د امریکا ولسمشر جوبایډن د خپلې ولسمشرۍ په وروستیو اقداماتو کې پر اسراییلو د اته میلیارد ډالرو په ارزښت پوځي وسلې پلوري.

د اکیوس خبري ویب‌پاڼې هم راپور ورکړی چې د امریکا د بهرنیو چارو وزارت کانګرس ته په اسراییلو د اته ملیارد ډالرو وسلو د پلور خبر ورکړی.

راپورونه وایي، بایډن ویلي، اسراییل حق لري چې د ایران او نورو ډلو د بریدونو په وړاندې د خپلو خلکو دفاع وکړي.

د یادونې ده چې نږدې څلور میاشتې وړاندې د بایډن حکومت اسراییلو سره د جنګي الوتکو په ګډون د ۲۰۰ میلیارد ډالرو په ارزښت د پوځي وسلې د پلور ژمنه کړې وه.

په امریکا او شمالي اروپا کې مېشتو افغان خبریالانو په یو راپور کې ویلي، چې طالبانو په تېرو شلو کالونو کې ۱۸۰ خبریالان وژلي دي.

دغه راپور کې د طالبانو حکومت له واک ته رسېدو وروسته د افغان خبریالانو وضعیت ته کتنه شوې او ویل شوي، چې د طالبانو په بیا واکمنۍ کې ۱۷ خبریالان په کور دننه وژل شوي او یا یې د دوی د محدودیتونو له کبله ژوند له لاسه ورکړی او دغه راز بیا ۲۸ نور خبریالان په هېواد کې دننه او بهر ټپیان شوي دي.

د سرچینې د معلوماتو له مخې، دغه راز بیا تر درې سوو زیات خبریالان د طالبانو له لوري نیول شوي دي.

د یادونې ده چې واک ته د طالبانو حکومت له رسېدو وروسته په رسنیو ګڼ محدودیتونه لګول شوي دي.

د پکتیا پخوانی والي محمد حلیم فدایي وایي، چې د جمهوریت بې کفایته جاسوسان خپل بادار له طالبانو سره مارچه کړل، اوس یې نه بادار مني او نه ولس ته مخ لري.

نوموړي په خپله ایکس‌پاڼه لیکلي، که طالب د پردیو جاسوس ګڼل کېږي؛ نو بیا باید د ایران، روسیې او نورو جاسوسانو ته هم برائت ورنه کړل شي.

فدایي زیاتوي جاسوس که د هر شعار لاندې وي؛ نو جاسوس بلل کېږي.

هغه دغه راز زیاته کړې چې ستاسې له لاسه سم خلک بدنام شول.

جمهوري حکومت کې د ملي امنیت شورا پخوانی ویاند رحمت الله اندړ وایي، حفیظ منصور او عباس ستانکزي ته ډایلاکونه یو ډایرکټر ورکړي.

ښاغلي اندړ په خپله ایکس‌پاڼه لیکلي:«‏د ستانکزي صیب تمثیل او ډیلاګ ته خلک ډېر خوښ دي، خو دوی دا خبرې له پامه غورځوي چې شل کاله ټول طالبان د پاکستان په لمن کې پراته و، د ارام او استراحت ځای یې پاکستان و، د هر مشر له الف تر یا ټول مالومات یې له پاکستان سره دي، د دوحي ټوله پروسه د پاکستان لخوا چینل کېده، د دوحي د هرې ناستې جزئیات به له پاکستان سره شریکیدل، دوحي ته به طالب استازي له پاکستانه راتلل، په حقیقت کې د دوحي قرارداد د امریکایانو او پاکستان تر منځ و او طالبان په لاشعوري ډول د شطرنج د ګاټو په څېر کاریدل او ښوریدل.»

د نوموړي په خبره، د دوحې پروسه پاکستان مدیریت کوله او امریکا ته یې دا ښودله چې طالبان هم د دوی له ولکې نشي وتلی.

