د اوکراین ولسمشر ولادیمیر زیلنسکي وایي، ټرمپ پلان لري چې د اوکراین جګړه ژر پای ته ورسوي؛ خو د هغه پلان جزیات نه لري چې پر اساس یې دغه جګړه ژر پای ته رسېږي.
زیلنسکي ویلي، ټرمپ د جګړې چټک حل غواړي؛ خو دا په دې معنی نه دی، چې خامخا به دا جګړه ژر پای ته ورسیږي.
که څه هم دا نه ده معلومه چې ټرمپ به د اوکراین جګړې په اړه کوم نیت ولري؛ خو خپله لومړنۍ وینا کې یې ویلي، چې دی د جګړو غوښتونکی نه دی.
د امریکا نوي ولسمشر ډونالډټرمپ ویلي، چې سوزي وایلز به د سپینې ماڼۍ د کارکوونکو د مشرې په توګه وګوماري.
ډونالډ ټرمپ په یوه بیان کې ویلي، چې سوزي وایلز له ده سره مرسته وکړه چې، د امریکا په تاریخ کې تر ټولو ستر سیاسي بري ته ورسېږي.
د یادونې ده چې د امریکا په ټاکنو کې له بري وروسته سوزي وایلز د ټرمپ لومړۍ ګومارنه ده او هغه به لومړنۍ ښځه وي چې د سپینې ماڼۍ د کارکوونکو مشري کوي.
وایلز د ټرمپ د انتخاباتي کمپاین یوه له دوو مدیرانو څخه وه.
ایران یو وار بیا درې افغان کډوال اعدام کړي دي.
د ایران د بشري حقونو سازمان ویلي، دا افغانان د قزلحصار په کرج زندان کې اعدام شوي دي.
د سرچینې د معلوماتو له مخې، دا افغانان د قصدي وژلو په تور اعدام شوي دي.
د یادونې ده چې تېرو درې کالو کې ایران کې د افغانانو د اعدام پېښې زیاتې شوې دي او ګڼو سازمانونو له ایران غوښتي چې دا چاره ودروي.
د افغان سولې په چارو کې د امریکا ځانګړي استازي زلمي خلیلزاد په ناببره توګه د دوحې تړون د ټولو مواردو د تطبیق خبره پورته کړه.
ښاغلي خلیلزاد په ایکس پاڼې لیکلي د امریکا ولسمشرۍ ته د ولسمشر ټرمپ راتګ، په #افغانستان کې د دوحې د تړون د ټولو برخو د بشپړ تطبیق او عملي کولو فرصت دی.
له افغانستانه د ټولو بهرنیو ځواکونو بشپړه وتنه، د افغانانو تر منځ د خبرو اترو پیلېدل، په افغانستان کې تلپاتې اوربند، د امریکا او متحدینو پر وړاندې یې د افغانستان د خاورې نه کارېدل د دوحې هوکړې له مهمو برخو ګڼل کېږي.
د طالبانو حکومت د استخباراتو اړوند المرصاد د خپلو باوري سرچینو له قوله لیکلي، چې د هیواد په درېیو ولایتونو غور، کابل او کونړ کې طالب سرتېرو د داعش خلاف عملیاتو کې ۴ داعشیان وژلي او یو شمېر نور یې ژوندي نیولي دي.
المرصاد زیاته کړې، چې طالبانو په غور کې د داعش دوه غړي وژلي او یو یې ژوندی نېولی او په کابل کې په ترسره شویو عملیاتو کې د یوه بهرني وګړي په شمول (چې هویت یې تراوسه لا معلوم نه دی) دوه داعشیان وژل شوي او دوه نور ژوندي نیول شوي دي.
یادې سرچینې دغه راز ویلي، چې له دې عملیاتو سره هممهاله، په کونړ کې هم د داعش ډلې یو غړی وژل شوی دی.
المرصاد د امنیتي سرچینو له قوله ویلي چې په روان کال کې افغانستان کې ټولو تخریبي کړنو کې هغو کسانو لاس درلود چې په پاکستان کې یې روزنه لیدلې او له هماغه ځایه افغانستان ته را استول شوي دي.
