د سپینې ماڼۍ ویاندې، کارولین لویت، اعلان کړی چې د امریکا ولسمشر د اوکراین د جګړې د پای ته رسولو لپاره جدي هڅې کوي.

لویت ویلي چې ولسمشر باور لري روسیه د سولې موافقې ته د رسېدو لپاره چمتو ده.

هغې ویلي، چې د ملي امنیت سلاکار، مایک والتز، به د اوونۍ د رخصتیو ټول وخت د مذاکراتو د چټکتیا او د جګړې د پای ته رسولو لپاره کار وکړي.

هغې ویلي، چې د امریکا ولسمشر خپل اساسي هدف د سولې ترلاسه کول او د بې‌ګناه خلکو د وژنو درول بللي دي.

نوموړې زیاته کړې چې د اوکراین د حیاتي معدني موادو د موافقې لپاره خبرې اترې دوام لري، چې دا به د اوکراین بیارغونې ته وده ورکړي.

د هغې په وینا، ټرمپ هیله لري چې د اوکراین جګړه به د اوونۍ تر پای پورې د یوې موافقې له لارې ختمه کړي.

د اسراییل لومړي وزیر بنیامین نتانیاهو اعلان کړی چې د فلسطیني بندیانو خوشې کول به تر هغه وخته وځنډول شي، ترڅو چې حماس د اسراییلي یرغمل شوو کسانو “تحقیر آمیز مراسم” پای ته ونه رسوي.

د نتانیاهو دفتر ویلي چې حماس مکرراً د اوربند تړون نقض کړی او د یرغمل شوو کسانو له ازادۍ تبلیغاتي استفاده کوي.

له جنورۍ راهیسې، حماس ۲۵ اسراییلي یرغمل شوي کسان د عامو مراسمو له لارې خوشې کړي، چې په ترڅ کې یې هغوی مجبور شوي خلکو ته لاس وښوروي او خبرې وکړي.

د شنبې په ورځ، شپږ اسراییلي یرغمل شوي کسان ازاد شول، او اسراییل ټاکل شوې وه چې په بدل کې له ۶۰۰ زیات فلسطیني بندیان خوشې کړي.

نتانیاهو د یکشنبې په ورځ اعلان وکړ چې د فلسطیني بندیانو خوشې کول به تر هغه وخته وځنډوي، ترڅو چې حماس د دې مراسمو ترسره کول بند نه کړي.

د امریکا ولسمشر ډونالډ ټرمپ یو ځل بیا ویلي، چې په افغانستان کې د امریکا پاتې پوځي تجهیزات باید بېرته ونیول شي.

هغه ویلي چې امریکا هر کال افغانستان ته میلیاردونه ډالر مرسته ورکوي، په داسې حال کې چې خپله دې پیسو ته اړتیا لري.

نوموړي ټینګار کړی که دا مرستې دوام مومي، طالبان باید د امریکا پاتې تجهیزات بېرته وسپاري.

د ټرمپ په وینا، طالبان دا وسلې پلوري او پرمختللي تجهیزات لري چې حتی له امریکايي وسلو هم نوي او ښه دي.

دا لومړی ځل نه دی چې ټرمپ د افغانستان د پاتې شویو تجهیزاتو د بېرته نیولو غوښتنه کوي، هغه د خپلې ټاکنیزې مبارزې پر مهال هم څو ځله دا موضوع یاده کړې وه.

بل لورته ته د طالبانو حکومت ویاند، ذبیح‌الله مجاهد څه وخت وړاندې ویلي و چې د ټرمپ څرګندونې یوازې انتخاباتي شعارونه دي او په عملي بڼه به هېڅ نه وشي.

‏د طالبانو حکومت د رییس الوزرا اقتصادي مرستیال ملا عبدالغني برادر ازبېکستان ته په خپل سفر کې د دغه هېواد له لومړي وزیر، عبدالله عارف اوف سره لیدلي دي.

د طالبانو حکومت د رییس الوزرا د اقتصادي معاونیت په یوې خبرپاڼې کې ویلي، چې په دې لیدنه کې ملا بردار ازبېکستانی لوری په افغانستان کې ګڼو لویو پروژو کې پانګونې ته رابللی.

خبرپاڼه زیاتوي چې ملا برادر په دې ناسته کې ډاډ ورکړی چې د نشه يي توکو د کرکېلې له مخنیوي وروسته یې مرکزي اسیا هېوادونو ته د نشه يي توکو د قاچاق مخه هم نیولې ده.

خبرپاڼه کې دغه راز راغلي، چې په دې ناسته کې ښاغلي عارف اوف هم له افغانستان سره د اقتصادي اړیکو پر پراخوالي ټینګار کړی دی.