نوموړی دا څرګندونې داسې مهال کوي، چې د طالبانو حکومت د بهرنیو چارو وزارت سیاسي مرستیال شېر محمد عباس ستانکزي ویلي، هر هغه چا چې د افغانستان خاوره خرڅه کړې، اغزن تار پرې کش شوی او دوی ترې تللي؛ نو خیانت یې د افغانستان په تاریخ کې ثبت شوی.

بلوچ ازادي غوښتونکو د بلوچستان په تربت کې پر پاکستاني پوځیانو د برید مسؤلیت ومانه.

یادې ډلې یوې اعلامیې کې ویلي، چې د دوی کسانو د پاکستاني پوځیانو پر موتر ځانمرګی برید کړی.

بل لورته یوې سرچینې ویلي، پر دغه برید کې نږدې ۵۰ ایف سي ځواکونه وژل شوي.

دا برید نن ماښام ترسره شوی دی.

د پاکستان حکومت تر اوسه په دې اړه څه نه دي ویلي.

جمهوري حکومت کې د چارو ادارې لوی رییس فضل محمود فضلي ویلي، چې ‏د ډیورنډ فرضي کرښه او د راولپنډۍ د دفتر ایجاد د بریتانوي استعمار هغه میراثونه دي چې هېڅ افغان ته د منلو وړ نه دي.

نوموړی وایي، مجاهد او طالب هم د راولپنډۍ (د استعمار د استازي) تولید شوي عناصر دي او دا به د ملي پالو افغانانو لویه تېروتنه او د تاریخ څخه د نه زده کړې نښه وي چې د ډیورنډ کرښې په اړه د طالب څرګندونو ته د “ملي دریځ” نوم ورکړي.

فضلي د ډېورنډ فرضي کرښې په اړه د طالبانو څرګندونې یوازې د پنډۍ او طالب د ګډې سینما يوه صحنه بللې ده.

د سوریې انتقالي حکومت د دفاع وزارت خبر ورکړی، چې له دوی سره د نورو وسله والو ډلو د یو ځای کېدو لړۍ پیل شوه.

دوی یو ګډ انځور خپور کړی، چې پکې د بېلابېلو وسله والو ډلو مشران لیدل کېږي.

د یادونې ده چې څو ورځې وړاندې په دې اړه دمشق کې ناسته هم شوې وه.

بلوچستانۍ خبریاله باهوټ بلوڅ وايي، چې د بلوچستان په تربت ولسوالۍ کې پر هغه بس چاودنه شوې، چې پاکستاني پوځیان په کې سپاره وو.

د بلوڅ په خبره، په چاودنه کې لسګونه پوځیانو ته مرګ ژوبله اوښتې.

نوموړې ویلي، د پاکستان پوځ سیمه کلابنده کړې او هیڅوک د پېښې ځای ته نه پرېږدي.

د طالبانو حکومت دفاع وزارت وايي، چې په توپچي ریاست کې یې د میلان کنکورس 9M135 په نوم یو رهبري شوی راکټ فعال او دغه راز ۱۳ تنه یې له یوې میاشتي عملي زده کړو وروسته فارغ شول.

د یاد وزارت ویاند عنایت الله خوارزمي وايي، دا راکټ د لومړي ځل لپاره په هېواد کې فعال شو، چې زره‌دار ټانګونه، جنګي کښتۍ او ټیټ پرواز کوونکي هلیکوپټر په نښه کولای شي.

د سی آی ای پخوانۍ ماموره سارا ادم وايي، نور باید دا ذهنیت لرې کړو، چې طالبان له داعش سره جګړه کوي.

هغه وايي، طالبانو په بریالي ډول د دوی ټولنه، د امریکا دفاع وزارت او ان هوښیار ذهنونه غولولي دي.

نوموړې زیاتوي، چې له طالبانو سره باید هر ډول ملاتړ او دوی سره د معلوماتو شریکول په بېړنی ډول بند شي.

د ادم په خبره، له طالبانو سره د ښکېلتیا ستراتیژي د دوی د ملي امنیت لپاره ګواښ پېښ کړی او اوس هر هغه چارواکي د امنیت ساتلو ته اړ شوی، چې په دې اړه یې ريښتیا ویلي وو.

هغې دغه راز زیاته کړې، چې روان کال به د حساب کال وي.