د امریکا د ولسمشر جوبایډن مرستیاله کاملا هرېس وایي، په غزه کې د بې ګناه فلسطینیانو وژنه ورته د منلو نه ده.

کاملا هرېس ویلي،چې دوی د غزې د جګړې پای ته رسېدل غواړي.

مېرمن هرېس زیاتوي چې د همدې کړکېچونو د راکمولو لپاره د بهرنیو چارو وزیر انټوني بلېنکن یوځل بیا منځني ختیځ ته ځي او هلته به د ټولو لوریو له لوړ پوړو چارواکو سره وغږېږي.

انتوني بلېنکن داسې مهال منځني ختیځ ته په سفر ځي، چې د غزې روغتیا وزارت تازه ویلي، چې په غزه کې د اسراییلي پوځیانو د عملیاتو له پيله تراوسه څه باندې ۴۲ زره فلسطینیان وژل شوي دي.

د اسراییل پوځ ویلي چې د حزب‌الله ډلې له‌خوا شاوخوا ۱۶۰ مرمۍ په اسراییلو لګېدلي دي چې یوه لویه اورلګېدنه رامنځته شوې ده.

د راپورونو له مخې اور وژونکو پرون د دې لوی اور د مړه کولو هڅې کولې.

ددغه مرمیو او اور لګېدنې د مرګ‌ژوبلې په اړه معلومات نه دي ورکړل شوي.

دا په داسې حال کې ده چې تېره ورځ د اسراییل پوځ په بیروت کې ګڼ بریدونه وکړل، چې د حزب‌الله درې مهم مشران یې ووژل.

تېر جمهوري حکومت کې د پکتیا والي محمد‌حلیم‌فدایي وایي، چې طالبانو د منظور پښتین د سرو خولیو پر خلاف کمپاین ځکه پیل کړی دی چې پښتون تحفظ تحریک (PTM) د ولس سرونه ور خلاصوي.

ښاغلي فدایي په خپله ایکس‌پاڼه لیکلي، چې سرې خولۍ د سرخلاصو ملتپالو ځوانانو سمبول دی، چې د دوی د آزادۍ او حقونو لپاره مبارزه کوي.

نوموړي زیاته کړې چې طالبان هیڅکله نه غواړي چې د ولس سر خلاص وي او په خبره یې سرناخلاصې سرونه د طالبانو لپاره اسانه هدفونه وي.

هغه دغه راز ویلي:”برعکس، طالبان ځکه د ولس پرمخ ښوونځي تړلي، ترڅو همداسې سر ناخلاصې پاتې شي. د تعلیمي فرصتونو محدودول د دوی د کنټرول یوه ستراتیژي ده، چې د ځوانانو د فکر کولو او د خپل حقونو د غوښتنې مخه نیسي. کله چې خلک زده کړه ونه کړي، نو د دوی د پوهاوي غوښتنه کمزورېږي. دوی بیا وېده وي.“

فدایي همدا راز ویلي، چې منظور پښتین ولس وېښوي او کله چې ولس وېښ او پوهه شي، هغه بیا دوست او دوښمن پېژنې او بیا د خلکو شعار نه، شعور ته ګوري.

د طالبانو د حکومت ویاند ‏ذبیح الله مجاهد وایي، چې طالب سرتېرو د داعش ډلې يو ګروپ له منځه وړی دی.

ښاغلي مجاهد په خپله ایکس‌پاڼه لیکلي، چې نن یکشنبه د غور مرکز اړوند مارکو سيمه کې د داعش په یو پټنځای عمليات وشول، چې په نتيجه کې د دوی مشر او يو بل مهم کس ووژل شول.

هغه ویلي چې له دغه کسانو څخه يوه اندازه وسلې او مهمات هم نیول شوي دي.

مجاهد ویلي، چې دا ګروپ هم په بلوچستان کې د داعش له مرکزونو څخه مستقیما رهبري کیده.

