د اسرائیل لوی درستیز هرتز هالوي خپل پوځ ته د تیارسئ امر کړی.
نوموړي ویلي، داسې ښکاري، چې ایران یو وار بیا پر اسرائیل برید وکړي.
ّدا خبر داسې مهال ورکول کېږي، چې د سوریې نظام له سقوط، پر ایران د بندیزونو، د دغه هېواد د اسعارو ارزښت راټیټېدو او ګڼو نورو ستونزو له کبله ایران په یو سخت وضعیت کې دی.
اسرائیل ټایمز ویلي، چې دمګړی د اسرائیل پوځ بېلابېلو سناریوګانو ته چمتووالی نیسي.
د ننګرهار په خوږیاڼو ولسوالۍ کې دوه جسدونه پیدا شوي دي.
سیمهییزې سرچینې وايي، دا جسدونه د خلکو له لوري پیدا شوي، چې وروسته ځایي طالبانو ته تسلیم شوي دي.
تر اوسه د دغو جسدونو هویت نه دی معلوم شوی.
د طالبانو ځایي چارواکو تر اوسه په دې اړه څه نه دي ویلی.
د امریکا د بهرنیو چارو وزیر انتوني بلنکېن ویلي، له افغانستان څخه د امریکايي ځواکونو د وتلو پرېکړې په نړۍ کې د امریکا موقف نور هم پیاوړی کړی.
نوموړي نیویارک ټایمز سره خبرو کې ویلي، چې بایډن د امریکا د تاریخ اوږده جګړه پای ته ورسوله.
هغه د افغانستان په اړه د امریکا سیاستونو ته په اشارې ویلي، چې د افرادو په ادلون بدلون سره په دغو سیاستونو کې کوم تغییر نه راځي.
د یادونې ده، چې ټرمپ بیا تل له افغانستان څخه د امریکايي ځواکونو د تللو پر څرنګوالي نیوکه کړې.
د ملګرو ملتونو د سرمنشي مرستیالې امنې محمد ټینګار کړی، چې په افغانستان کې د ښځو د حقونو دفاع ته د اسلام د چوکاټ په رڼا کې ژمنه پاتې کېږي.
نوموړې ویلي، په افغانستان کې د ښځو او نجونو په حقونو محدودیتونه لا هم دوام لري.
هغې پر خپله ایکس پاڼه لیکلي، چې په افغانستان کې د ښځو او نجونو حقونه لا هم د دوامداره بریدونو سره مخ دي.
ایران وایي، په دغه هېواد کې نږدې ۷۰۰ افغان متخصص ډاکټران په کار بوخت دي.
د یاد هېواد د کورنیو چارو وزارت د بهرنیو وګړو او کډوالو چارو د مرکز رییس ویلي، ځینې افغان کډوال چې ایران کې د اوسېدو قانوني اسناد لري، خدماتي بنسټونو سره د همکارۍ له لارې یې د اړینو خدماتو کارتونه ترلاسه کړي.
دا خبر داسې مهال ورکول کېږي، چې اوس مهال ایران کې د افغان کډوالو وضعیت تر ټولو سخت حالت ته رسېدلی دی.
غزه کې د اسراییلو په بریدونو کې لږ تر لږه ۷۰ کسان وژل شوی دی.
رویټرز راپور ورکړی، چې د غزې په تړانګه کې اسراییلو په یو شمېر کورونو هوایي بریدونه کړي، چې ګڼ شمېر کسان یې وژلي.
بل لورته د فلسطین د بېړنیو خدماتو ډلې ویلي، چې دا بریدونه د خلکو په کورونو شوي او ښايي لس کسان نور تر خاورو لاندې وي.
اسراییلي ځواکونو تر اوسه په دې اړه څه نه دي ویلي.
د امریکا ولسمشر جوبایډن د خپلې ولسمشرۍ په وروستیو اقداماتو کې پر اسراییلو د اته میلیارد ډالرو په ارزښت پوځي وسلې پلوري.
