نیویارک ټایمز وایي، افغانستان کې د پاکستان د جنګي الوتکو بمباریو سیمه کې تاوتریخوالی لا زیات کړی.
د سرچینې د راپور پر اساس، اوس مهال د افغان طالبانو او پاکستان ترمنځ اړیکې کړکېچنې شوې.
راپور کې راغلي، پر ډېورنډ فرضي کرښه تاوتریخوالی اوس په اندېښنې بدل شوی.
دا په داسې حال کې ده چې تېره اوونۍ پاکستاني پوځیانو پر پکتیکا بریدونه کړي وو.
د سوریې د انتقالي حکومت د بهرنیو چارو وزیر اسد حسن الشیباني سعودي عربستان ته تللی.
رویټرز ویلي، نوموړی د یو پلاوي په مشرۍ ریاض ته رسېدلی دی.
په دغه پلاوي کې د سوریې د دفاع وزیر مرحف ابو قصري هم شامل دی.
تر دې وړاندې سوریې ویلي چې له ټولو هېوادونو سره ښې اړیکې غواړي.
نن سهار د غزې پر جنوبي سیمو کې د اسرائیلي ځواکونو په هوايي برید کې لږ تر لږه ۱۰ تنه وژل شوي دي.
رویټرز د غزې د روغتیا وزارت له قوله ویلي، چې برید د خان یونس په لوېدیځ کې د المواسي په سیمه کې، چې د بشرپاله زون په توګه اعلان شوی د یوې کورنۍ په کېږدۍ کې شوی دی.
رویټرز زیاته کړې، چې په دغه برید کې ۱۵ نور کسان ټپیان شوي هم.
اسرائیلي پوځ تر اوسه د دغه برید په اړه څه نه دي ویلي.
د ملګرو ملتونو سرمنشي انټونیو ګوټرېش د امریکا په نیو اورلینز ایالت کې د نوي کال د نمانځنې پر مراسمو برید غندلی.
ګوتریش ویلي، چې د قربانیانو کورنیو او د امریکا حکومت ته تسلیت وړاندې کوي.
د یادونې ده چې هلته تېره ورځ د امریکا پخواني سرتېري د نوي کال نمانځنۍ پر مهال د خلکو پر ګڼه ګوڼه د موټر په وسیله برید کړی چې، لږ تر لږه ۱۵ تنه یې وژلي او ۳۰ یې نور ټپيان کړي دي.
د ټسلا کمپني یو سایبرټرک موټر د امریکا لاس ویګاس ایالت کې د ډونالډ ټرمپ د هوټل مخې ته چاودنه کړې.
رویټرز راپور ورکړی، چې دغه برید کې یو تن وژل شوی او اوه نور ټپیان دي.
د ټسلا کمپنۍ مشر ایلان ماسک ویلي، یاده پېښه په موټر کې د ځای پر ځای شوي ماین له کبله رامنځته شوې ده.
د یادونې ده چې تر دې وړاندې د امریکا اورلینز ښار کې د نوي کال نمانځلو پر مهال یو پخواني سرتېري د موټر په وسیله ۱۵ تنه وژلي وو.
د ایران د بهرنیو چارو وزارت په تهران کې د سعودي عربستان سفیر احضار کړی.
په تهران کې د سعودي عربستان سفیر وروسته له هغې احضار شو چې تېره ورځ د سعودي په دمام ښار کې شپږ تنه ایرانیان د نشه یي توکو د قاچاق په تور اعدام شوي.
هېره دې نه وي چې په همدې ورځ د ایران په بندر عباس زندان کې دوه تنه افغانان چې د نشه یي توکو په قاچاق تورن شوي وو؛ په داسې حال کې اعدام شوي چې کورنۍ یې هم ترې خبره نه وه.
د کورنیو چارو پخوانی امنیتي مرستیال جنرال خوشحال سادات وایي پاکستان د شدید امنیتي بحران سره مخ دی او په افغانستان بمبارد او د واخان د نیولو اوازې د پاکستان ورخطایي او د اذهانو غولولو لپاره ترسره کیږي.
د جمهوریت دغه امنیتي چارواکی وایي، د واخان نیول او هلته د سړکونو جوړول او تاجکستان سره د پاکستان نښلول هسې افواه ده او د ذهنونو د مغشوشولو لپاره کیږي او خلک باید په دې ونه غولیږي.
ښاغلی سادات زیاتوي، په ژمي کې واخان ته ورتګ او هلته د سړکونو د جوړولو خبره خیال او مهال دی.
جنرال خوشال سادات دغه راز ویلي، هېله مند او امیدواره دی چې په پاکستان کې روان امنیتي بحران تشدید پیدا کړي او ښایي، پاکستانی پوځ د پاکستان د ګڼو ښارونو د نیولو توان له لاسه ورکړي.
د طالبانو حکومت د کابل امنیه قومندانۍ پخوانی ویاند او لابیګر «جنرال» مبین د طالبانو حکومت په مشر نیوکه کړې، چې ولس یې له لوږې مري؛ خو دی پرې مؤسسې بندوي.
«جنرال» مبین په خپله ایکسپاڼه لیکلي، “د بند، بند او بند” سیاست ته سړی حیران شي.
مبین په کنایوي ډول ویلي، چې د ویسټنډیز نوی حکومت پخوا چا کور کې نه پرېښود؛ خو اوس یې کبر اسمان ته رسېدلی.
نوموړي دغه راز زیاته کړې، چې وخت به تېر وي او بیا به پښېمانتیا ګټه نه کوي.
د پاکستان پوځ ویلي، تېر کال یې د ۶۰ زره عملیاتو په ترڅ کې ۹۰۰ وسله وال وژلي دي.
یاد پوځ په یوه خپره کړې اعلامیه کې ویلي، چې په دغه عملیاتو کې د وسله والو له لوري د دوی ۷۰۰ سرتېري هم وژل شوي دي.
اعلامیه کې راغلي، تر ټولو زیات بریدونه په پښتونخوا او تر ټولو کم بیا په پنجاب کې شوي دي.
بل لورته په دغه کال کې د ۵۷۸ ملکي خلکو د وژلو راپورونه هم ورکړل شوي.
که د پاکستاني پوځ د عملیاتو شمېر کره وي؛ نو یاد پوځ هره ورځ د وسله والو پر وړاندې ۶۶ ځله عملیات کړي.
په کورمه کې د شعیهګانو او سنيانو ترمنځ د تلپاتې سولې تړون لاسلیک شو.
دا تړون ۱۴ مادې لري چې له مخې به یې هلته همېشنی اوربند ټینګ او تړل شوې لارې به خلاصې شي.
یاد تړون څو ورځې وړاندې بشپړ شوی وو، چې نن لاسلیک شو.