نوموړي دغه راز زیاته کړې:”دا هغه ګروپ وو چې د تيرې ربيع الاول مياشتې په نهمه یې د غور په مرکز کې په ملکي اهل تشيع هيوادوالو بريد کړی وو او تر شلو پورې هيوادوالو ته یې تلفات اړولې وو.“

هغه همدا راز ویلي، چې دوی خپل ټول بريدونه په بلوچستان کې د داعش د خراسان څانګې د رهبرۍ په مستقيمه لارښوونه ترسره کول او په خبره یې د دوی يو شمير نور ملګري هم بلوچستان ته د تيښتې په حال کې په لاره نيول شوي دي.

د طالبانو د حکومت اړوند المرصاد رسنۍ وایي، چې په غور کې د داعش پر یوه مهم پټنځای طالبانو عملیات ترسره کړې دي.

المرصاد ویلي چې په دغه عملیاتو کې دوه تنه داعش چې یو یې ویل کیږي د بهرني هیواد اړوند دی، وژل شوي دي.

المرصاد د خپلو سرچینو له قوله ویلي، چې دا عملیات نن تر غرمې وروسته په نورکوه سیمه کې ترسره شوي، چې په نتیجه کې یې د عزیز او مرتضی په نوم دوه داعشيان وژل شوي دي.

المرصاد دغه راز ویلي چې مرتضی د یوه بهرني هیواد وګړی دی.

د طالبانو حکومت تر اوسه په دې اړه څه نه دي ویلي.

افغان خبریال بلال سروري د خپلو سرچینو له قوله خبر ورکوي چې د ننګرهار ترافیکو د جوازسیر مدیر او یو تن د جعلي لیسینسونو او جواز سیرونو د ورکړې په تور نیول شوي.

‏ښاغلي سروري په خپل ایکس پاڼې لیکلي چې د ننګرهار د ترافیکو مدیر عطا الرحمن درې میاشتې وړاندې د طالبانو استخباراتو ریاست له لوري نیول شوی وو، چې له نیول کیدو وروسته خوشې او بیرته دندې ته ستون شوی.

نوموړي ویلي، چې د دریو میاشتو په تیریدو د ترافیکو مدیریت مخې ته یو د فوتوکاپي دوکاندار د ترافیکو د جوازسیر د مدیر عطا الرحمن سره په ګډه د غلا په تور ونیول شول.

