د امریکا ولسمشر ډونالډ ټرمپ وایي، د روسیې له ولسمشر سره یې مثبتې خبرې درلودې؛ خو د اوکراین په اړه یې خبرې ښې نه وې.
نوموړي سپینې ماڼۍ کې دموکراتانو او جمهوري غوښتونکو ته د خبرو پر مهال ویلي، اوکراین د بریا هیڅ چانس نه لري؛ خو بیاهم سخت دریځي کوي.
نوموړی زیاتوي، دا جګړه وحشتناکه ده او امریکا به اوکراین ته اجازه ورنکړي.
ټرمپ یو وار بیا ټینګار کړی، چې که واک کې وی، نو دا جګړه به نه وه پیل شوې.
د طالبانو حکومت اقتصادي مرستیال ملا عبدالغني برادر د یو پلاوي په مشرۍ ازبېکستان ته روان شو.
له اقتصادي معاونیت څخه په خپره شوې خبرپاڼه کې راغلي، چې د دغه سفر موخه د دواړو هېوادونو ترمنځ د سیاسي، اقتصادي، سوداګریزو او ترانزیټي اړیکو پراختیا او په افغانستان کې په مختلفو سکټورونو کې د ازبکستاني پانګوالو د پانګونې جذب دی.
د یادونې ده چې دغه سفر کې د یو شمېر وزارتونو سرپرستان هم شامل دي.
د ایران د شمالي شرق نظامي قرارګاو مسؤل صادق نوري ویلي، چې له افغانستان سره د پولې تړلو لپاره یې سل کیلومتره د اړتیا وړ نور دېوال هم چمتو کړی.
هغه د شنبې په ورځ له دغه بهیر لیدنه کړې او زیاته کړې یې ده چې، اقلیمي شرایطو ته په کتو، د پولو د تړلو چارې په ښه شکل روانې دي.
د یادونې ده، چې ایران دا کار د انساني او نشهیي توکو قاچاق او د پولو امنیت د خوندیتوب لپاره ترسره کوي.
پنټاګون غواړي ۵۴۰۰ کارکوونکي له دندو ګوښه کړي.
رویټرز خبر ورکړی، چې دا کار د ټرمپ له لوري د کاري ځواک کمولو د طرحې لومړنی اقدام دی، چې راتلونکې اوونۍ به پیل شي.
ویل کېږي چې پنټاګون به خپل ۹۵۰ زره ملکي کارکوونکي له پنځه څخه تر ۸ سلنې پورې کم کړي.
د امریکا جمهوري غوښتونکي سناتور تیم بورچت یو وار بیا ټینګار کړی، چې وسله والو ډلو ته د پیسو د نه ورکړې قانون باید ژر تر ژره تصویب او د ولسمشر ډونالډ ټرمپ میز ته وړاندې شي.
هغه ویلي، چې په دې اړه به راتلونکې سه شنبه یوه ناسته هم را وبلل شي.
د دغه قانون له مخې به له افغانستان سره د امریکا مرستې بندې شي.
د یادونې ده چې د یاد قانون مسؤده د جوبایډن وخت کې د امریکا د استازو جرګې تصویب کړې وه.
د پاکستان د بهرنیو چارو وزیر اسحاق ډار وایي چې پاکستان د طالبانو له حکومت سره همکاریو ته ژمن دی.
هغه ټینګار کړی چې د طالبانو حکومت باید ډاډ ورکړي چې د افغانستان خاوره به د پاکستان پر ضد نه کارول کیږي.
اسحاق ډار ادعا کړې چې په افغانستان کې د امریکايي ځواکونو پاتې وسلې د پاکستاني طالبانو ټيټيپي لاس ته ورغلي دي.
هغه ویلي که درېیم هېوادونه په پاکستان کې مېشت افغان کډوال و نه مني، نو پاکستان به دغه کډوال بېرته افغانستان ته واستوي.
د طالبانو حکومت تر اوسه په دې اړه څه نه دي ویلي؛ خو تر دې وړاندې یې په ځلونو ویلي چې د افغانستان خاوره به د هېڅ هېواد پر ضد نه کارول کیږي او پوځي تجهیزات په خوندي ډول ساتل شوي دي.
د مقاومت په نوم جبهې د سیاسي کمېټې مشر عبدالله خنجاني وایي, چې افغانستان د طالبانو له واکمنۍ وروسته هم شته او تاریخ دا ثابته کړې ده.
هغه ادعا کړې چې طالبان به بېرته خپلو خوندي پناهځایونو ته ستانه شي، چیرې چې هغوی د تېرو دوو لسیزو په جریان کې پټ وه.
هغه زیاته کړې چې طالبان د افغانستان په ټولنه کې ځای نه دی موندلی او له نړیوالې انزوا سره مخ دي.
خنجاني ټینګار کړی چې د طالبانو د قدرت انحصار او تعصب د دې ډلې دننه هم اختلافات رامنځته کړي دي.
د امریکا د بهرنیو چارو وزیر مارکو روبیو ویلي، د القاعده او داعش ډلې خلاف طالبانو د امریکا خبره ځمکې ته نه ده غورځولې.
هغه ویلي، طالبانو تل په دې برخه کې له امریکا سره غوره همکاري کړې.
روبیو زیاته کړې، طالبان په ټول افغانستان واکمن نه دي؛ نو ځکه ځای ځای ترهګرې ډلې حضور لري.
د هېواد پخواني ولسمشر حامد کرزي له ملي سوداګر میرویس عزیزي سره کتلي.
حامد کرزي په دې لیدنه کې د میروس عزیزي لخوا په هیواد کې د سرطاني ناروغیو د معالجې د یو مجهز روغتون، د طب پوهنتون او مختلفو روزنیزو تأسیساتو د جوړولو قدردانی او مننه کړې او د تحصیلي او علمي بنسټونو جوړول یی د هیواد د آبادۍ او پرمختګ لپاره مهم او اساسي بللي.
حامد کرزي یو ځل بیا هیله څرګنده کړې چې د هیواد د نجونو لپاره د تعلیم دروازې خلاصې شي.
د طالبانو حکومت د کډوالو او بېرته راستنېدونکو چارو وزارت سرپرست مولوي عبدالکبیر وایي، د طالبانو نظام یوازې د مولایانو نه دی، بلکې دا د ټولو افغانانو ګډ نظام دی.
نوموړي له یوې دیني مدرسې څخه د زدکوونکو د فراغت یوې غونډې ته ویلي، چې مدرسې او ښوونځي د یو هدف لپاره دي.
هغه یو وار بیا د زده کړو پر پراختیا ټینګار کړی.