ملګرو ملتونو ویلي چې د طالبانو د نوي فرمان په اړه اندېښمن دي.
د یاد سازمان د سرمنشي ویاند سټیفن دوجاریک ویلي چې دغه فرمان به، ژوند، زدکړو او روغتیایي خدمتونو ته د ښځو لاسرسی محدود کړي.
د هغه په خبره، له طبي انستیتوتونو د نجونو منع کول به د افغانستان پر روغتیایي سیستم ویجاړونوکی اغېز وکړي.
دا په داسې حال کې ده چې دوه ورځې وړاندې د طالبانو حکومت په طبي انستیتوتونو کې د نجونو پر زده کړو بندیز ولګوو.
د افغان سولې د مذاکراتي پلاوي مشر او د ملي دفاع پخواني وزیر محمد معصوم ستانکزي د طالبانو له لوري انستیتوتونو کې د نجونو پر زده کړو بندیز غندلی دی.
ښاغلي ستانکزي په خپله ایکسپاڼه لیکلي، چې نن ورځ د ملت برخلیک د یو مشخص شخص او کړۍ په ماهیت، تصمیم او خود غرضۍ پورې محدود دی، چې هېواد په هر ناروا عمل سره یو ګام د بربادۍ خوا ته نږدې کوي.
هغه ویلي، له لومړنیو بشري او روغتیايي خدمتونو څخه د خلکو بې برخې کول او د هېواد له نیمایي نفوس څخه د زده کړې او کار حق اخیستل به د طالبانو حاکمیت پای ته ورسوي.
د یادونې ده چې د طالبانو حکومت وروستۍ پرېکړې د ګڼو سیاسیونو او نړۍوالو بنسټونو غبرګونونه را پارولي دي.
تېر جمهوري حکومت کې د پکتیا والي حلیم فدایي د طالبانو له لوري کابل کې د ارزو تلویزون تړل او د دغه تلویزون د خبریالانو وړل د بیان پر ازادۍ او د خپلواکو رسنیو پر فعالیت سیستماتیک فشار بللی.
نوموړي لیکلي:”د رسنیو د بنسټونو خاموشه کول او د هغوی د کارکوونکو ډارول د بې اساسه تورونو له لارې نه یوازې دا چې له بنسټیزو بشري حقونو څخه سرغړونه کوي، بلکې د افغانستان اتباع هم بې پرې معلوماتو ته له لاسرسي څخه بې برخې کوي چې دا ډول استبدادي اقدامات د بیان پر ازادۍ او ولسواکۍ ښکاره برید دی.”
نوموړي دا کړنه غندلې او دا یې د بیان پر ازادۍ سخت ګوزار بللی.
د یادونې ده چې طالبانو نن د ارزو تلویزون دفتر تړلی او د دغه تلویزون شپږ کارکوونکي یې له امو او افغانستان انټرنشنال سره د همکارۍ په تور زندان ته وړي.
تېر جمهوري حکومت کې د ملي امنیت پخواني رییس رحمت الله نبیل د نجونو پر وړاندې د طبي انستیتیوتونو د تړلو په غبرګون کې لیکلي، چې دې ډلې یو وار بیا وښوده چې نه یوازې د زده کړو او پرمختګ دښمنان دي، بلکې له زمان او تاریخ سره په نه منونکي جنګ کې ښکېل دي.
د هغه په خبره، دا پرېکړه نه یوازې د افغانستان د ښځو او نجونو راتلونکی له منځه وړي، بلکې د دوی د ظالمانه واکمنۍ عمر هم را لنډوي.
نبیل زیاتوي طالبان په دې کړنو سره د خلکو د غوصې او ویښتیا تخم کري او لرې نه ده چې دا خلک به یوه ورځ دا تیاره د عدالت په رڼا بدله کړي.
د افغانستان د کرکټ ملي لوبډلې لوبغاړي محمد نبي پر نجونو د طبي زدکړو د بندېدو پرېکړه غندلې ده.
نوموړي پر خپله فیسبوکپاڼه لیکلي، چې طالبانو اول پر نجونو ښوونځي، بیا پوهنتونونه او دا دی اوس ترې وروستی فرصت چې د طب برخه کې نیمه لوړې زدکړي وې هم واخیستل شو.
نوموړی زیاتوي، چې دا پرېکړه به یوازې نجونو ته نه، بلکې د هېواد ټولو وګړو ته زیان ورسوي.
محمد نبي همداراز یاده پرېکړه نا عادلانه بللې او زیاته کړې یې ده، چې په عاجزانه توګه د طالبانو له حکومت غواړي تر څو د نجونو د زدکړو د بندوالي پر پرېکړې دې بیا غور وکړي.
