د سعودي عربستان وزیرانو شورا په یوه اعلامیه کې له نړیوالو غوښتي، چې اسرائیل د فلسطینیانو د وژلو او د مقدس ځایونو د بمبار په اړه ځواب ته حاضر کړي.
د سعودي د اطلاعاتو وزیر سلمان الدوسري ویلي چې د سعودي کابینه پر مسجد الاقصی بریدونه غندي او د بیت المقدس د قانوني او تاریخي وضعیت بدلون ردوي.
د اوکراین ولسمشر ولودیمیر زلینسکي وايي چې امریکا به د کییف ترڅنګ درېږي.
زلینسکي د نوي کال د مبارکۍ پیغام کې خپلو هېوادوالو ته ویلي، چې سوله به څوک د ډالۍ په توګه رانکړي.
هغه ویلي، د امریکا په مرسته به د روسیې ۳۴ میاشتني یرغل ته د پای ټکی کېږدي.
هغه ویلي ډاډه دی چې ډونالډ ټرمپ به د روسیې او اوکراین ترمنځ جګړې ته د پای ټکی ږدي.
نوموړي دغه راز زیاته کړې چې راتلونکي کال هره ورځ باید وجنګېږو، تر څو اوکراین پیاوړی شي او بریا ترلاسه کړي.
پاکستان کې د ۲۰۲۴ کال پر مهال د ناموسي قتلونو له کبله ۳۴۶ ښځې وژل شوې دي.
ډان ورځپاڼې ویلي، چې دا پېښې تر ډېره په سند او پنجاب ایالتونو کې ثبت شوې دي.
په وژل شویو ښځو کې ځینې یې د ټولنیزې رسنۍ”ټیکټاک” کارولو له کبله وژل شوي.
په ۲۰۲۳ کال کې بیا هلته د ناموسي وژنو شمېر ۴۹۰ ته رسېدلی وو.
د سوريې نوي حکومت د محسنه المحيثاوي په نوم يوه مېرمن د السويداء د ښاروالې په توګه ټاکلې.
دا ۵۴ کلنه مېرمن د السويداء ښار په لبينه کلي کې زېږېدلې او د دمشق پوهنتون له اقتصاد او سوداګرۍ پوهنځي څخه فارغه شوې ده.
یاد حکومت تر دې وړاندې هم یو شمېر ښځې پر بېلابېلو دندو ګمارلې دي.
د ملګرو ملتونو د بشري حقونو سازمان په یو راپور کې ویلي، چې اسرائیلي پوځیانو غزه کې روغتونونه نړولي او له نړیوالو قوانینو یې د سرغړونې جدي اندېښنې را پارولي دي.
راپور کې راغلي، چې د اسرائیلو بمباریو د فلسطیني وګړو روغتیایي وضعیت له سختو ننګونو سره مخ کړی دی.
دوی ویلي، دا ډول کړنې د بشري حقونو نقض دی.
د یادونې ده چې غزه کې په تېرو څو ورځو کې پنځه کسان د سختې یخني له کبله وژل شوي.
فایننشال ټایمز راپور ورکړی، چې د روسیې داسې محرم اسناد یې لیدلي، چې پر اساس یې روسیې له ۲۰۱۳ او ۲۰۱۴ کال راهیسې د بریدونو لپاره د جنوبي کوریا او جاپان ۱۶۰ اهداف مشخص کړي دي.
د سرچینې د معلوماتو پر اساس، دا اهداف اټومي بټۍ، زېربیناوې، سړکونه او کارخانې دي.
سرچینه وایي، پوتین غواړي ټوله اسیا په خپل کنټرول کې واخلي او له ناټو سره یې د مقابلې لپاره یو محور وګرځوي.
بل لورته مسکو تر اوسه په دې اړه څه نه دي ویلي.
فایننشال ټایمز راپور ورکړی، چې د روسیې داسې محرم اسناد یې لیدلي، چې پر اساس یې روسیې له ۲۰۱۳ او ۲۰۱۴ کال راهیسې د بریدونو لپاره د جنوبي کوریا او جاپان ۱۶۰ اهداف مشخص کړي دي.
