د طالبانو حکومت روغتیا وزارت ویلي، چې د پولیو واکسین بندېدو په اړه لاهم کوم رسمي مکتوب نه دی صادر شوی.
د یاد وزارا ویاند شرافت زمان پر خپله ایکس پاڼه په دې اړه د ګارډین خپور شوی راپور بې اساسه بللی دی.
هغه ویلي، چې دوی د پولیو واکسین له ټولو فني او قانوني اصولو سره سم پلي کړی، ترڅو اغېزناک تمام شي.
دا په داسې حال کې ده چې تر دې وړاندې ګارډین د پولیو واکسین د بندېدو خبر ورکړی وو.
ټاکل شوې چې افغان لوبډله به سبا په متحده عربي اماراتو کې له جنوبي افریقا سره د پنځوسو اوریزو سیالیو لړۍ پیل کړي.
کرکټ بورډ پر خپله فیسبوک پاڼه لیکلي، چې د دغو سیالیو لپاره یې لوبغاړو تېره شپه تمرینات ترسره کړي دي.
دا سیالۍ د افغانستان پر وخت ۴:۳۰ دقیقې پیلیږي.
تر دې وړاندې په کرکټ بورډ نیوکې وې، چې له نیوزیلنډ سره یې ټسټ لوبه په ښه ډول مدیریت نه شوی کړی.
د یادونې ده، چې افغانستان له جنوبي افریقا سره د لومړي ځل لپاره د یو ورځنیو سیالیو لړۍ ترسره کوي.
د ایران ولسمشر مسعود پزشکیان وايي، واک ته تر رسېدو وروسته یې روسیې ته هیڅ ډول وسلې نه دي ورکړي.
مسعود پزشکیان په خپلې وروستۍ مرکه کې ویلي، چې روسیې سره په دې برخه کې د مرستې په اړه اوس څه نشي ویلي؛ خو تر واکمنۍ وروسته یې وسلې نه دي ورکړي.
هغه دغه راز د بالستیک توغندیو د پروګرام په اړه د تهران پر پخواني دریځ ټینګار کړی.
نوموړي ویلي، هېواد به یې له بندیزونو سره سره، له دغه پروګرام پر شا نه شي.
دی دا څرګندونې په داسې حال کې کوي، چې لویدیځ پر ایران تور پورې کوي چې د اوکراین په جګړه کې د روسیې نظامي ملاتړ کوي.
د طالبانو حکومت مشر ملاهبت الله اخندازده د قوش تېپې له کانال لیدنه کړې.
د بلخ ولایت رسنیو دفتر څخه په خپره شوې خبرپاڼه کې راغلي، چې نوموړي د قوش تېپې کانال د افغانستان په اقتصادي وده کې مهم بللی.
هغه ویلي، چې دا ډول ملي پروژې کولای شي، دوی نړیوالو ته له اړتیا خلاص کړي.
نوموړی په داسې حال کې له قوش تېپې کانال لیدنه کوي، چې څو ورځې وړاندې یې د افغانستان یو لړ ولایتونو ته سفرونه هم ترسره کړل.
د هند د بهرنیو چارو وزارت د ایران د مشر علي خامنهيي هغه څرګندونې بې اساسه وبللې، چې ګواکې په هند کې مسلمانان ځوریږي.
یاد وزارت ویلي، دوی چې په هند کې د اقلیتونو پر وړاندې د شته شرایطو په اړه نیوکه کوي؛ نو اول دې د خپل هېواد ریکارډ وګوري.
له یاد وزارت څخه په خپره شوې خبرپاڼه کې راغلي، چې دوی د خامنهيي څرګندونې په کلکو ټکو غندي او دا ډول څرګندونې ورته د منلو نه دي
.
د یادونې ده، چې علي خامنهيي ویلي وو، چې په غزې، میانمار، هند او یو شمېر نورو هېوادونو کې د مسلمانانو تکلیف ته په کتو، دوی ځانونه مسلمانان نشي ګڼلی.
پاکستاني پولیس وایي، چې خیبر پښتونخوا کې له ټي ټي پي سره د اړیکو په تور یې پنځه کسه نیولي دي.
د پولیسو مشر زاهدالله رسنیو ته ویلي، چې دوی د پابجي اپلیکشن له لارې له یو بل سره په اړیکه کې وو.