نزار قباني، “زما او د شعر کیسه”
ژباړونکې: نظیفه دفتاڼۍ
زه د شعر د تفسیر لپاره ځانګړې تیوري نه لرم. که مې داسې تیوري درلودای، شاعر به نه وای. کله چې موږ پام یو څه ته کوو، د کار ترسره کېدل ځنډیږي. لکه کله چې یو نڅاګر خپلو ګامونو ته وګوري، له نڅا پاتې کېږي. 
شعر یوه نڅا ده او د هغه په اړه خبرې کول، یعنې څنګه د ګامونو پام کول. زه په ښکاره وایم چې غواړم نڅا وکړم او هېڅ پروا نه لرم چې خپل ګامونه وشمېرمه، ځکه کله چې د هغه په اړه فکر کوم چې څه کوم، خپل توازن له لاسه ورکوم. شعر د کلمو سره نڅا ده. یوه نڅا چې د ټول بدن، ټول ارادي او غیر ارادي احساساتو، د ښکاره او پټو برخو، او ټولو ممکنو او ناممکنو هیلو سره ترسره کېږي. 
هغه کسان چې نثر لیکي، له کومې ستونزې سره نه مخ کېږي. دوی په طبیعي ډول قدم وهي او قلم په حساب‌شوی او منطقي توګه حرکت کوي. دوی په پیاده‌رو کې ګامونه اخلي، مګر شاعران یوه وحشي نڅا کوي.
زه شعر لیکم خو نه پوهېږم څنګه؟ لکه څنګه چې یو کب نه پوهېږي څنګه لامبي، یا یوه مرغۍ  نه پوهېږي څنګه الوزي. تر هغه وخته چې شعر په شاعر کې وي، لکه یو ځلاند نیزه داسې دی. دا ستونزمنه ده چې د نیزې ریښتیني اندازه او د هغې ژوروالی معلوم کړو، ځکه چې غوښه او نیزه سره یو شوي دي. د شاعر لپاره دا ستونزمنه ده چې په اړه یې غور وکړي چې په هغه څه کې دننه څه پېښېږي. دا کار داسې ستونزمن دی لکه څنګه چې یوه ګل هڅه وکړي خپل عطر بوی کړي، یا خوله هڅه وکړي ځانته مچکه ورکړي. له همدې امله زه د هغه زلزلې په اړه، چې زما د پوست لاندې جریان لري، هېڅ تیوري نه لرم چې له کوم ځای څخه راځي او چیرې ځي. زه دې زلزلې ته د تسلیمۍ او بې‌حسۍ په حالت کې مخامخ کېږم او له خپلې خاورې او کنډوالې څخه راپورته کېږم، خو نه پوهېږم چې څه پېښ شوي دي! 
شعر یوه ناڅاپي حمله ده چې زموږ په وجود کې لویه تشه رامنځته کوي، او له دې وړاندې چې موږ وکولای شو هغه ونیسو، هغه تښتي. 
دا زما لومړنۍ نظریه ده چې د شعر په اړه لرم او دا زما ځانګړې نظریه ده. د نورو تجربې کېدای شي له ما سره په بشپړه توګه توپیر ولري. له همدې امله وایم چې په شعر کې ځانګړې تیوري نشته. هر شاعر خپله ځانګړې تیوري لري. 

خو شعر چیرې ژوند کوي؟
هر کله مې چې هڅه کړې هغه تعقیب کړم ترڅو معلومه کړم چې چیرته اوسیږي، له ما څخه تښتیدلی دی. درې لسیزې کېږي چې زه هڅه کوم چې هغه په ناڅاپي توګه پیدا کړم، خو هر ځل هغه خپله د غیب کلاه په سر کړي او لکه یو پاک روح په هوا کې ورک شي. له دې ټولو کلونو وروسته مې وموندله چې شعر یوه افسانوي ځناور دی چې خلکو په خپلو سترګو نه دي لیدلي، خو د هغه نښې په ځمکه او په کتابونو کې لیدل شوې دي. هغه کسان چې په اړه یې څه لیکلي، پوهېدلي دی چې دوی یو افسانوي موجود تعقیبوي، چې کله هم نه نیول کېږي او نه بریالی کېږي. 
شاعر شعر وايي، خو هغه د شعر د کیمیا تر ټولو بد مفسر دی. هغه په خپلو کتابونو کې مري، خو د خپل شعري مرګ وضاحت نه شي ورکولی. که له شکسپیر وغواړو چې د هملټ د تخلیق څرنګوالی راته وښيي، هغه به ناکام شي. که له بتهوون څخه د نهمې، پنځمې یا درېیمې سمفوني د زېږېدو په اړه پوښتنه وکړو، یا که له روبنس، ماتیس، وان ګوګ یا ګویا د رنګونو او سیورو د ترکیب په اړه وپوښتو، دوی به حیران یو بل ته وګوري. په شعر کې ستونزه لا زیاته ده، ځکه شاعر حتی په هغه وخت کې هم چې شعر لیکي، نه شي کولای تاسو ته ووايي چې دا څنګه کوي، او کله چې کار پای ته رسوي، کېدای شي هغه هېر کړي چې څنګه یې شعر ویلی دی. 
دا مقدمه ممکن له حقیقت او خیال څخه ډېره لیرې وي، خو د شعر حقیقت چیرې دی؟ د هغه بڼه څه ده؟ او چیرته اوسیږي؟ دا څنګه ممکنه ده چې زه د شعر په اړه یوه علمي تفسیر ولرم، په داسې حال کې چې زه پخپله د هغه موضوع یم؟ یا څنګه زه کولای شم د خپل ټپ اندازه تاسو ته ووایم، په داسې حال کې چې زه خپله ټپ یم؟

