د ملي روغې جوړې عالي شورا مشر ډاکټر عبدالله عبدالله پر پکتیکا د پاکستان برید غندلی.
ښاغلي عبدالله په خپله ایکسپاڼه لیکلي، دا د افغانستان پر خاوره تېری او د ټولو قوانینو نقض دی.
نوموړي زیاته کړې، د دواړو هېوادونو ترمنځ باید ستونزې د خبرو له لارې حل او له هغو مسائلو ډډه وشي، چې د بحران ژورېدو سبب کېږي.
د طالبانو د بهرنیو چارو وزرات قزاقستان کې د اذربایجاني الوتکې پر لوېدو خواشیني څرګنده کړې.
یاد وزارت په یوه اعلامیه کې ویلي، چې یادې پېښې د قربانیانو کورنیو او د اذربایجان حکومت ته د تسلیت مراتب وړاندې کوي او ټپیانو ته د عاجلې شفاء غوښتنه کوي.
د یادونې ده، چې د قزاقستان په اکتا کې د اذربایجان مسافر وړونکې الوتکه لوېدلې، چې له کبله یې لسګونه کسانو خپل ژوند بایللی دی.
د طالبانو د بهرنیو چارو وزیر امیرخان متقي کابل کې د پاکستان چارسمبالی احضار کړی دی.
یاد وزارت یوه خبرپاڼه کې لیکلي، چې نوموړی یې نن له غرمې وروسته احضار کړی او پر پکتیا یې د برید په اړه ورته خپل جدي اعتراض لیک ورسپارلی.
خبرپاڼه کې راغلي، د افغانستان د ځمکنۍ بشپړتیا ساتنه یې سره کرښه ده.
بلوچستان کې د پاکستاني پوځيانو پر هغه موټریز کاروان برید شوی، چې غوښتل یې په سیمه کې د قطر دیپلوماتانو د ښکار شوق پوره کولو لپاره د امنیت تدابیر و ارزوي.
باوري سرچینې وايي، برید د بلوچستان د دشت سیمې په زرین باغ کې شوی.
په دغه برید کې دوه پوځيان وژل شوي او څلور نور ټپیان دي.
تر اوسه د برید مسوولیت چا نه دی منلی؛ خو هلته دغه ډول بریدونه بلوڅ ازادي غوښتونکي کوي.
باوري سرچینې وایي، چې کندهار کې د طالبانو والي ملا شیرین اخوند له لوري د غیر دولتي بهرنیو مؤسسو د تړلو فرمانونه صادر شوي.
ویل کېږي چې په دې اړه ملابرادر د طالبانو له مشر شیخ هبت الله اخوندزاده سره ناسته هم کړې؛خو بې پایلې پای ته رسېدلې.
بل لورته ننګرهار کې هم له تېرو څو ورځو راهیسې یونسیار خپل فعالیتونه تړلي.
په همدې حال کې لیکوال او د پوهنتون استاد هجرت الله اختیار وایي، د طالبانو مشر غواړي افغانستان کې د بهرنیو موسسو دفترونه پاکستان ته انتقال کړي او په دې باندې له ۲۰۲۲ کال راهیسې کار روان دی.
د جمهوري حکومت لومړی مرستیال امرالله صالح وايي، طالبان خپله یوه بهرنۍ دسیسه ده او دوی هیڅ بهرني ځواک ته د ځواب ویلو نه دي.
ښاغلي صالح په خپله ایکسپاڼه لیکلي، طالبانو د افغانانو یووالی په تاجک، پښتون، هزاره، سني، شعیه او ګڼو نورو نومونو وپاشه او د افغانستان د تل پاتې دوښمن پاکستان ستراتېژیکې موخې یې پوره کړې.
د هغه په خبره، طالبان د افغانستان له سپکولو او افغانانو ته له بې عزتي اړولو پرته په هیڅ نه پوهېږي.
صالح زیاتوي، اوس مهال افغانستان نړیوال مشروعیت بایللی او د نړۍ پر سټیج یې هیڅوک د غږ پورته کولو نشته او طالبان چې خبرې کوي؛ نو افغانان او نړۍ ورنه د کورني بحران حل غواړي.
امرالله صالح وايي، افغانان یو داسې حکومت ته اړتیا لري، چې قانون ولري او ټول په کې ځانونه وویني؛ خو د طالبانو حکومت د دوحې د تړون اساس دی.
د پخواني ولسمشر حامد کرزي د دفتر پخوانی مشر عبدالکریم خرم ویلي چې په پکتیکا کې د پاکستاني پوځ بمباري ټول افغانان غندي.
د هغه په خبره، دا د ځنگل قانون دی چې زورور پکې ځانته د هر عمل حق ورکوي، چې دا قانون نن ورځ اسراییلو او ملاتړو یې عام کړی؛خو زیاتوي چې پاکستان دې د ځنگل قانون ته زړه نه ښه کوي.
نوموړی وایي، پاکستان نه زمری دی نه لېوه دی؛ نو ځکه یې خیر په ښه ګاونډیتوب کې دی.
د طالبانو حکومت ویاند ذبیح الله مجاهد ویلي، پکتیکا کې د پاکستاني پوځیانو د بریدونو په پایله کې ۴۶ کسان وژل شوي.
مجاهد ویلي وژل شوي کسان تر ډېره مېرمنې او ماشومان دي.
د یادونې ده چې تېره شپه پاکستاني پوځیانو د پکتیکا په برمل ولسوالۍ کې یو شمېر سیمې په نښه کړې او ګڼو خلکو ته یې مرګ ژوبله واړوله.
په ملګرو ملتونو کې د افغانستان دایمي استازي نصیر احمد اندیشه ویلي، پاکستان د طالبانو پر وړاندې له قهرجنې دیپلوماسي کار اخیستی.
هغه ویلي، طالبان له پاکستان څخه د مستقیمې غچ اخیستنې وس نه لري.
د یادونې ده چې تېره شپه د پکتیکا په برمل، خوست او پکتیا کې د پاکستان جیټ الوتکو له لوري په عامو خلکو بمبار د ګڼو سباسیونو او نړیوالو بنسټونو غبرګونونه راپارولي دي.
جمهوري حکومت کې د مشرانو جرګې رییس فضل هادي مسلمیار د پاکستان پوځ له لوري د پکتیکا ولایت پر برمل ولسوالۍ هوايي برید په سختو ټکو غندلی.
ښاغلي مسلمیار په خپله ایکسپاڼه لیکلي، د پاکستان له لوري دغه ډول خپلسري بریدونه د افغانستان پر ملي حاکمیت تېری دی او په وینا یې هېڅ هېواد حق نه لري چې د افغانستان پر قلمرو او جغرافیه دغه ډول خپلسرانه بریدونه ترسره کړي.
نوموړي ویلي، دا ډول بریدونه د نړیوالو اصولو او قوانینو خلاف عمل دی او باید بې ځوابه پرېنښول شي.
هغه د یاد برید شهیدانو ته د فردوس جنت او کورنیو ته یې د جمیل صبر غوښتنه کړې.