ملګرو ملتونو د لبنان د حزبالله پر اړوند یوه شرکت د اسراییلو بریدونه غندلي.
د ملګرو ملتونو د بشري حقونو د دفتر اعلامیه وایي، چې دغو بریدونو “بېلابېلې ښاري او د استوګنې سیمې” په نښه کړي او ملکي تاسیساتو ته یې ډېر زیان اړولی دی.
ویل کېږي، چې په دغو بریدونو کې القرض الحسن مالي ټولنې پورې تړلي تاسیسات په نښه شوي دي.
د یادونې ده چې دا مالي شرکت، چې په رسمي ډول د خیریه بنسټ په توګه ثبت شوی د ۱۹۸۰ کلونو راهیسې خپلو پېرودونکو ته د سرو زرو د ګروۍ په بدل کې له سود پرته پور ورکوي.
د امریکا د عامه مذهب څېړنې انسټیټیوټ (پي ار ار ای) وایي، چې په امریکا کې په هرو پنځو جمهوري غوښتونکو کې یو یې د ټرمپ واک ته رسېدل غواړي.
یاد انسټیټوټ د یوې تازه سروې له مخې ویلي، چې د متحده ایالاتو ۱۹ سلنه جمهوري غوښتونکو ویلي، چې که ډونالډ ټرمپ د ۲۰۲۴ په ټاکنو کې ماتې وخوري، نو هغه باید پایلې باطلې اعلان کړي.
ټاکل شوې، چې د امریکا ټاکنې د نومبر په پنځمه نېټه ترسره شي.
ددغه ټاکنو نوماندان ډونالډ ټرمپ او د جوبایډن مرستیاله کاملا هرېس دي.
د حال وش خبري اژانس وایي، ایران پلان لري د هغو ۱۳ افغان مهاجرینو جسدونه چې په تیرو څو ورځو کې د ایراني پوله ساتو ځواکونو له خوا په سراوان سیمه کې وژل شوي وو ښخ کړي.
یاد آژانس ویلي، د دغو مهاجرینو جسدونه په سراوان کې د رضایي روغتون هدیرې ته لیږدول شوي دي.
حال وش په خپله ایکسپاڼه لیکلي چې د ایران حکومت ښاروالۍ ته ویلي چې د دغو کډوالو جسدونه ښخ کړي.
په راپور کې راغلي چې د طالبانو حکومت هم هڅه کوي چې د ۱۳ تنو مهاجرینو جسدونه لاسته راوړي او افغانستان ته یې انتقال کړي.
تر اوسه طالبانو د دغو هڅو په اړه څه نه دي ویلي.
د یادونې ده چې تر دې وړاندې حال وش خبر ورکړی و چې د ایران په سراوان سیمه کې د ایراني پوله ساتو له لوري ۲۶۰ افغان کډوال ووژل شول.
د طالبانو حکومت د اوبو او انرژۍ وزارت د راتلونکو ۳ ورځو لپاره د هېواد د سیندیزو حوزو په ځینو ځایونو کې د تېزو بارانونو او اوبو د کچې د لوړوالي او د سېلابونو د راوتلو اټکل کړی دی.
یاد وزارت د یوې خبر پاڼې په خپرولو سره ویلي، چې د دغه ناڅاپي اورښتونو او سېلابونو د راوتلو ډېر اټکل د (پنج امو، شمال او کابل) سیندیزو حوزو کې شوی دی.
په دغه خبرپاڼه کې زیاته شوې، چې د سېلابونو او اوبو د کچې لوړوالی په ځانګړې توګه د (بدخشان، تخار، بغلان، بامیان، سمنګان، بلخ، سرپل، پنجشېر، غوربند، کونړ، لغمان، ننګرهار، کابل او لوګر) سيندونو پر لاره او ذکر شویو ځایونو په ځینې سېلبرونو کې شتون لري.
کندهار کې د طالبانو تر واک لاندې د کرنې ریاست وایي د دې ولایت بزګرانو سږ کال څه باندې ۶۱ کیلو ګرامه زعفران بهر ته صادر کړي.
د یاد رباست د کرنې ویاند محمد حنیف حقمل لویلي، چې یاده اندازه زعفران متحده عربي’ اماراتو، هند، کاناډا، جرمني او ازبکستان ته صادر شوي دي.
د یادونې ده چې په جنوبي ولایتونو کې د کوکنارو د کرکیلې تر بندېدو او د بزګرانو تر اندېښنو وروسته بزګرانو د زعفرانو کښت زیات کړی دی.
هېره دې نه وي چې د افغانستان زعفران په نړۍ کې مشهور دي او څو ځله یې “د ښه خوند” جایزه هم ترلاسه کړې ده.
د ازادۍ په نوم جبهه وايي، چې د دوی ډلې د طالبانو تر واک لاندې د کابل هوايي ډګر پوځي برخې په راکټي بریدونو سره په نښه کړې دي.
د ازادۍ جبهې په خپله ایکسپاڼه لیکلي چې تېره شپه د دوی کسانو د کابل پر هوايي ډګر په پوځي اهدافو له څو راکټونو ویشتلو وروسته له طالب سرتېرو سره نښته وکړه.