د غزې روغتیا وزارت ویلي، چې د غزې په شمال کې د اسرائیلي پوځ په بریدونو کې ۸۷ تنه وژل شوي او تر ۴۰ ډېر نور ټپیان شوي دي.

رویټرز خبري اژانس په خپل راپور کې ویلي، چې دا برید تېره شپه د غزې په شمال کې د بیت لاهیا په سیمه کې شوی دی.

د اسرائیلو پوځ اعلان کړی چې د دې پېښې په اړه څېړنې کوي.

د راپورونو له مخې دا برید په وروستیو میاشتو کې په غزه کې تر ټولو زیات تلفات لري.

په ورته وخت کې د لبنان پر پلازمېنه بیروت کې د اسراییل هوايي او توغندويي بریدونو نن هم دوام وکړ.

د اسراییل پوځ اعلان کړی چې د یک‌شنبې په ورځ یې د لبنان په پلازمېنه بیروت کې د حزب‌الله د استخباراتو پر یوه مرکز او د وسلو د تولید په یوه تر ځمکې لاندې ورکشاپ برید کړی دی چې د حزب‌الله درې لوړ پوړي چارواکي یې وژلي.

د پښتون ژغورنې غورځنګ مشر منظور پښتین وایي، چې ‏د قامي جرګې نه وروسته په پي ټي ایم باندې د پاکستاني ریاست زور او ظلم تر حد زیات شوی او لا هم دوام لري.

منظور پښتین په خپله ایکس‌پاڼه لیکلي، چې ۱۰۰۰ نه زیات ملګري یې زندانونو کې دي او تر نن ورځې پورې د پښتنو نېونې کېږي.

هغه ویلي،:”د ظالمي ریاستي ادارو له خوا په زرګونو د تحریک ملګري د سخت دریځ ترهګر په لیسټ کې په شیډول فور کې ولیکل شول، دا لیسټ هره ورځ په زیاتیدو دی او د ټولو خلاف کاروائې روانې دي.“

نوموړي زیاته کړې، چې مونږ ان د جرګې له پیل کیدو هم وړاندې د هر څه په فکر کې وو او د دې خلاف تکړه عمل ته تیار وو؛ خو د جرګې شریک غږ وو چې تاسو لږ صبر وکړئ، زمونږ سره یو ځای لاړ شئ او د دې خلاف به مونږ ټول درسره یو.

ښاغلي پښتین هیله څرګنده کړې چې د تحریک سره د روان ظلم پر خلاف ټول په شریکه غږ او عمل وکړي.

پښتین دغه راز ویلي، چې د پاکستان ریاست هر څومره ظلم هم وکړي؛ خو بیا به هم د دوی د ظلم او جبر پر خلاف به د دوی مبارزه دوام لري.

د اسراییل پوځ په لبنان کې د حزب‌الله د استخباراتو پر یوه مرکز او په پلازمېنه بیروت کې د وسلو د تولید پر یوه ځمکني ورکشاپ برید کړی دی.

د اسراییل پوځ ویلي چې، د دوی جنګي الوتکو د حزب‌الله درې قوماندانان وژلي دي، چې په‌‌کې عباس سلیمه د دې ډلې د جنوبي قوماندانۍ یو جګپوړی غړی، رضا عباس عواضه د اړیکو ماهر، او احمد علي حسین چې د دې ډلې د ستراتیژیکو وسلو د پراختیا مسوول و، وژل شوي.

حزب‌الله تر اوسه په‌دې اړه څه نه‌دي ویلي.