د افغانستان د وروستي جمهوري نظام لومړي مرستیال امرالله صالح وايي، د هند او پاکستان د کړکیچ سره هم مهاله د پيسو نړیوال صندوق IMF د پاکستان قرض منظور کړ.
ښاغلي صالح ویلي د IMF په قرض جنګ نه ګټل کېږي.
امرالله صالح په داسې حال کې چې د IMF له لوري پاکستان ته د قرض منظوري یوه حیرانونکې چاره بللې خو ویلي چې پاکستان له مالي پلوه جګړې ته تیار نه دی.
د پیسو نړیوال صندوق د مۍ ۹ نېټه پاکستان ته ۱ میلیارد ډالر قرض منظور کړ.
د هند هوایي ځواک وايي، عملیات یې اوس هم دوام لري.
دوی ویلي، چې دغه پیل شوي عملیات یې کامیاب وو او خپل غږ یې په واضح ډول تر راولپنډۍ ورسوو.
دوی زیاتوي، چې د سندور په نوم د پیل شویو عملیاتو بشپړ جزیات به ډېر ژر شریک کړي.
د همد دفاع وزیر یو خبري کنفرانس ته ویلي، چې دوی نه یوازې د خپلو پولو دننه؛ بلکې د ترهګرۍ خلاف د خپل هېواد له خاورې بهر هم عملیات کوي.
هند یو وار بیا ګواښ کړی، چې که پاکستان برید وکړي؛ نو سخت ځواب به ورکړي.
د طالبانو حکومت وایي، د ځمکو د غصب مخنیوي او د غصب شویو ځمکو د استرداد کمېسیون به وزارت ته ارتقاع وکړي.
د ځمکو د غصب مخنیوي کمیسیون ویلي، دغه وزارت به د «اراضي چارو او امارتي غصب شویو ځمکو د استرداد وزارت» په نوم به یادیږي.
د کمیسیون چارواکي وایي، یاد وزارت به د ځمکو د غصب د مخنیوي، استرداد ترڅنګ د هیواد د ټولو ځمکو څیړنه او کاردستر مسولیت هم په غاړه لري.
د طالب چارواکو په وینا د وزارت کارونه نږدې ۹۰ سلنه بشپړ شوي او ډیر ژر به د شیخ هبت الله له لورې د وزارت په بڼه پیل وکړي.
د غصب مخنیوي کمیسیون داسې مهال جوړیږي چې طالبانو په حکومت د پړسوب له مخې په ګڼو اداراتو کې تنقیص رامنځته کړی دی.
د ایران د بهرنیو چارو وزیر عباس عراقچي د امریکا سره د خبرو اترو د څلورم پړاو لپاره عمان ته تر سفر وړاندې ویلي، چې امریکايي پلاوی په خبرو کې متضاد دریځونه لري او دا د مذاکراتو یوه جدي ستونزه ده.
نوموړي زیاته کړې، چې د ایران د یورانیمو غنيسازي پروګرام د هېواد له مهمو لاسته راوړنو څخه دی، چې پرې ډېر لګښت شوی، او نه د بحث وړ دی او نه د معاملې.
عراقچي همداراز ویلي، چې د امریکايي چارواکو رسنیزو څرګندونو د خبرو اترو پر بهیر منفي اغېز کړی دی.
نوموړي هیله څرګنده کړې چې ایران به وتوانېږي د خپلو اصولي دریځونو په ساتلو سره، د خبرو په دې پړاو کې یوې مثبتې پایلې ته ورسېږي.
د طالبانو تر واک لاندې د ورزش اداره وايي، د شطرنج فدراسیون د مشرتابه د ناسم مدیریت او د دې لوبې په اړه د شرعي اندېښنو له امله، شطرنج لوبه تر ناڅرګند وخت پورې ځنډول شوې ده.
نوموړي څرګنده کړې چې دا پرېکړه د شطرنج فدراسیون د اوسني وضعیت له مخې شوې ده.
د یادې ادارې ویاند اتل مشواڼي زیاته کړې چې د شطرنج لوبې د شرعي ارزونې لپاره یو پروسه روانه ده، او تر هغې چې دا ارزونه بشپړه نه شي، او د فدراسیون دننه موجودې ستونزې حل نه شي؛ نو د شطرنج لوبه به د افغانستان د ورزش ادارې له خوا ځنډول شوې وي.
د امریکا ولسمشر ډونالډ ټرمپ د هند او پاکستان ترمنځ د اوربند پرېکړه ستایلې او ویلي یې دي چې غواړي د دواړو هېوادونو ترمنځ د کشمیر د اوږدې شخړې د حل لپاره همکار شي.
