د طالبانو حکومت د سرحدونو، قومونو او قبایلو چارو وزارت سرپرست وزیر نورالله نوري ویلي، چې دا نظام یوازې د طالب نه؛ بلکې د ټولو افغانانو دی.
هغه ویلي، افغانان اصلي« فاتحین» دي او دوی ته یې میدان ګټلی.
نوموړي یو وار بیا د افغانانو ترمنځ پر یووالي ټینګار کړی؛ خو ویلي یې دي، چې په افغانستان کې تل فکري اختلافونو انقلابونه راوستي دي.
د یادونې ده، چې نن د سرحدونو، قومونو او قبایلو چارو وزارت کابل کې د نظام د ثبات او د خلکو ترمنځ د یووالي لپاره ناسته رابللې وه، چې نورالله نوري هم په کې خبرې وکړې.
د امریکا سنا مجلس اسکاټ بسنټ د دغه هېواد د خزانې وزیر په توګه ومانه.
هغه تېره ورځ ۶۸ موافقې او ۲۹ مخالفې رایې تر لاسه کړې.
نوموړی د امریکا د پخواني ولسمشر بایډن له منتقدینو څخه شمېرل کېده، چې ویل یې د امریکا لګښتونه هم له کنټرول وتلي دي.
یاد وزیر دغه راز د امریکا د اضافي لګښتونو پر کنټرول هم ټینګار کوو.
د طالبانو حکومت د امر بالمعروف وزارت د ښځو په اړه د یوناما وروستی راپور بې اساسه بللی.
یاد وزارت په یوه اعلامیه کې ویلي، چې دغه راپور د غربي لیدلوري په اساس جوړ شوی.
په اعلامیه کې زیاته شوې، چې د طالبانو حکومت د اسلامي اصولو، دیني او افغاني ارزښتونو او ټولنیزو حساسیتونو په پام کې نیولو سره د ښځو ټول حقونه خوندي کړي.
دوی له یوناما غوښتي چې خپلو راپورونو کې د افغانستان دیني او کلتوري ارزښتونو ته پام وکړي.
اعلامیه کې دغه راز ویل شوي، چې دوی د اسلام په رڼا او شریعت په چوکاټ کې د ښځو ټولو حقونو ته ژمن دي.
د طالبانو حکومت د بهرنیو چارو وزارت سرپرست امیر خان متقي وايي، د ایران او افغانستان ترمنځ د اوبو پر سر ستونزې د وچکالۍ له امله دي.
د ایران د بهرنیو چارو وزیر کابل ته له سفر وروسته په یوه غونډه کې ټینګار وکړ چې د طالبانو حکومت به د دغه حق د خوندي کولو په لاره کې هیڅ ډول خنډ رامنځته نه کړي.
د امریکا دفاع وزیر پیت هګسېت له افغان همکارانو پر ملاتړ ټینګار کړی.
هغه امریکا ته د افغان کډوالو د ورتلو په اړه ویلي، چی دی د خپلو افغان همکارانو په خوا کې ولاړ دی.
دا په داسې حال کې ده چې ټرمپ له راتګ سره امریکا ته د ورتلونکو کډوالو د ورتګ د ځنډېدو امر وکړ.
د طالبانو حکومت تر واک لاندې د افغانستان بانک اعلان کړی چې د افغانیو ارزښت ساتنې لپاره به د چهارشنبې په ورځ ۲۷ میلیونه ډالر لیلام کړي.
دا په تېره یوه اوونۍ کې څویم ځل دی، چې افغانستان بانک ډالر لیلاموي.
پر نړۍ او افغانستان د امریکا مرستو له بندېدو وروسته ډالر د افغانیو پر وړاندې پورته شول؛ خو افغانستان بانک وایي چې د افغانیو ثبات ساتنې لپاره کافي سرچینې واک کې لري.
افغانستان کې د ایران سفیر علي رضا بیکدلي وايي، کابل ته د عباس عراقچي سفر د طالبانو حکومت د رسمیت پېژندلو په معنی نه دی.
علي رضا بېکدلي ویلي، چې رسمیت پېژندنه یوه حقوقي موضوع ده، چې خپل نړیوال حقونه او ځانګړتیاوې لري.
هغه د کابل او تهران ترمنځ نږدې اړیکې اړینې بللې دي.
د یادونې ده، چې وړمه ورځ د ایران د بهرنیو چارو وزیر عباس عراقچي په یو ورځني سفر کابل ته راغلی وو، چې دلته یې د طالبانو حکومت له بېلابېلو چارواکو سره وکتل.
پاکستان کې د طالبانو پخواني سفیر مولوي عبدالسلام ضعیف د طالبانو حکومت په مشر شیخ هبتالله اخوندزاده غږ کړی، چې نور د نجونو پر وړاندې د ښوونځیو دروازې پرانېزي.
عبدالسلام ضعیف د یو لیک له لارې له شیخ هبتالله اخوندزاده غوښتي، چې د نجونو د زده کړو په اړه یوه دیني اجماع جوړه کړي.
د نوموړي په خبره، دا یوه مهمه اړتیا ده او باید له پامه ونه غورځول شي.
د یادونې ده، چې تېره ورځ کابل کې د دیني عالمانو په یوې غونډې کې هم د نجونو پرمخ د ښوونځیو د دروازو خلاصولو غوښتنه شوې وه.
د طالبانو حکومت د بهرنیو چارو وزارت سیاسي مرستیال شېر محمد عباس ستانکزي ویلي، چې دی د خپلې ناروغۍ د درملنې لپاره بهر وتلی.
عباس ستانکزي ویلي، چې د طالبانو حکومت له مشر شیخ هبتالله اخوندزاده سره هیڅ راز دوښمني نه لري.
ښاغلي ستانکزي یو غږیز کلیپ کې ویلي، چې کرونا ته ورته ناروغي یې وه؛ نو ځکه بهر ته وتلی.
تر دې وړاندې داسې راپورونه ورکړل شوي وو چې ګواکې دی له شیخ هبت الله سره تر جنجال وروسته دوبی ته تللی.
د امریکا ولسمشر، ډونالډ ټرمپ، د هند له لومړي وزیر، نرېندرا مودي، سره ټلیفوني خبرې کړې.
رویټرز ویلي، چې دواړو لوریو په دې خبرو کې د عادلانه دوه اړخیزې سوداګریزې اړیکې پر رامنځته کولو ټینګار کړی دی.
رویټرز زیاته کړې، سپینې ماڼۍ دغه ټلیفوني اړیکه مثبته بللې او ویلي یې دي چې د دواړو هیوادونو مشرانو د ژورې همکارۍ د پراختیا او د آرام سمندر، منځني ختیځ او اروپا د امنیتي مسایلو په اړه خبرې کړي دي.