نوموړي ویلي، تر دې وړاندې وسله والو ډلو د وټساپ له لارې یو بل سره اړیکه ټینګوله؛ خو دا لومړی ځل دی، چې دوی له داسې پېښې سره مخ کېږي.
د یادونې ده چې پولیسو د یادو کسانو د هویت په اړه څه نه دي ویلي.
د افغانستان د ژغورنې لپاره د مقاومت شورا غړی او د پوهنتون استاد حبیب الرحمن سیاف د شهید اونۍ او د استاد برهان الدین رباني او د پخواني قوماندان احمدشاه مسعود په تلینغونډه کې د طالبانو پر وړاندې د ټولو سیاسي لوریو او جریانونو څخه وغوښتل چې خپل یووالی وساتي او د یو چتر لاندې سره راټول شي.
ښاغلي سیاف زیاته کړې، که چیرې نن او سبا د افغانستان د راتلونکې لپاره یوې موافقې ونه رسېږي؛ نو د دوی مبارزه به هیڅ ډول پایله ونه لري.
حبیب الرحمن سیاف یو ځل بیا په طالبانو غږ کړی، چې د کبر او غرور څخه ښکته شي او له خپلو خلکو سره دې خبرو ته کیني او بین الافغاني مذاکراتو ته دې چمتو شي.
نوموړي دغه راز ویلي، افغانستان د طالبانو تر واکمنۍ لاندې په یو زندان بدل شوی او هره ورځ زرګونه افغانان د یوې ښې راتلونکې لپاره وطن پریږدي او نامعلوم سفر پیلوي.
د طالبانو حکومت مبلغ جنرال مبین له رسنیو هیله څرګنده کړې چې دی نور بحثونو ته ور ونه غواړي.
نوموړي لیکلي، له ده نه ضمانت اخیستل شوی او رسنۍ یې باید عذر ومني.
مبین ویلي، تر دې وروسته هم نه غواړي خپل وخت په داسې خبرو ضایع کړي چې د ده په باور ګټه نه لري.
نوموړي دغه راز ویلي، چې اوس له خپلو غواګانو سره بوخت دی او هیڅ وخت هم نه لري.
د پاکستان په کراچۍ ښار کې د یوه خره بیه زر ډالرو ته لوړه شوې.
د رپوټونو له مخې د خرو د بیو لوړوالی چین ته د دغو حیواناتو صادرېدل یاد شوي دي.
پاکستان د خرو له پلوه تر چین او ایتوپیا وروسته تر ټولو لوی صادرونکی هېواد دی.
څه موده وړاندې پاکستاني چارواکو ویلي وو، چې دوی به د اقتصادي ستونزو د حل په موخه پاکستان ته د خرو صادرات پیل کړي.
د شهید اوونۍ په مناسبت په یوې انلاین غونډه کې د جمهوري حکومت بېلابېلو چارواکو، د یو شمېر ګوندونو استازو د برهان الدین رباني مبارزه ستایلې.
په دغه ناسته کې عطامحمدنور، محمد محقق، صلاح الدین رباني، محمد اسماعیل، عبدالبصیر انور، حبیب الرحمن سیاف، جنرال دوستم، یونس قانوني او ګڼو نورو چارواکو برخه اخیستې وه.
دوی د صلاح الدین رباني د شخصیت او مبارزې ترڅنګ په افغانستان کې د روان وضعیت په اړه هم خبرې کړي دي.
ویناوالو ویلي، افغانستان کې اوسنی وضعیت د اندېښنې وړ دی او په خلکو ظلمونه روان دي.
په دغه غونډه کې د بلخ پخواني والي عطا محمد نور طالبان په افغانستان کې په تفرقې اچوولو تورن کړي دي.
بل لورته په غونډه کې جنرال دوستم د مقاومت جبهه تورنه کړې چې ټول افغانستان ته د یوې درې«پنجشېر» له سترګو ګوري.
یونس قانوني بیا ویلي، دوی اوس په یوې نوې تجربې کې دي او ټول باید په یو لوی او نوي فکر د یو روښانه افغانستان جوړلو لپاره کار وکړي.
هغه طالبان یوه وسله واله ډله بللې او زیاته کړې یې ده، چې دوی بېرته د ټولو لپاره ګواښ دی.
قانوني ویلي، افغانستان د دوی ټولو پر وړاندې پرانېستی دی او کولای شي، چې یوه جغرافیه یې ونیسي؛ خو ټینګار یې کړی، چې په راتلونکي باید فکر وشي.