جمهوري حکومت کې د ملي امنیت شورا ویاند مولوي رحمت الله اندړ ویلي، له طالبانو باید د هغو الوتکو پوښتنه وشي، چې خپله تېره واکمني کې یې له سقوط وړاندې ویلي وو، چې خوندي ځای ته یې استولي.
نوموړي ویلي، تېر ځل له سقوط وړاندې امیرخان متقي بيبيسي ته ویلي وو، چې دا الوتکې یې خوندي ځای ته استولي.
د اندړ په وینا، دا خوندي ځای د دوی لپاره پاکستان وو او اوس باید دغه هېواد ته د انتقال شویو الوتکو پوښتنه وشي.
د کابل پخوانی والي احمدالله علیزی وایي،افغانستان او پاکستان دوه ګاونډي هیوادونه او د ګڼو مشترکاتو لرونکي دي.
نوموړي غوښتنه کړې چې طالبان او پاکستان باید خپلې ټولې ستونزې او ګیلې د خبرو له لارې حل کړي.
علیزي په خپلې ایکسپاڼې لیکلي چې د ټيټيپي په ګډون هیڅ وسله وال د افغانستان په ګټه نه دي او طالبان یې باید پر وړاندې اقدام وکړي.
د طالبانو حکومت تر واک لاندې د ملي پراختیا شرکت د لومړي ځل لپاره یو باروړونکی اورګاډۍ جوړ کړی دی.
د طالبانو حکومت ویاند ذبیح الله مجاهد پر خپله ایکسپاڼه د یاد اورګاډي یوه ویډیو خپره کړې.
تر دې وړاندې یاد شرکت ډمټرک موټر او ښاري ملي بسونه هم جوړ کړي.
دا لومړی ځل دی، چې افغانستان کې اورګاډی جوړیږي.
د جنوبي کوریا رسنیو ویلي چې اوکراین د لومړي ځل لپاره د شمالي کوریا یو سرتېری ژوندی نیولی.
یاد سرتېری د اوکراین له پوځ سره جګړه کې ټپی شوی وو.
دا سرتېری په کورسک سیمه کې نیول شوی دی.
د یادونې ده چې اوس مهال د شمالي کوریا نږدې لس زره سرتېري د روسیې په ملاتړ د اوکراین پر وړاندې جنګیږي.
برېټانیا کې یوې هندي کورنۍ ځان افغان کډوال معرفي کړی او اوس مهال د برېټانیا حکومت هغوی مجرمین پېژندلي دي.
ډیلي میل لیکلي، دغې کورنۍ غوښتل چې د افغان کډوالو لپاره له ورکړل شویو اسانتیاو ګټه واخلي.
دغې څلور کسیزې کورنۍ، چې پخوا یې ځانونه د هند استوګن معرفي کړی وو، په ۲۰۲۲ کال کې یې د برېټانیا حکومت ته ویلي چې دوی افغانان دي.
د یادونې ده چې تر دې وړاندې هم ګڼو پاکستانیانو په بېلابېلو هېوادونو کې د پناه اخیستو لپاره ځانونه افغانان معرفي کړي.
پر یمن د اسرائیلي ځواکونو تر برید وروسته د دغه هېواد پوځ د اسرائیل یو شمېر سیمې په نښه کړي.
د ایراني رسنیو د راپورونو له مخې، د دغو بریدونو له کبله په تل ابیب کې د خطر زنګ وهل شوی او تر دوو میلیونو زیات اسرائیلیان پټنځایونو ته تښتېدو ته اړ شوي دي.
سرچینه زیاتوي، د یمن ځواکونو د بریدونو له کبله ۱۶ اسرائیلیان وژل شوي.
د طالبانو د بهرنيو چارو وزير مولوي امیرخان متقي په پکتيکا کې د طالبانو بريد له انصاف څخه لیرې وبلله او ويې ويل چې افغانان ښه او بد نه هېروي.
ښاغلي متقي وویل:«موږ به د جهاد پر مهال د پاکستان احسان او د پکتیکا په برمل ولسوالۍ بریدونه هېر نه کرو.»
امیرخان متقي پرون پر افغانستان د پخواني شوروي د یرغل د ۴۵مې کلیزې په مناسبت جوړې شوې غونډې ته وویل چې پاکستان د پکتیکا په برید کې د وزیرستاني کډوالو په ګډون ماشومان، ښځې او سپین ږیري وژلي دي.
نوموړي ټینګار وکړ چې د وزیرستان کډوالو لس کاله وړاندې د پاکستان د حکومت له خوا د خپلو کورونو له ویجاړولو وروسته افغانستان ته پناه راوړې وه او اوس په سختو شرایطو کې ژوند کوي.
د حزب اسلامي مشر ګلبدین حکمتیار په یوې اعلامیې کې په پکتیکا کې د پاکستان هوایي برید غندلی او دا یې د افغانستان پر حریم ښکاره تېرې بللی.
د ښاغلي حکمتیار اعلامیه چې د نوموړي ګوند اړوند ډیلي شهادت ایکسپاڼې خپره کړې په کې لیکل شوي:«كه اسلام آباد د بريد لپاره دا توجيه وړاندې كوي چي دلته یې د مخالفو وسله والو مركزونه په نښه كړي؛ نو دا وسله وال خو يو مهال د پاكستان له مدرسو افغانستان ته د دوى له لوري او د افغانانو خلاف د جگړې لپاره رالېږل شوي وو؛ پاكستاني سياستوال اعتراف او اعتراض كوي چي ولي دېرش زره پاكستاني جنگيالي افغانستان ته د جنگ لپاره لېږل شوي وو؟»
د حزب اسلامي مشر د طالبانو او پاکستان حکومتونو ته د مشورې په ډول لیکلي:« اسلام آباد دې د وسله والو مخالفينو ستونزه د كور دننه او د تدبير، تعقل او حكمت په مرسته حل كړي او هم د خپلو سياسي مخالفينو ستونزه؛ دا سيمه په مجموع كې امن او د جگړو ختمولو ته ضرورت لري؛ نه د يوې بلي جگړې پيلولو ته؛ كابل ته هم دغه مشوره لرو.»
د ډیورنډ کرښې ته څیرمه په ډنډ پټان او کرمې کې د طالبانو او پاکستاني ځواکونو د تېرې شپې په بریدونو کې د اوښتې مرګ ژوبلې په اړه معلومات نشته.
یو شمیر سرچینو ویلي چې دغه بریدونه تیره شپه پر ډیورند رامنځته شوې خو د اوښتې مرګ ژوبلې په اړه معلومات نشته.
د پښتون ژغورنې غورځنګ غړي حنیف پشتین د طالبانو اعلامیې ته په غبرګون کې ویلي چې په پکتیکا کې میشت د وزیرستان اوسیدونکو ته د مهاجر ویل سم کار نه دی.
ښاغلي پشتین ویلي په پښتونخوا کې افغانانو او په کابل کې وزیرستانیانو ته د مهاجر کلمه استعمالول د پېنډۍ او پنجاب ادبیات دي او هيڅوک دا حق نه لري چې له دوی هویت (افغانیت) واخلي.
د پښتون ژغورنې غورځنګ دغه غړي زیاته کړې چې وزیرستانیان په پکتیکا کې مهاجر نه بلکې د خپل افغان وطن پر سینه مېشت دي.