مکسیکو دغه هېواد ته د امریکا د ناقانونه کډوالو د لېږلو غوښتنه رد کړه.
تېره ورځ امریکا نږدې ۱۶۰ کډوال په دوو الوتکو کې ګواتیمالا ته ولېږل؛ خو مکسیکو بیا د کډوالو درېیمې الوتکې ته د ناستې اجازه نه ده ورکړې.
دا په داسې حال کې ده، چې ټرمپ تېره ورځ ویلي وو، چې هڅه کوي امریکا ته د ناقانونه کډوالۍ مخه ونیسي.
یاد حکومت تېره ورځ هم ۵۳۸ ناقانونه کډوال نیولي دي.
په پام کې ده، چې حماس او اسرائیل نن یو وار بیا خپل ځينې بندیان سره تبادله کړي.
په دغه تبادله کې به حماس څلور اسرائیل او د اسرائیل حکومت به ۲۰۰ فلسطینیان ازادوي.
تر دې وړاندې بیا حماس درې؛ خو اسرائیلو ۹۰ بندیان ازاد کړي وو.
د یادونې ده، چې اوس مهال په غزه کې د ۴۲ ورځو لپاره اوربند ټینګ شوی.
د طالبانو حکومت د کډوالو او بیرته راستنېدونکو چارو وزیر مولوي عبدالکبیر وایي، چې حکومت یې اوس په ملګرو ملتونو کې هم پیاوړي ملګري پیدا کړي.
مولوي کبیر له یوې دیني مدرسې څخه د زده کوونکو فراغت غونډې ته ویلي چې پخوا هلته د دوی ملاتړي نه وو؛ خو اوس یې یو شمېر هېوادونه ننګه کوي.
نوموړي یو وار بیا له نړۍ سره پر مشروع تعامل ټینګار کړی.
د یادونې ده چې ملګرو ملتونو کې تر ډېره چین او روسیه د طالبانو حکومت ملاتړ کوي.
د طالبانو حکومت د کورنیو چارو سرپرست وزیر سراج الدین حقاني وایي، مغرض کسان د نظام بدنامولو هڅه کوي.
سراج الدین حقاني له یوې دیني مدرسې څخه د فارغانو غونډې ته غږیز پیغام کې ویلي، چې له دین څخه د خبرتیا ترڅنګ باید د خلکو ستونزو ته پام وشي.
د هغه په خبره په دغه نظام کې هر څوک حق لري او دا د ټولو شریک نظام دی.
د ملګرو ملتونو د بشري مرستو همغږي کوونکې ادارې یا اوچا د زده کړو نړیوالې ورځې په مناسبت ویلي چې زده کړې د ټولو حق او یو عمومي مسولیت دی.
دوی ویلي، اوس مهال ۱.۵ میلیونه نجونې له زده کړو بې برخې دي او دا چاره باید نور پای ومومي.
د یادونې ده چې اوس مهال له ۱۲ سوه زیاتې ورځې کېږي چې د طالبانو حکومت د نجونو پر مخ ښوونځي تړلي دي.
څو ورځې وړاندې د طالبانو حکومت د بهرنیو چارو وزارت سیاسي مرستیال عباس ستانکزي ویلي وو چې دا د شریعت لار نه؛ بلکې د طالبانو خپل طبیعت دی.
د ملي امنیت پخواني رییس رحمت الله نبیل د طالب چارواکو یو لیست خپور کړی او ویلي یې دي، چې ښایي راتلونکي کې د دغو کسانو د نیولو حکم هم صادر شي.
په یادو کسانو کې عبدالحکیم شرعي، مولوي عبدالوحید طارق، شیخ فریدالدین محمود، نورمحمد ثاقب، مولوي حبیبالله آغا، مولوي اخترمحمد زعفراني، شیخ مولوي نصرالله، شیخ عبدالرازق، مولوي ندا محمد ندیم، شیخ محمد خالد حنفي، ملا صمد ثاني، حاجي فیضالله، حاجي نورمحمد او حاجي ملا نورمحمد شامل دي.
دا په داسې حال کې ده چې تېره ورځ د جرمونو نړیوالې محکمې د طالبانو حکومت مشر شیخ هبتالله اخوندزاده او د محکمې رییس عبدالحکیم حقاني د نېولو حکم صادر کړ.
د طالبانو حکومت د دوی د مشر شیخ هبتالله اخوندزاده او د سترې محکمې د رییس عبدالحکیم حقاني نیولو په اړه د جرمونو نړیوالې محکمې حکم ته غبرګون ښودلی.
د طالبانو حکومت د بهرنیو چارو وزارت یوې اعلامیه کې ویلي چې د جرمونو نړیواله محکمه دې د بشري حقونو په اړه خپل تفسیر پر دوی نه تحمیلوي.
اعلامیه کې راغلي چې د دوی پر مشر او د سترې محکمې پر رئیس لګول شوي تورونه بې بنسټه او دا یو “دوګونی چلند او سیاسي هڅول شوې” موضوع ده.
دوی د کریم خان له لوري د جرمونو نړۍوالې محکمې ته د شیخ هبتالله د نیولو غوښتنلیک سپارل غندلي دي.
افغانستان کې د یوناما مشرې روزا اتونبایووا د نجونو پر زده کړو د بندیز دوام یوه تراژیدي بللې.
روزا اوتونبایوا د زده کړې د نړیوالې ورځ په مناسبت ویلي چې دوی په دې اړه ژوره اندېښنه څرګندوي.
د هغې په خبره، هیڅ هېواد کې تر اوسه له واک ته رسېدو وروسته ښځې له کار او زده کړو نه دي منع شوې.
د یادنې ده چې له درې کالو زیاته موده کېږي چې د افغان نجونو او مېرمنو پر مخ د زده کړو او کار دروازې بندې دي.
د طالبانو حکومت مشر شیخ هبت الله اخوندزاده وایي، ملایانو ته نړۍ حیرانه ده؛ ځکه په خبره یې دوی که د ماښام ډوډۍ هم ونه لري، بیا هم په دومره غیرت وخت تېروي چې ته به وایې ټوله نړۍ یې په قواله ده.
د شیخ هبت الله په خبره، ملایان نورو ته د خیر رسولو په لار کې لوږه او تکلیف تېروی شي.
هغه ویلي، زمونږ هدف د اسلام او قران ساتنه ده.
نوموړي یو ځل بیا د خپل حکومت په غړو غږ کړی چې له اختلاف څخه لاس واخلي.
ښاغلي اخوندزاده زیاته کړې، کوم اسلام چې په کلیوالو مدرسو او جوماتونو کې تدریس شوی هماغه اسلام نن په افغانستان واکمن دی.
د افغانستان د دیموکراسۍ او بشري حقونو سازمان د جرمونو نړیوالې محکمې د هغې حکم هرکلی کړی، چې د طالبانو حکومت د مشر او د سترې محکمې د رییس د نیولو لپاره یې کړی.
دغه سازمان په یوه خبرپاڼه کې ویلي چې دا چاره د افغانانو د بشري حقونو تامین لپاره خورا مهمه ده.
یاد سازمان دغه راز ټینګار کړی، چې د بشري حقونو په برخه کې باید نړۍ د افغانانو غږ هیر نه کړي.
خبرپاڼه کې راغلي چې دا لحظه د ټولو افغان نسلونو لپاره مهمه ده.