افغان کرېکټ ملي لوبډلې له بنګله دېش څخه د یو ورځنیو لوبو لړۍ وګټله.
دغه لوبې چې په متحده عربي اماراتو کې د افغانستان په کوربتوب پیل شوې وې، افغان لوبډلې د دغه درې یورځنیو لوبو څخه دوه وګټلې او سیریز یې په خپل نوم کړ.
ددغې ټاس بنګله دېش لوبډلې وګاټه او په ټاکل شویو ۵۰ اورونو کې یې افغان لوبډلې ته د ۲۴۵ منډو هدف وټاکه.
افغان لوبډلې دغه هدف د لوبې په ۴۹ اوور کې د پنځو لوبغاړو په سوځېدو سره پوره کړ.
په دغه لوبه کې رحمن الله ګربز سلیزه او عظمت الله عمرزي ۷۰ منډې وکړې.
جلال اباد ښار کې د سلطانزي مارکېټ یو شمېر دوکانداران وایي، د مارکېټ مالک له طالبانو سره په جوړ جاړي د ولایت مقام هغه پرېکړه نه مني، چې پر اساس یې دوی ته د دوکانونو کرایې کمې شوې دي.
دوی ویلي، دغه مالک غواړي چې فیصله د پیسو په زور تغییر او دوی ته کرایې لوړې کړي.
یادو دوکاندارانو د نوم نه ښودلو په شرط حماسه میډیا ته ویلي، د مارکېټ څښتن پر دوی برېښنا پرې کوي او په بېلابېل ډول یې ګواښي.
د دوی په خبره، یو ځل پرې د شرق او ملي سیمهییزو تلویزونونو راپور هم برابر کړ؛ خو د طالب چارواکو او د امنیه قومندان د ګواښ له کبله تر ننه نشر نشو.
یاد دوکانداران له مسؤلینو غواړي، چې غږ یې واوري او ستونزه یې په شفاف ډول حل کړي.
د طالبانو حکومت د پاکستان د دفاع وزیر څرګندونو ته په غبرګون کې ویلي، چې خپلې ستونزې په خپل کور کې دننه حل کړي.
د طالبانو حکومت مرستیال ویاند حمدالله فطرت ویلي، د دوی خاوره د هیچا پر ضد نه کارول کېږي او پاکستان باید بې اساسه څرګندونې ونه کړي.
فطرت زیاته کړې چې، پاکستان دې خپل مسوولیت زموږ په غاړه نه اچوي او خپلو داخلي مشکلاتو ته دې په کور دننه حل پيدا کړي.
دا په داسې حال کې ده چې پاکستان ویلي، د افغانستان له خاورې د پاکستان پر خاورې تجاوز کېږي.
د ساینس نړیوالې ورځې په مناسبت اروپایي ټولنې ویلي، چې دوی د افغان ښځینه او نارینه ساینسپوهانو له هڅو ملاتړ کوي.
یادې ټولنې په یو پیغام کې افغانستان کې د نجونو او هلکانو لپاره په مساوي ډول د زده کړو غوښتنه کړې.
په پیغام کې راغلي، چې د نجونو روزنه د یو خپلواک ملت لپاره د اقتصادي هوساینې او ځان بسیاینې سبب ګرځي.
د یادونې ده چې سږکال دا ورځ “ساینس د سولې او پرمختګ لپاره” تر عنوان لاندې نمانځل کېږي.
د هېواد پخواني ولسمشر حامد کرزي په کابل کې د جاپان له سفیر تاکایوشي کرومیا سره کتلي.
ښاغلي کرزي په دغه لیدنه کې د جاپان له مرستو مننه کړې او دغه هېواد یې د افغانانو لپاره اوږدمهاله دوست وباله.
کرزي له تاکایوشي څخه د پوهنې په برخه کې د همکاریو د دوام غوښتنه کړې.
نوموړي یو ځل بیا د هېواد د پرمختګ لپاره زده کړې او د تلپاتې سولې او ثبات لپاره یې ملي تفاهم اړین وباله.
د طالبانو حکومت د هند په ممبئ ښار کې د خپلې جنرال قونسلګرۍ لخوا د پاسپورټونو د وېش خبر ورکړی دی.
د طالبانو د بهرنیو چارو وزارت مرستیال ویاند حافظ ضیاء احمد ویلي، چې یاد وزارت د هندوستان په ممبۍ ښار کې د افغانستان جنرال قونسلګرۍ ته هدایت کړی، څو د پاسپورټونو د ویش پروسه د افغان مهاجرینو، محصلینو او سوداګرو د اړتیاوو د حل په موخه پیل کړي.
تر دې وړاندې هندي رسنیو خبر ورکړی و، چې د هند په ممبئ کې د طالب دیپلومات پر منلو غور کوي.
کرملین د ډونالډ ټرمپ او ولادیمیر پوتین ترمنځ د ټیلفوني خبرو په اړه خپاره شوي خبرونه بې اساسه وبلل.
دیمېتري پېسکوف د واشنګټن پوسټ هغه څرګندونې بې ځایه وبللې، چې ګواکې پوتین او ټرمپ خبرې کړې دي.
پېسکوف زیاته کړې چې تردې دمه له ټرمپ سره د پوتین د خبرو اترو په اړه هیڅ پلان نشته دی.
واشنګټن پوسټ تر دې وړاندې ویلي وو، چې ټرمپ له پوتین سره په خبرو کې له هغه غوښتي چې د اوکراین جګړه نوره شدیده نه کړي.
په اسټرالیا کې د افغانستان سفارت وايي، چې قونسلي چارې یې په عادي ډول روانې دي.
یاد سفارت د طالبانو هغه پرېکړه، چې په یو شمېر اروپايي هېوادونو او اسټرالیا کې یې د افغانستان قونسلۍ او سفارتونه بې اعتباره اعلان کړي وو، غندلې او ویلي یې دي، چې دا چاره د خلکو زورونه او د بشري او اساسي حقونو نقض دی.
دوی ویلي، د سفارتونو او قونسلیو بې اعتباره اعلانول د طالبانو له لوري د خلکو د ازارولو په معنی ده.
د طالبانو حکومت د کورنیو چارو وزارت وايي، چې ځواکونو یې په هرات کې یوه اندازه وسلې او مهمات نیولي دي.
د یاد وزارت ویاند عبدالمتین قانع ویلي، په نیول شوو وسلو او مهماتو کې کلاشینکوفونه، تومانچې، چره ییز ټوپکونه، ډول ډول مرمۍ، مهمات، دولتي انټنونه او یوه اندازه چاودیدونکي توکي شامل دي.
هغه د وسلو د نیولو څرنګوالي په اړه نور معلومات نه دي ورکړي.
د هند ګارډین ورځپاڼې ویلي، چې د دغه هېواد چارواکي د طالبانو حکومت پر هغې پرېکړې غور کوي، چې له مخې یې ممبي کې د طالبانو دیپلومات ومني.
سرچینې ویلي، د کابل له لوري اکرام الدین کامل ممبي کې د جنرل قونسل په توګه ور پېژندل شوی.
یادې رسنۍ ویلي، هند دا ګام د دواړو هېوادونو ترمنځ د اړیکو ښه والي په موخه کوي.