د ډونالډ ټرمپ د بریا په اړه د طالبانو خپرې شوې اعلامیې ته په غبرګون کې د ملي مقاومت جبهې د دارالافتاء رییس حبیب الله حسام لیکلي، دین او دیانت د داسې تکفیري او قومي تعصب لرونکو ډلو لپاره یوازې یو وسیله ده، چې د امریکا د نیابتي پروژې او امنیتي بازو په توګه کار کوي.
ښاغلي حسام په خپله ایکسپاڼه لیکلي، دوی هر هغه څوک چې د دوی له فکر سره مخالف وي، کافر بولي او جهاد یې پر وړاندې اعلانوي.
د هغه په خبره د دوی د تېرې ۳۰ کلنې پالیسۍ بنسټ په همدې اصل ولاړ و؛ خو اوس دوی په خپله له خپلې پخوانۍ ادعا څخه په شا شوي او د هغو خلکو سره یې همکاري پیل کړې چې په تېر کې یې کافر ګڼل.
رویټرز خبري اژانس خبر ورکړی، چې د اوکراین په کورسک سیمه کې د شمالي کوریا او اوکرایني پوځیانو ترمنځ نښته شوې.
سرچینې په دې اړه نور جزیات نه دي ورکړي.
دا په داسې حال کې ده چې وړمه ورځ د اوکراین دفاع وزارت هم د روسیې په ملاتړ د شمالي کوریا له پوځیانو سره د نښتې خبر ورکړی وو.
د یادونې ده چې د اوکراین چارواکي ادعا کوي چې د شمالي کوریا ځواکونه د روسیې د ملاتړ لپاره د دوی له ځواکونو سره جنګېږي.
د پخواني ولسمشر لومړي مرستیال امرالله صالح د ټرمپ د بیا واکمني په اړه ویلي، چې د یو ۷۸ کلن کس انتخاب د هغه هېواد په ټاکنو کې، چې بهرنی سیاست یې له تناقضونو ډک دی، باید د لویو بدلونونو هیله په خلکو کې راونه پاروي.
د صالح په خبره، دا کس “ټرمپ” چې اوس بریالی شوی، حتا د ځینو هېوادونو او مشرانو نومونه هم په سمه توګه نشي ویلی او حتمي به داسې کسان خپل کاري ټیم کې وټاکي چې د نړۍ په اوسنیو بحرانونو کې لاس لري او د خپلو ګټو لپاره یې په دغه بحرانونو کې رول لوبولی وي.
صالح زیاتوي، زموږ په ذهن کې هیڅ څوک باید د پیغمبر مقام ته ونه رسوو، ځکه چې نبوت څوارلس پیړۍ وړاندې پای ته رسېدلی.
د طالبانو حکومت د اوبو او انرژۍ وزارت وایي، د کابل په شکر درې ولسوالۍ کې د “شاه و عروس” بند چارې بشپړېدو ته نږدې شوي دي.
یاد وزارت ویلي، چې دغه بند د کابل د ځمکې لاندې اوبو سرچینو پیاوړتیا او د سېلابونو کنټرول کې مهم رول لري.
ویل کېږي، چې ددې بند په بشپړېدو سره به نه یوازې دا چې هر کال ۳۰ میلیونه متر مکعب اوبه مدیریت شي؛ بلکې د کابل ښاریانو ته ۵ میلیونه متر مکعب د څښاک اوبه هم برابروي او د دې ترڅنګ د ۱.۲ میګاواټه برېښنا تولید ظرفیت هم لري.
اسټرالیا حکومت داسې قوانین وضع کوي، چې له مخې به یې تر ۱۶ کلونو کم عمره ماشومان له ټولنیزو رسنیو کارولو منع شي.
د اسټرلیا لومړي وزیر البانیسي ویلي، دا قانون به په راتلونکې اوونۍ کې د دې هېواد پارلمان ته وړاندې شي.
دا قانون د هغو زیانونو د مخنیوي لپاره وضع کېږي، چې د ټولنیزو رسنیو له کبله ماشومانو ته اوړي.
د یادونې ده چې د ټولنیزو رسنیو له کبله د نړۍ د ګڼو هېوادونو ماشومان له رواني او نورو ستونزو سره مخ دي.