د اکیوس خبري ویبپاڼې هم راپور ورکړی چې د امریکا د بهرنیو چارو وزارت کانګرس ته په اسراییلو د اته ملیارد ډالرو وسلو د پلور خبر ورکړی.
راپورونه وایي، بایډن ویلي، اسراییل حق لري چې د ایران او نورو ډلو د بریدونو په وړاندې د خپلو خلکو دفاع وکړي.
د یادونې ده چې نږدې څلور میاشتې وړاندې د بایډن حکومت اسراییلو سره د جنګي الوتکو په ګډون د ۲۰۰ میلیارد ډالرو په ارزښت د پوځي وسلې د پلور ژمنه کړې وه.
په امریکا او شمالي اروپا کې مېشتو افغان خبریالانو په یو راپور کې ویلي، چې طالبانو په تېرو شلو کالونو کې ۱۸۰ خبریالان وژلي دي.
دغه راپور کې د طالبانو حکومت له واک ته رسېدو وروسته د افغان خبریالانو وضعیت ته کتنه شوې او ویل شوي، چې د طالبانو په بیا واکمنۍ کې ۱۷ خبریالان په کور دننه وژل شوي او یا یې د دوی د محدودیتونو له کبله ژوند له لاسه ورکړی او دغه راز بیا ۲۸ نور خبریالان په هېواد کې دننه او بهر ټپیان شوي دي.
د سرچینې د معلوماتو له مخې، دغه راز بیا تر درې سوو زیات خبریالان د طالبانو له لوري نیول شوي دي.
د یادونې ده چې واک ته د طالبانو حکومت له رسېدو وروسته په رسنیو ګڼ محدودیتونه لګول شوي دي.
د پکتیا پخوانی والي محمد حلیم فدایي وایي، چې د جمهوریت بې کفایته جاسوسان خپل بادار له طالبانو سره مارچه کړل، اوس یې نه بادار مني او نه ولس ته مخ لري.
نوموړي په خپله ایکسپاڼه لیکلي، که طالب د پردیو جاسوس ګڼل کېږي؛ نو بیا باید د ایران، روسیې او نورو جاسوسانو ته هم برائت ورنه کړل شي.
فدایي زیاتوي جاسوس که د هر شعار لاندې وي؛ نو جاسوس بلل کېږي.
هغه دغه راز زیاته کړې چې ستاسې له لاسه سم خلک بدنام شول.
جمهوري حکومت کې د ملي امنیت شورا پخوانی ویاند رحمت الله اندړ وایي، حفیظ منصور او عباس ستانکزي ته ډایلاکونه یو ډایرکټر ورکړي.
ښاغلي اندړ په خپله ایکسپاڼه لیکلي:«د ستانکزي صیب تمثیل او ډیلاګ ته خلک ډېر خوښ دي، خو دوی دا خبرې له پامه غورځوي چې شل کاله ټول طالبان د پاکستان په لمن کې پراته و، د ارام او استراحت ځای یې پاکستان و، د هر مشر له الف تر یا ټول مالومات یې له پاکستان سره دي، د دوحي ټوله پروسه د پاکستان لخوا چینل کېده، د دوحي د هرې ناستې جزئیات به له پاکستان سره شریکیدل، دوحي ته به طالب استازي له پاکستانه راتلل، په حقیقت کې د دوحي قرارداد د امریکایانو او پاکستان تر منځ و او طالبان په لاشعوري ډول د شطرنج د ګاټو په څېر کاریدل او ښوریدل.»
د نوموړي په خبره، د دوحې پروسه پاکستان مدیریت کوله او امریکا ته یې دا ښودله چې طالبان هم د دوی له ولکې نشي وتلی.
نوموړی دا څرګندونې داسې مهال کوي، چې د طالبانو حکومت د بهرنیو چارو وزارت سیاسي مرستیال شېر محمد عباس ستانکزي ویلي، هر هغه چا چې د افغانستان خاوره خرڅه کړې، اغزن تار پرې کش شوی او دوی ترې تللي؛ نو خیانت یې د افغانستان په تاریخ کې ثبت شوی.