د نجونو پر مخ د طبي انستیتونو د تړل کېدو پرېکړې په اړه د غبرګونونو په دوام، تازه د هېواد کرکټ ملي لوبډلې پیلیز توپ وهونکي رحمان الله ګربز هم خپل غبرګون ښودلی.
هغه د قرانکریم ایت او د پیغمبر “ص” هغه حدیث نشر کړی، چې په زدکړو ټینګار کوي.
تر ده د مخه راشد خان هم خپل غبرګون کې له طالبانو غوښتي وو چې پر دغې پرېکړې له سره کتنه وکړي.
د افغانستان کرکټ د ملي لوبډلې د شل اوریزو لوبو لوبډل مشر راشد خان د نجونو د طبي زدکړو پر بندېدو خواشیني ښودلې ده.
هغه پر خپله فیسبوک پاڼه لیکلي، چې رسنیو کې د نجونو د طبي زدکړو بندیز په اړه خپرو شویو وېډیوګانو سخت خواشینی کړی دی.
نوموړي په بېلابېلو برخو کې د نجونو زدکړې د هېواد په پرمختګ کې مهمې بللي او په خبره یې پر یادې پرېکړې باندې دې له سره کتنه وشي.
د طالبانو حکومت د مشر شیخ هبت الله اخندزاده او د کابینې ترمنځ یې ناسته روانه ده.
د طالبانو حکومت ویاند ذبیح الله مجاهد وايي، چې په دې ناسته کې د طالب وزیرانو ترڅنګ د حکومت سیاسي مرستیال مولوي عبدالکبیر هم شتون لري.
هغه د دغې ناستې د جزیاتو په اړه زیات معلومات نه دي ورکړي؛ خو زیاتوي چې په بېلابېلو موضوعاتو به خبرې وشي.
دا دوه ورځنۍ ناسته د طالبانو حکومت د مشر په رهبري ترسره کېږي.
دا ناسته وروسته تر هغې ترسره کېږي، چې دوه ورځې وړاندې طالبانو په طبي انستیتونونو کې د نجونو پر زده کړو هم بندیز ولګوو.
اروپایي ټولنې د طالبانو لخوا په طبي انستیتوتونو کې د نجونو د زده کړو د بندیز په غبرګون کې ویلي چې دا پریکړه یو ځل بیا له اساسي او بشري حقونو څخه سخته سرغړونه او زده کړو ته د ښځو پر لاسرسي یو ناحقه برید دی.
یادې ټولنې نن د یوې اعلامیې په خپرولو سره د دغې پرېکړې په اړه خپله ژوره اندېښنه څرګنده کړې او ویلي چې د طالبانو وروستۍ پرېکړه په افغانستان کې بشري ناورین لا پسې ژوروي او د دغه هېواد د خلکو کړاو نور هم زیاتوي.
دوی دغه راز ټینګار کړی چې په تعلیم او کاري ځواک کې د ښځو ګډون یوازې د برابرۍ خبره نه ده، بلکې د هر هېواد د ځان بسیاینې، پرمختګ او هوساینې لپاره اړینه ده.
دغې ټولنې پر طالبانو غږ کړی چې دا تبعیضي پالیسي بیرته واخلي او د نړیوالو قوانینو له مخې خپل مکلفیتونه ادا کړي.
دا په داسې حال کې ده چې تېره ورځ د طالبانو حکومت په طبي انستیتوتونو کې د نجونو پر زده کړو بندیز ولګوو.
د هېواد پخوانی ولسمشر حامد کرزی وایي، چې د نجونو پر مخ د طبي علومو د انستیتوتونو د دروازو بندول خورا خواشینونکي ده.
ښاغلي کرزي په خپله ایکسپاڼه لیکلي، چې په داسې حال کې د نجونو پر مخ د انستیتوت دروازې وتړل شوې، چې د هېواد په ټولو برخو کې ښځې او ميندې له ګڼو روغتيايي ستونزو سره مخ دي.
هغه ویلي: «افغانستان به هغه وخت له بهرنیو اړتیاوو وژغورل شي او داخلي ستونزو ته به لاره هواره شي چې متخصص او لوستي بشري منابع ولري او دا کار هغه وخت شونی دی چې د ټولو ځوانانو لپاره هغه که نجونې دي او که هلکان، د زده کړې زمینه برابره شي»
نوموړي یو ځل بیا ټینګار کړی چې د پردیو هېوادونو له اړتیا څخه د خلاصون یوازینۍ لار او د هېواد د ودې او پرمختګ یوازینی عامل تعلیم دی.
هغه د طالبانو له حکومت غوښتي چې ژر تر ژره د نجونو پرمخ د زده کړو دروازې پرانېزي او په وینا یې د استعدادونو د ضایع کېدو مخه ونیسئ.