په ملګرو ملتونو کې د افغانستان دایمي استازي نصیر احمد اندیشه ویلي، پاکستان د طالبانو پر وړاندې له قهرجنې دیپلوماسي کار اخیستی.
هغه ویلي، طالبان له پاکستان څخه د مستقیمې غچ اخیستنې وس نه لري.
د یادونې ده چې تېره شپه د پکتیکا په برمل، خوست او پکتیا کې د پاکستان جیټ الوتکو له لوري په عامو خلکو بمبار د ګڼو سباسیونو او نړیوالو بنسټونو غبرګونونه راپارولي دي.
جمهوري حکومت کې د مشرانو جرګې رییس فضل هادي مسلمیار د پاکستان پوځ له لوري د پکتیکا ولایت پر برمل ولسوالۍ هوايي برید په سختو ټکو غندلی.
ښاغلي مسلمیار په خپله ایکسپاڼه لیکلي، د پاکستان له لوري دغه ډول خپلسري بریدونه د افغانستان پر ملي حاکمیت تېری دی او په وینا یې هېڅ هېواد حق نه لري چې د افغانستان پر قلمرو او جغرافیه دغه ډول خپلسرانه بریدونه ترسره کړي.
نوموړي ویلي، دا ډول بریدونه د نړیوالو اصولو او قوانینو خلاف عمل دی او باید بې ځوابه پرېنښول شي.
هغه د یاد برید شهیدانو ته د فردوس جنت او کورنیو ته یې د جمیل صبر غوښتنه کړې.
د هېواد پخواني ولسمشر حامد کرزي پر پکتیکا د پاکستاني پوځیانو برید غندلی.
ښاغلي کرزي په خپله ایکسپاڼه ویلي، چې دا چاره په ښکاره ډول د نړیوالو قوانینو نقض دی.
نوموړی زیاتوي، د پاکستان او افغانستان ترمنځ د کړکېچنو اړیکو علت د اسلام اباد له لوري ناکام او پر افراطیت ولاړ سیاستونه دي.
هغه حسنه اړېکې د دواړو هېوادونو په کټه بللې.
د پخواني حکومت د سولې د مذاکراتي ټیم مشر معصوم ستانکزی وایي، چې د عامو افغانانو پر کورنو د پاکستان بمبار د نړیوالو قوانینو خلاف عمل دی.
هغه ویلي، پاکستان باید د تروریزم ریښه په خپل کور او ناکامو سیاستونو کې ولټوي.
نوموړی زیاتوي، تر هغې چې پاکستان خپل سیاست او رول بدل نه کړي؛ ستونزه نشي حلېدلای.
د ستانکزي په خبره، له یو لوري د استازي رالېږل او له بل لوري بمبار متضاد سیاست دی.
د ننګرهار پخوانی والي ضیاءالحق امرخېل وایي، پر پکتیکا ولایت د پاکستاني پوځ وحشیانه بمبار د افغانستان پر ملي حريم ښکاره تېری او د ټولو ملي او نړیوالو قوانينو او ميثاقونو ښکاره نقض دی.
نوموړي لیکلي:«د پاکستاني پوځ دغه وحشیانه عمل د ټولو ملي او نړيوالو اصولو خلاف کړنه او تجاوز دي او افغان ولس يې په سختو الفاظو غندي.»
هغه له طالبانو غوښتي چې د ځمکنۍ بشپړتیا او خپلو ولسي وګړو ساتنه وکړي.
طالبانو د تېرې شپې بریدونو د تلفاتو پټولو لپاره پر بمبار شویو سیمو مخابراتي شبکې قطعه کړې.
د سیمې خلکو د بمبار شویو ځایونو ویډیوګانې او تصویرونه په ټولنیزو رسنیو نشر کړل؛ خو طالبانو وروسته هلته مخابراتي شبکې قطعه او د تلفاتو کره کچه یې پټه کړه.
د یادونې ده چې بیګا شپه تر دولسو بجو له سیمې څخه جزیات د رسنیو په واک کې وو؛ خو تر هغې وروسته بیا سیمې ته لاسرسی نه وو.
