخې، په پېښه کې دیپلوماتانو ته کوم زیان نه دی اوښتی.
ویل کېږي چې د دیپلوماتانو په دغه کاروان کې د بوسنیا، روسیې، ویتنام، اتوپیا، رواندا، زیمبابوی، اندونیزیا، اوزبیکستان، ترکمنستان، قزاقستان، او پرتګال استازي شامل وو.
یاد دیپلوماتان صوات ته په سیاحت وتلي وو.
د افغانستان پرځیدلي جمهوریت کې د پخواني ولسمشر اشرف غني د لومړۍ دورې لومړی مرستیال مارشال عبدالرشید دوستم د نظام په سقوط کې په محمد اشرف غني سختې نیوکې کړي او هغه یې خاین یاد کړی دی.
ښاغلي دوستم د مقاومت په نوم د ملي شورا په یوې غونډه کې ویلي چې ولسمشر غني غوښتل د طالبانو ټول مخالفین لاس تړلي طالبانو ته تسلیم کړي او د دوی په سر یې معامله کړې.
مارشال دوستم دغه راز زیاته کړې، څو ځله یې ولسمشر غني ته ویلي وو، چې دی طالبانو ته ورپریږدي، ترڅو له هغوی سره جګړه وکړي او سولې ته یې په زوره مجبوره کړي، خو ولسمشر غني د نوموړي ددې طرحې مخالف وو.
نوموړي د طالبانو څخه د افغانستان د بیا ځلې نیولو خبرداری ورکړی او له ټولو سیاستوالو یې غوښتي، چې د راتلونکې لپاره متحد اوسي.
ایران کې په یو کان کې د چاودنې له کبله ۵۲ کسان ووژل شول، چې له کبله یې د دوشنبې او سې شنبې ورځ په دغه ولایت کې ماتم اعلان شو.
د جنوبي خراسان ولایت مسوولین وايي، دا ماتم یې د قربانیانو له کورنیو سره د غمشریکي په پار کړی دی.
د یادونې ده چې د ایران د جنوبي خراسان په طبس ولایت کې په یو کان کې د میتان ګاز چاودنه کړې چې له کبله یې ۵۲ کسان وژل شوي.
چارواکي وايي، ۲۴ کسان د ننه په کان کې بند پاتي، چې تر اوسه ورته لاسرسی نه لري.
د ایران ولسمشر بیا د یادې پېښې په اړه د څېړنو امر کړی.
د سټراټیژیکو څېړنو د نړیوال مرکز مشر ډاکټر هاتف مختار وایي، طالبان له ټيټيپي سره استخباراتي، سټراتیژیک او سیاسي تړون لري او د ټيټيپي مشر له ملا هبتالله سره بیعت کړی او همدا راز یې د طالبانو له پخوانیو مشرانو سره هم ورته بیعت کړی و.
هاتف مختار ویلي، چې طالبان ددې بیعت له امله مجبور دي چې د ټيټيپي ملاتړ وکړي او دویم دا دی چې تيټيپي د طالبانو منځ کې پراخ نفوذ لري.
مختار زیاته کړې، چې د دوی کلتور، ژبه او فکر یوشان دی او بل دا چې دوی په اوږد مهال کې غواړي خپل حکومت د ایران خامنه یي رژیم په څېر وساتي.
مختار دغه راز ویلي، طالبان اوس کوښښ کوي، چې خپل فکري نفوذ د افغانستان شمال ګاونډي پاکستان ته واړوي چې ددې کار لپاره ورته د ټيټيپي همکاري خورا مهمه ده؛ نو ځکه دواړه ډلې خپلو کې نه شلېدونکې اړیکې لري.
د طالبانو حکومت تر واک لاندې د کابل ښاروالۍ وایي، چې د ترافیکي وضعیت د ښه والي په موخه یې د پلازمېنې یو شمېر څلور لارې لیرې کړي دي.
دې ښاروالۍ که څه هم د عبدالعلي مزاري نوم نه دی اخیستی، خو ویلي یې دي چې د دې ادارې د ځانګړو اصولو له مخې تېره شپه د کابل د دشت برچي په سیمه کې یو پل ونړول شو.
یادې ښاروالۍ زیاته کړې، چې د کابل ښار د برکي څلورلارې، ترافيکي څلورلارې او د کارته مامورين څلورلارې په ګډون يو شمېر موانع له منځه وړل شوي او بیرته جوړ شوي دي.
یادې ښاروالۍ دا هم ویلي، چې د دشت برچي په څلورلارې کې د موټرو د ګڼې ګوڼې له امله به دغه څلورلارې هم له منځه يوړل شي او په سم ډول به بیا ورغول شي.
دا په داسې حال کې ده چې تېره شپه د عبدالعلي مزاري د څلور لارې له نړولو وروسته د طالبانو دغې کړنې سخت غبرګونونه را وپارول.