د پخواني ولسمشر حامد کرزي د دفتر مشر کریم خرم وايي، چې نظامونه تر یوې ټاکلې مودې پورې د اصلاحاتو لپاره وخت لري؛ خو که دا فرصت یې له لاسه ورکړ؛ نو بیا اصلاحات بې ګټې دي.
هغه د طالبانو حکومت ته په کنایوي ډول ویلي، وړاندې تر دې چې ناوخته شي؛ پیاوړي نظامونه خپل ځانونه اصلاح کوي.
نوموړي زیاته کړې، کله چې د ولس باور پای ته ورسیږي؛ نو بیا اصلاحات هم کومه پایله نه لري.
دا په داسې حال کې ده، چې په دې وروستیو کې د نجونو د زده کړو په اړه د طالبانو حکومت له سختو نیوکو سره مخ دی.
د برېټانیا دولت وايي، د هغو افغان کډوالو قضیې نه مني، چې اوس مهال په پاکستان کې ایسار دي.
ډیلي ټېلګراف ویلي، د امریکا له لوري د دوی د غوښتنو له نه منلو وروسته، دا کډوال برېټانیا ته د تګ لپاره هیله من شوي وو؛ خو د دغه هېواد د دوی قضیې رد کړې دي.
د ټرمپ حکومت د ۱۶۶۰ هغو افغان کډوالو پروزاونه لغوه کړل، چې امریکا ته د تګ لپاره په نورو هېوادونو کې مېشت وو.
بل لورته بیا پاکستان کې یاد کډوال د دغه هېواد د پولیسو له ناوړه چلند شکایت کوي.
د کرکټ نړیوالې شورا افغان لوبغاړی عظمت الله عمرزی د ۲۰۲۴ کال غوره الرونډر لوبغاړی اعلان کړ.
هغه ته په ان لاین بڼه رایه اچونه کېدله.
عظمت عمرزی د افغان لوبډلې له منځه د یوازیني لوبغاړي په توګه دغې سیالۍ ته نوماند وو.
۲۴ کلن عمرزي په ۲۰۲۴ کال کې له رحمن الله ګربز وروسته دویم ډېر منډه جوړونکی او له الله محمد غضنفر وروسته دویم افغان لوبغاړی دی چې تر ټولو ډېرې وېکټې یې اخیستې دي.
د طالبانو حکومت د لوړو زده کړو وزارت له پاکستان سره د هوکړې په اړه هغه راپورونه رد کړل چې افغان ښځینه محصلینو ته یې د تحصیلي بورسونو د ورکړې په اړه کړې وه.
دغه وزارت په یوه خبرپاڼه کې ویلي چې د لوړو زده کړو وزارت ټینګار کوي چې دا خبر حقیقت نه لري او تر اوسه افغان ښځینه محصلینو ته د تحصیلي بورسونو د ورکولو په اړه د پاکستان په ګډون له کوم هېواد سره هوکړه نه ده شوې.
یاد وزارت په دې برخه کې د طالبانو حکومت د همغږۍ خبره بې اساسه او تبلیغاتي بللې ده.
د یادونې ده چې په دې وروستیو کې د افغانستان په چارو کې د پاکستان ځانګړي استازي محمد صادق اعلان وکړ چې د ۵۰۰۰ نجونو په ګډون څه باندې ۲۰ زره کسانو د پاکستان د بورسونو لپاره نوم لیکنه کړې ده.
د امریکا سنا کریستي نوم د دغه هېواد د کورني امنیت د وزیرې په توګه ومنله.
هغې له سنا څخه ۵۹ موافقې او ۳۴ مخالفې رایې تر لاسه کړې وې.
۵۳ کلن نوم تر دې وړاندې د کډوالو او امریکا د پولو په اړه د ټرمپ د دریځ ملاتړې وه او تمه کېږي، چې نوموړې به د امریکا د پولو امنیت خوندیتوب ته خپل پام زیات کړي.
کریستي نوم د ټرمپ له وفادارو ملګرو څخه ګڼل کېږي.