د طالبانو له خپل منځي وټساپ ګروپونو ټولنیزو رسنیو ته له راوتلو غږیزو کلیپونو ښکاري، چې د پاکستاني جېټ الوتکو له لوري د تېرې شپې بریدونو له کبله درنه مرګ ژوبله اوښتې.
دوی په خپلو خبرو کې وایي، چې” بنګنې راغلې وې او مجاهدین د شپې نشوی وتلی.”
بل لورته تېره شپه د کره جزیاتو د پټولو لپاره طالبانو په سیمه کې مخابراتي شبکې هم قطعه کړې وې.
لاهم د یادو بریدونو د تلفاتو په اړه وروستي جزیات نه دي ورکړل شوي.
د متحدې جبهې مشر جنرال سمیع سادات وایي، د طالبانو د کورنیو او بهرنیو چارو وزیرانو له پاکستان سره د بېګاني برید پر سر هوکړه کړې وه.
هغه لیکلي، چې پاکستان ته د برید ټوله نقشه د طالبانو د استخباراتو مرستیال حاجي نجیب ورکړې وه.
سادات زیاتوي، چې افغانان به بیا د سیالۍ توان پیدا او دوښمنانو ته به توند ځواب ورکړي.
د یادونې ده چې تېره شپه د پکتیا، خوست او پکتیکا ګڼې سیمې د پاکستان جېټ الوتکو بمبار کړل.
د تیر جمهوري حکومت د بهرنیو چارو وزیر حنیف اتمر په افغانستان د پاکستاني جیټ الوتکو بریدونو خواشینې کړی دی.
ښاغلي اتمر په خپله ایکس پاڼه لیکلي: خواشیني څرګندوم چې د طالبانو رژیم د دې وحشیانه بریدونو لپاره هیڅ داسې وسیله نلري چې په مقابل کې یې مقاومت وکړي.
هغه ویلي که طالبان د هیواد د ټولو وګړو حقونه، ملي پخلاینه او په هیواد کې د مشروع نظام په رامنځته کولو همداسې نارضایتي دوامداره کړي نو د یو مشروع دفاع واک به ترې وتروړل شي
اتمر زیاته کړې چې د هیواد د نوي نسل دا پوښتنه به هیڅ کله حاکم دولت حل نه کړای شي چې 《 ایا دا سمه وه؟ ایا د پرون دلایل او عذر د نن ورځې بې وسي توجیه کولای شي؟》
حنیف اتمر دا څرګندونې داسې مهال کوي چې تېرو څو ساعتونو کې د پاکستاني جیټ الوتکو لخوا په پکتیکا، خوست او کندهار ولایتونو سخت بمبار وشو
تېر جمهوري حکومت کې د ملي امنیت پخوانی رییس رحمت الله نبیل ویلي چې طالبانو نه یواځې دا چې د افغانستان په داخلي چارو کې خپل مشروعیت د لاسه ورکړی بلکې د هیواد د حاکمیت د قرباني کولو لپاره د یوې نیابتي لوبې برخه ګرځېدلي دي.
ښاغلي نبیل په خپله ایکس پاڼه د حماسه میډیا د خبر په څرګندونه لیکلي چې چې طالبان یوه ترهګره ډله ده او د افغانستان د ځمکنۍ بشپړتیا د ساتنې وړتیا نلري.
هغه ویلي چې د افغانستان په خاوره د پاکستان لخوا پوځي بریدونه د طالبانو نیابتي ماهیت پوره افشا کوي او د پاکستان داسې بزدلانه بریدونه نه یواځې دا چې د بشریت پر وړاندې ښکاره جنایت دی بلکې د نړیوالو قوانینو او د افغانستان د ملي حاکمیت پر وړاندې د پاکستان د مطلقې بې پروایۍ څرګندونه کوي.
نبیل دا څرګندونې داسې مهال کوي چې دوه ساعته وړاندې پاکستاني جيټ الوتکو په پکتیکا، خوست او کندهار ولایتونو سخت بریدونه وکړه.