جهادي قومندان اسماعیل خان وايي، د طالبانو د مشر فرمانونه هم تر امین او ترکي کم نه دي.
هغه ویلي، دوی افغانستان په یو زندان بدل کړی او مونږ باید خپل خلک له دغه زندان څخه وباسو.
اسماعیل خان په دایکندي کې وروستۍ پېښې ته په اشارې ویلي، چې دوښمن په هیچا رحم نه کوي او اړتیا ده، چې اوس مونږ باید یو بل ومنو.
هغه پر یووالي ټینګار کړی او ویلي یې دي، چې د یوې نوې طرحې پر اساس باید افغانستان له دغه حالت څخه را و وېستل شي.
د مقاومت په نوم جبهې مشر احمد مسعود ویلي، نړۍ د طالبانو پر وړاندې د افغانستان د خلکو پرېکړې ته په تمه ده.
مسعود د شهید اوونۍ په نسبت جوړه شوې غونډه کې یو وار بیا په جګړه ټینګار کړی.
هغه ویلي، دوی د مذاکراتو لار پرانېستو لپاره له جګړې پرته بله لاره نه لري.
نوموړي دغه راز زیاته کړې چې د نړۍ او طالبانو اړیکې د تکتیکي ګټو پر اساس ولاړې دي.
د جمهوري حکومت ستر جنرال عبدالرشید دوستم ویلي، چې د مقاومت جبهې او جمعیت ګوند ټول ازبکان له پامه غورځولي او ټول افغانستان ته د خپلې درې له سترګو ګوري.
نوموړي د مقاومت شورا په یوې انلاین غونډه کې ویلي، چې افغانستان کې د پنجشېر مشرانو ته دوه ځله واک سپارل شوی او ټول قدرت هم له دوی سره و؛ خو پرته له دې چې کابل کې ځمکې ونیسي؛ نور یې هیڅ نه دي کړي.
هغه ویلي، دی خپله اتل دی او احمد شاه مسعود ته کومه اړتیا نه لري.
هغه د امرالله صالح له لوري د طالبانو حکومت پر وړاندې هزاره ګانو ته د جګړې وړاندیز هم نقد کړی او ویلي یې دي، چې یوازې پردي زامن په کې وژل کېږي.
افغان خبریال عبدالعزیز سخيزاده په پاکستان کې د نامعلومو کسانو له لوري ټپي شوی دی.
هغه پرخپله ایکس پاڼه لیکلي چې تېره شپه لس بجې خپل کورته نږدې پرې برید شوی.
نوموړي ویلي، د سر په برخه کې یې ټپ خوړلی دی.
هغه د وسله والو کسانو د هویت په اړه څه نه دي ویلي.
د یادونې ده چې تر دې وړاندې هم ګڼ افغان خبریالان په پاکستان کې له دا ډول بریدونو سره مخ شوي دي.
د سولې نوبل جایزې ګټوونکې ملاله یوسفزۍ وایي، طالبان باید د هغو جنایتونو ځوابونه ووایي، چې دوی یې مرتکب دي.
نوموړې یو ویډیویي پیغام کې ویلي، چې مونږ او متحدان مو مسلسل کار کوو، ترڅو طالبان دغه ځواب ته قانع کړو.
د یوسفزۍ په خبره، نړۍ د افغان ښځو غږ اوري او پرې خاموش نه ده.
هغې د افغان ښځو مبارزه الهام منونکې یاده کړې او د ښځو پر وړاندې د طالبانو پالیسي یې له عام ژوند څخه د مېرمنو څنډې ته کول بللي.
د امریکا ولسمشریزو ټاکنو ته د جمهوري غوښتونکي ګوند نوماند، ډونالډ ټرمپ په فلوریدا ایالت کې ګلف لوبه کوله چې څنګ ته یې ډزې شوې دي.
رویټرز راپور ورکړی، چې بریدګر کلاشینکوف ( AK-47) ډوله وسله پر ځای پرېښې او تښتېدلی.
د سرچینې د معلوماتو له مخې بریدګر وروسته بیا د امنیتي ځواکونو له لوري نیول شوی؛ خو د هویت په اړه یې څه نه دي ویل شوي.
تر دې وړاندې پر ټرمپ په یوه غونډه کې هم برید شوی وو.
د طالبانو حکومت د مشر په فرمان یو لړ ټاکنې ترسره شوې، چې له مخې یې د مالیې وزارت د عوایدو او ګمرکونو مرستیال عبدالقاهر ادریس د احصایې او معلوماتو ملي ادارې د رییس په توګه ټاکل شوی او د دغې ادارې رییس فقیر محمد زیار د طبي شورا د رییس په توګه ټاکل شوی.
د دغه فرمان پر اساس، د هلمند ولایت د اقتصاد رییس مولوي شریف د فراه ولایت امنیې قومندان په توګه ټاکل شوی.
دغه راز بیا د کندهار زون نظامي محکمې رییس مولوي غلام رسول احساني د فراه ولایت استنیاف محکمې د رییس په توګه ټاکل شوی دی.
الجزیرې یوه مقاله کې لیکلي، چې ډیرو طالب چارواکو خپلې کورنۍ له افغانستان څخه ایستلي دي.
مقاله کې د دغه کار علت د طالبانو له مشر د طالب چارواکو نارضایتي ښودل شوې.
راپور کې دغه راز راغلي چې طالب چارواکو ویلي، بهر کې یې ژوند خوندي او اولادونه یې زده کړې کوي.
دغې مقالې کې د قطر پوهنتون د دوکتورا نوماندې لکشمي ونګوپال لیکلي چې یاده مقاله له ګڼو پخوانیو او اوسنیو چارواکو سره د مرکو پر اساس جوړه شوې ده.
مقاله کې ویل شوي چې کندهار ټول واک او پرېکړې انحصار کړي او ځینې محافظه کار طالبان هم غږ نشي پورته کولای.
د بلوچستان په هرنایي ولسوالۍ کې د دوو ورونو په ګډون، پنځه افغانان وژل شوي دي.
یاد کسان په شهرګ سیمه کې د ډبرو سکرو په کان کې د زهرجنو ګازو خپرېدو له کبله وژل شوي دي.
د پاکستان چارواکو ویلي، چې په کان کې میتان ګاز خپور شوی وو، چې له کبله یې کارکوونکو خپل هوش له لاس ورکړی وو.
سیمهییزو چارواکو ویلي، چې د یادو کسانو جسدونه به افغانستان ته ولېږدوي.
د یادونې ده چې دغه کان ته شپږ کسان ور ننوتي وو، چې یو یې بې هوښه موندل شوی او پنځه نور مړه شوي دي.
د روسیې ملي امنیت شورا مرستیال دمیتري مدودوف خبرداری ورکړی، چې که اوکراین پر دوی د لویدیځ لرې واټن ویشتونکي توغندي استعمال کړي، نو دوی به دغه هېواد له خاورو سره یو ډول کړي.
نوموړی دا څرګندونې په داسې حال کې کوي، چې اوکراین له لویدیځ غوښتنه کوي، چې د روسیې پر خاوره د غرب د لرې واټن ویشتونکو توغندیو د کارونې اجازه ورکړي.
څو ورځې وړاندې امریکا او برېتانیا هم د اوکراین له لوري له دغو توغندیو څخه د ګټې اخیستنې په اړه خبرې کړې وې.