نوموړي ویلي، که څه هم لا یې په دې اړه له اسلاماباد او نوې ډیلي سره خبرې نه دي کړي؛ خو هیله لري چې له دواړو هېوادونو سره سوداګریزې اړیکې هم پراخې کړي.
ټرمپ دا څرګندونې په داسې حال کې کړي چې تازه د هند او پاکستان ترمنځ کړکېچ پای ته رسېدلی او له یو بل سره یې اوربند کړی.
د طالبانو حکومت د بهرنیو چارو وزارت د عامه اړیکو رییس ضیاء احمد تکل وايي، د چین ځانګړي استازي یوشیاو یونګ، امیرخان متقي ته بلنه ورکړې، چې روانه میلادي میاشت چین ته سفر وکړي.
دغه بلنه د دواړو لورو ترمنځ د لیدنې پر مهال مطرح شوې چې پکې د دوهاړخیزو اړیکو پر پراختیا خبرې شوې دي.
د ضیاء احمد تکل په وینا، متقي او یوشیاو یونګ د سیاسي اړیکو د لا پیاوړتیا، اقتصادي همکاریو او سیمهییز تعامل په اړه مفصلې خبرې وکړې.
متقي له چین څخه د افغانستان په برخه کې د همکارۍ او ملاتړ مننه وکړه او ویې ویل چې چین د یوه مهم سیمهییز شریک په توګه رول لوبولی دی.
د چین ځانګړي استازي ټینګار وکړ چې بیجینګ به د افغانستان نړیوال ملاتړ ته دوام ورکړي او د دې هېواد په اقتصادي پراختیا کې به فعاله ونډه واخلي.
د اردن یوې ورځپاڼې “المرصد” راپور ورکړی چې یو اردني وروسته تر هغې خپله مېرمن طلاق کړې، چې هغه یې د لبنان د مشهور سندرغاړي راغب علامه د هرکلي په مراسمو کې ولیدله.
دغه کنسرت تازه په اردن کې ترسره شوی و، او ګڼ شمېر ښځې د دغه هنرمند هرکلي ته تللې وې.
یوې بلې ورځپاڼې “السوسنه” بیا راپور ورکړی، دا ښځه پرته له دې چې خپل مېړه خبر کړي یا اجازه ترې واخلي، د ملکه عالیه هوایي ډګر ته تللې وه ترڅو د راغب علامه هرکلی وکړي.
نوموړې خپل مېړه ته ویلي وو چې غواړي د خپلې کورنۍ لیدو ته ولاړه شي، خو اصلاً د هنرمند لیدو ته تللې وه.
د راپور له مخې، د ښځې مېړه هغه په یو ویډیو کې لیدلې وه چې د راغب علامه د هرکلي پر مهال خپره شوې او په ټولنیزو رسنیو کې لاس په لاس کېدله.
نن د عمان په مسقط کې امریکا او ایران د اټومي پروګرام په اړه ځنډول شوې خبرې پیلوي.
رویټرز خبري اژانس د ایران د بهرنیو چارو وزیر سید عباس عراقچي له قوله لیکلي چې د اټومي پروګرام په اړه له امریکا سره د غیر مستقیمو خبرو اترو څلورم پړاو به نن عمان کې ترسره کیږي.
ایران وایي، له امریکا سره یې خبرې ښې روانې دي.
امریکایي ولسمشر ډونالډ ټرمپ په وار، وار ایران ته خبرداری ورکړی که تهران موافقه ونه کړي نو ددې هیواد هستوي تاسیسات به بمبارد کړي.
پدې خبرو اترو کې د منځني ختیځ لپاره د امریکا د ولسمشر ځانګړی استازی سټیو ویټکاف هم د خبرو اترو پدې پړاو کې د ګډون لپاره د عمان پلازمینې ته ولاړ شي.
دغه خبرې اترې چې باید د مۍ په ۳مه روم کې ترسره شوای د یو شمیر دلایلو له امله ځنډلي وو
د هند او پاکستان ترمنځ د ترینګلتیا تر کمېدو وروسته، د پاکستان د هوايي ډګرونو ادارې اعلان کړی چې د شنبې په ماښام یې فضایي حریم یو ځل بیا په بشپړ ډول د ټولو الوتنو لپاره پرانیست.
د دې ادارې ویاند ویلي، ټول هوايي ډګرونه د عادي پروازونو لپاره خلاص دي او له مسافرو یې غوښتي چې د خپلو الوتنو د مهالویش لپاره له هوايي شرکتونو سره تماس ونیسي.
د پاکستان نړیوال هوايي شرکت (PIA) هم خپل ځنډېدلي پروازونه له سره پیل کړي.
چارواکي وايي، د امنیتي دلیلونو له امله ځینې الوتنې مخکې ځنډول شوې وې.