یادې جبهې ادعا کړې چې په دغه بريد کې طالبانو ته درنه مرګ ژوبله اوښتې ده.
د يادونې ده، چې تېره شپه د کابل پر هوايي ډګر څو راکټونه لګېدلي او د ډزو غږونه هم اورېدل شوي دي.
د طالبانو حکومت تر اوسه په دې اړه څه نه دي ویلي.
د ترکیې مخالف سیاستوال او مذهبي مشر فتح الله ګولن په ۱۹۴۱ کال ترکیه کې زیږېدلی او د ۸۳ کالو په عمر په امریکا کې ومړ.
نوموړی په ۱۹۹۹ کال امریکا ته ولاړ، هلته د پنسلوانیا ایالت د بوکونو په غرنۍ سیمه کې د ژوند تر پایه اوسیده.
ګولن کلونه، کلونه د سیاسي فعالیت څخه لیرې په اختیاري تبعید کې ژوند کاوه، او له رسنیو سره یې کمې مرکې کولې.
فتح الله ګولن د ترکېې د اوسني ولسمشر رجب طیب اردغان له نږدې ملګرو څخه وو، خو د نوموړي فعالیتونه دواړه ملګري یو له بل څخه لیرې کړل.
ولسمشر اردوغان له ۲۰۰۳ کال راهیسې د خپلې واکمنۍ په لومړیو کلونو کې د ګولن له ملاتړه برخمن و، خو له هغه وروسته یو د بل سره په سیاسي مخالفینو واوښتل.
ګولن د ”خدمت” په نامه یو بنسټ جوړ کړ، چې د خبري رسنیو، ژورنالیزم او په افریقايي او اسیايي هېوادونو کې د ښوونځیو جوړولو کې فعالیت کوي، دوی د ترکیې ټولنه او واکمنه اداره کې هم خپل نفوذ ډېر کړی دی.
د ترکیې حکومت پر ګولن تور لګوي چې د ناکامې کودتا تر شا یې لاس و او همدی یې اصلي طراح بللی وو، خو په خپله ګولن دا تورونه کړي وو او ویلې وو چې له کودتا سره هېڅ تړاو نه لري.
ټي ټي پي په لکي مروت کې د پاکستاني طالبانو د یوه غړي له وژنې وروسته په یوه اعلامیه کې اعلان وکړ چې د دوې موخه د پاکستان پوځ دی او د قامي لښکر په غړو برید نه کوي.
تحریک طالبان پاکستان وایي، چې زموږ هدف یوازې امنیتي ارګانونه او د هغوی معاونین دي.
دوی د خیبر پولیسو ته خبرداری ورکړی چې تاسو په دې جګړه کې دخالت مه کوئ.
ټيټيپي دغه راز په دې اعلامیه کې د خیبر پولیسو ته ویلي، چې تاسو زموږ اصلي هدف نه یئ او خپلو کسانو ته یې لارښوونه کړې چې تر هغې د خیبر پولیس مه په نښه کوئ، تر څو چې دوی زموږ او د پاکستاني ریاست ترمنځ خنډ نه وي جوړ شوي.
د اوکراین ولسمشر ولادیمیر زېلېنسکي وايي، د شمالي کوریا پر وړاندې باید سخت غبرګون وښودل شي.
زېلېنسکي ویلي، د نړۍ هېوادونه باید د کییف او مسکو ترمنځ جګړه کې د شمالي کوریا د لاسوهنې پر وړاندې سخت غبرګون وښيي.
رویټرز خبري اژانس وایي، چې زېلېنسکي تېره شپه د یوې ویډیو په خپرولو سره ویلي، چې شمالي کوریا نه یوازې دا چې روسیې ته وسلې لېږي، بلکې سرتېري هم ور لېږي.
نوموړی دا څرګندونې داسې مهال کوي چې تېره ورځ جنوبي کوریا ادعا کړې چې، شمالي کوریا، روسیې ته ځانګړي ځواکونه استولي او لا هم دغه چاره دوام لري.
د جنوبي کوریا د ملي استخباراتو ادارې، NIS په یوه بیان کې ويلي وو چې، د اکتوبر له ۸ تر ۱۳مې نېټې یې د شمالي کوریا د پوځ خوځښتونه څارلي او داسې تصویرونه یې اخیستي، چې ښيي د دې هېواد ځانګړي ځواکونه د روسیې په ټرانسپورټي کښتۍ کې د روسیې خاورې ته لېږدول کېږي.
طالبانو د سیاسي چارو شنونکی او د پوهنتون استاد جاوید مومند په وهلو ډبولو له کوره وړی.
د نوموړي کورنۍ تایید کړې چې درې ورځې وړاندې طالبانو جاوید مومند د کورنۍ غړو تر مخه ووهلو او بیا یې له ځان سره نامعلوم ځای ته یوړ.
ښاغلي مومند څو ورځې وړاندې د ایران لخوا په افغان کډوالو پر مرګوني برید توند غبرګون ښودلی وو او په طالبانو یې نیوکه کړې وه چې نوم یې رسنیو کې د سیاسي بحثونو له لیسته ویستلی دی.