د امریکا ولسمشر ډونالډ ټرمپ ویلي، چې اوس مهال له یو شمېر سوداګرو سره د ټک ټاک کمپنۍ د اخیستو په اړه خبرې کوي او په راتلونکې یوه میاشت کې به په دې اړه پرېکړه وکړي.
نوموړي زیاتوي، په دې اړه یې له زیاتو پانګوالو سره خبرې کړې او لېوالتیا هم ورته زیاته ده.
تر دې وړاندې رویټرز راپور ورکړی و، چې د ټرمپ حکومت د ټک ټاک کمپنۍ اخیستلو په اړه غور کوي.
د پخواني حکومت لومړي مرستیال امرالله صالح وايي، چې د طالبانو هر څه د ټرمپ له امضا، رحم او شفقت سره تړلي.
ښاغلي صالح پر خپله ایکسپاڼه لیکلي، پر طالبانو د ټرمپ د مرستو له بندېدو سره سم، د دولتي کارکوونکو معاشونه هم وځنډول شول.
د صالح په خبره، دولتي کارکونکي راتلونکو درې میاشتو پورې له معاش څخه بې برخې شوي دي.
دا په داسې حال کې ده، چې اوس وخت کې د طالبانو حکومت خپلو کارکونکو ته ویلي چې تر نامعلوم وخت پورې د معاشونو غوښتنه ونه کړي.
د امریکا د ولسمشر مرستیال، جيډي وېنس د ډونالډ ټرمپ د هغه پرېکړې ملاتړ کړی چې د افغان کډوالو د لېږد پروګرام یې وځنډوه.
جيډي وېنس له CBS شبکې سره په مرکه کې ویلي، چې د ځینو کډوالو دوسیې امریکا ته تر راننوتلو مخکې په سمه توګه نه دي ارزول شوي.
هغه ویلي، چې د کډوالو د دوسیو نه ارزولو او امریکا ته د ننوتلو موضوع د دوی جدي اندېښنې را ولاړې کړي دي.
نوموړي زیاته کړې، چې زه نه غواړم چې زما ماشومان په داسې سیمه کې ژوند وکړي چې خلک یې پرته له لازمې ارزونې موجود وي او په وینا یې څرنګه چې دا وضعیت زه د خپلو ماشومانو لپاره نه غواړم، د نورو امریکايي وګړو لپاره هم د منلو نه ده.
د یادونې ده چې واک ته د ډونالډ ټرمپ له رسېدو وروسته د څه باندې ۴۰ زرو افغانانو الوتنې یې وځنډولې.
د کاناډا د بهرنیو چارو وزیرې میلاني جولي ویلي، چې د طالبانو له بنده خوشي شوي کاناډايي سرتېري سره یې خبرې شوې دي او هغه قطر ته رسېدلی دی.
میلاني جولي له قطري چارواکو مننه کړې چې په دې برخه کې یې هڅه کړې.
نوموړې ویلي، چې د ازاد شوي بندي ډېوېډ لاوري وضعیت اوس مهال ښه دی.
د یادونې ده، چې ډېوېډ لاروي د تېر کال په نومبر کې نیول شوی وو.
د پاکستان د پښتونخوا ملي عوامي ګوند مشر محمود خان اڅکزی وایي، د پاکستان د پارچه کېدو پلوي نه دی؛ خو دغه هېواد که د افغانستان په چارو کې لاسوهنه وکړي؛ نو دی به یې مقابله وکړي.
محمود خان اڅکزی وایي اوس مهال د افغانستان د ستونزو لومړیتوب د نجونو زده کړې نه دي.
هغه ویلي، چې په افغانستان کې د نجونو له زده کړو ډېر لوی مشکلات شته او اول باید هغه حل شي.
نوموړی زیاتوي، چې د دوی ګوند له هر هغه چا ملاتړ کوي چې افغانستان کې واک ترلاسه کوي.
هغه دغه راز له افغان کډوالو سره د پاکستان د حکومت چلند ته په اشارې سره ویلي، چې پاکستان باید هغو افغان کډوالو ته د زیږون سندونه ورکړي چې په دغه هېواد کې زېږېدلي او لوی شوي دي او په خبره یې که دا کار ونه شي، دوی به نړیوالو محکمو ته مراجعه وکړو.