د امریکا مرکزي قومندانۍ یا سنتکام اعلان کړی چې د سوریې په شمال لویدیځ کې د هوایي برید په ترڅ کې د «حراس‌الدین» ډلې لوړپوړی مشر، وسیم تحسین بیرقدار یې وژلی دی.

دا برید د کب ۳مه ترسره شوی او د امریکا او د هغې د سیمه‌ییزو شریکانو د هڅو یوه برخه بلل شوې، چې د ترهګرو د بریدونو مخنیوی وکړي.

د سنتکام قوماندان، جنرال مایکل اریک کوریلا، ویلي چې امریکا به د ترهګریزو ګواښونو پر ضد عملیاتو ته دوام ورکړي.

«حراس‌الدین» د القاعدې یوه څانګه ده، چې په شمال لویدیځه سوریه کې فعاله ده او د ګڼو بریدونو مسؤلیت لري.

امریکا تر دې وړاندې هم د القاعدې او د هغې اړوندو ډلو پر مشرانو هدفمند هوایي بریدونه کړي، چې دا د واشنګټن د اوږدمهاله ستراتیژۍ یوه برخه ده.

د ایران تسنیم خبري اژانس خبر ورکړی، چې د روسیې د بهرنیو چارو وزیر سرګي لاوروف تهران ته سفر کوي.

د سرچینې د معلوماتو له مخې، دواړه لوري به د سوریې په اړه خبرې وکړي.

د یادونې ده چې لاوروف تر دې وړاندې سعودي ته سفر کړی و، چې هلته یې د امریکا د بهرنیو چارو وزیر مارک روبیو سره لیدلي وو.

د چین هېواد یو پلاوي د سوریې د انتقالي حکومت له ولسمشر احمد الشرع او بهرنیو چارو وزیر سره لیدلي دي.

د سوریې حکومت د یادې لیدنې خبر ورکړی.

دا لیدنه داسې مهال ترسره کېږي، چې چین تر دې وړاندې پر سوریې د بندیزونو لرې کولو په اړه اندېښنه ښودلې وه.

یاده دې وي، چې چین د بشارلاسد حکومت پلوی بلل کېده.

د تېر جمهوري حکومت لومړي مرستیال امرالله صالح د اوکراین ولسمشر ولادیمیر زیلنسکي ته یو لیک کې لیکلي، چې تاسې اوس په امریکا بوج یاست او د هغوی په وعدو باید ونه غولیږئ.

نوموړي ویلي، دا چې امریکا درته وایي:«ترپایه به درسره یوو، معنی دا، چې ستاسې د پای شاهدان به یوو.»

صالح زیاته کړې، زیلنسکي باید اروپا باندې هم باور ونه کړي، ځکه امریکا یې وایي او اروپا عمل کوي.

صالح په لیک کې وړاندې ویلي، چې که زیلنسکي په دې اړه توضیحات غواړي، نو ده ته دې مسیج وکړي، چې هر څه ورته ووایي.

صالح دغه راز ویلي، چې دا هغه درس دی، کوم چې دوی له ډېرو سختیو وروسته اخیستی.

د طالبانو حکومت د اقتصادي مرستیال ملا عبدالغني برادر په مشرۍ ازبېکستان ته تللي پلاوي د یاد هېواد د لومړي وزیر له مرستیال جمشید خوجه یوف سره لیدلي دي.

د طالبانو حکومت له اقتصادي معاونیت څخه خپره شوې خبرپاڼه کې راغلي، چې دواړو لوریو په دې لیدنه کې د سوداګریزو او ترانزیټي اړیکو پر پراختیا او همدا راز په افغانستان کې د ازبېکستاني پانګوالو پر پانګونې خبرې وکړې.

خواجه‌یوف ویلي تاشکند چمتو دی چې له کابل سره د سوداګریزو اړیکو د پراخولو په موخه د دواړو هېوادونو ترمنځ په سرحد کې ګډ سوداګریز زون رامنځته کړي.

نوموړي دغه راز افغانستان کې د خپل هېواد پانګوالو له لوري پانګونې په برخه کې هم ډاډ ورکړی.

په همدې حال کې ملا برادر ازبېکستاني لوري ته په افغانستان کې د هر ډول اسانتیاوو ډاډ ورکړی.

بامیانو کې د مرغیو د ښکار په تور لس کسان نیول شوي.

د یاد ولایت د طالبانو امنیه قومنداني وایي، چې دغه کسان په کهمرد ولسوالۍ کې نیول شوي دي.

له یادو کسانو څخه لس میله‌ چره‌ایز او یو میل بادي ټوپک هم اخیستل شوی.

نیول شوي کسان اوس مهال تر پوښتنو لاندې دي.