د سرچینې د معلوماتو پر اساس، دا اهداف اټومي بټۍ، زېربیناوې، سړکونه او کارخانې دي.
سرچینه وایي، پوتین غواړي ټوله اسیا په خپل کنټرول کې واخلي او له ناټو سره یې د مقابلې لپاره یو محور وګرځوي.
بل لورته مسکو تر اوسه په دې اړه څه نه دي ویلي.
د ACAPS په نوم یو بنسټ وایي، طالبانو تېر کال د ښځو پر وړاندې ۱۶ فرمانونه صادر کړي، چې د ښځو ژوند یې محدود کړی دی.
د سرچینې د معلوماتو له مخې، دا فرمانونه او حکمونه اته یې په ملي او پاتې نور یې په ولایتي کچه دي.
په دغه کال کې له طبي انستیتوتونو د ښځو منع کول، د ښځو غږ ستر بلل، په غیر دولتي مؤسساتو کې د ښځو پر کار بندیز او ګڼ نور بندیزونه هغه څه وو، چې د ښځو ژوند یې لا سخت کړی.
بل لورته بیا د طالبانو حکومت وایي، د ښځو د جبري نکاح مخه یې نیولې او د میراث حقونه یې ورکړي دي.
په داسې حال کې چې طالبان امنیت خپله لاسته راوړنه ګڼي؛ خو په ۲۰۲۴ کال افغانستان کې بوږنونکې امنیتي پېښې رامنځته شوې.
د داعش ډلې له لوري د طالبانو د کډوالو او بېرته راستنېدونکو چارو د سرپرست وزیر خلیل الرحمن حقاني وژنه؛ د پاکستان له لوري دوه ځله پر افغان خاوره د جیټ الوتکو بریدونه؛ د ایران له لوري په سرحدي سیمو کې د افغانانو وېشتل، له طالبانو سره د ایران او پاکستاني پوځیانو نښتې او په کور دننه د مقاومت جبهې او داعش ډلې له لوري ګڼ نور بریدونه هغه څه وو، چې د طالبانو دغه داعیه یې هم وننګوله.
د کال په وروستۍ ورځ د طالبانو د اوبو او انرژۍ وزارت د سرپرست وزیر پر موټریز کاروان برید هم د یادونې وړ پېښه ده.
دغه راز په کابل کې د څارنوالۍ د کارکوونکو پر موټر برید؛ په کابل، هرات، بغلان او یو شمېر نورو ولایتونو کې پر جوماتونو کې چاودنې او د غور ـ دایکندي پر لار شعیهمذهبو وژل کېدل هغه پېښې وې، چې په امنیتي برخه کې په ۲۰۲۴ کال کې د یادونې وړ ده.
سره له دې، چې دغه ډول نورې هم ډېرې پېښې شوې؛ خو دا، چې په کور دننه د طالبانو حکومت رسنۍ سانسور ساتلې؛ نو ځکه یې تر ډېره خبرونه نه رسنیز کېږي.
د طالبانو حکومت د اوبو او انرژۍ وزارت د یاد وزارت د سرپرست وزیر پر موټریز کاروان د برید په اړه خپاره شوي خبرونه بې اساسه وبلل.
یاد وزارت پر خپله ایکسپاڼه لیکلي، چې دا د مغرضو او پردي پالو رسنیو راپورونه دي.
له دغه وزارت څخه په خپره شوې خبرپاڼه کې راغلي، چې عبداللطیف منصور د کابل شاه او عروس بند له پرانېستې وروسته، روغ رمټ بېرته راستون شوی او په دې اړه خپاره شوي خبرونه بې اساسه دي.
تر دې وړاندې د مقاومت جبهې ویلي وو، چې یاد برید دوی ترسره کړی، چې په پایله کې یې د عبداللطیف منصور ساتونکی وژل شوی او یو شمېر مهم طالب چارواکي ټپیان شوي دي.