د امریکا ولسمشر ډونالډ ټرمپ د دغه هېواد له دفاع وزیر غوښتي، چې له افغانستان څخه د امریکایي ځواکونو د وتلو مسئله کې ټول ښکېل امریکایي جنرالان له دندې لرې کړي.
نوموړي دا څرګندونې د کابینې ناسته کې کړې دي.
هغه یو وار بیا له افغانستان څخه د امریکایي ځواکونو د اېستلو بهیر ناکام بللی.
د طالبانو حکومت د کډوالو او بېرته راستنېدونکو چارو وزارت سرپرست مولوي عبدالکبیر وایي، د ګاونډیو هېوادونو له لوري په جبري ډول د افغان کډوالو راستنېدو پر کډوالو د مرستو د وېش بهیر هم اغېزمن کړی دی.
هغه د چین له سفیر سره خبرو کې له مرستندویه بنسټونو غوښتي، چې د کډوالو لپاره د ښار ګوټو جوړولو کې ورسره مرسته وکړي.
په ورته مهال د چین سفیر ژاو شینګ ویلي چې هېواد یې له کډوالو سره مرستو ته چمتو دی.
اسرائیل سل فلسطیني بندیان نن مصر ته لېږلي.
دا د حماس او اسرائیل ترمنځ د بندیانو د تبادلې لړۍ ده؛ خو د رویټرز د راپور له مخې، یاد کسان به تر هغه په مصر کې پاتې وي، چې بل هېواد یې منلو ته غاړه نه وي ایښي.
تر دې وړاندې بیا حماس د اسرائیلي وګړو څلور جسدونه دغه هېواد ته سپارلي وو.
له انګلستان څخه تر سیالۍ ګټلو وروسته، د افغانستان لپاره د برېتانیا سفیر رابرت ډیکسن ویلي، هیله لري چې د افغان ښځو ټیم هم لوبې ترسره کړي.
هغه ویلي، افغان لوبډلې ته مبارکي وایي، خو په دې تمه دی، چې ژر تر ژره د افغان ښځو لوبډله هم میدان کې وویني.
د یادونې ده چې افغان لوبډلې تېره شپه انګلستان ته تاریخي ماتې ورکړه.
دا سیالۍ له دې کبله هم جالبه وه، چې تر دې وړاندې له افغان لوبډلې سره د انګلستان د لوبې لغوه کولو لپاره خورا کمپاین شوی و.
د طالبانو حکومت د صنعت او سوداګرۍ وزیر، نورالدین عزیزي، وایي چې د هېواد ځانبسیاینه او د خلکو لپاره غوره خدمتونه د دوی اساسي هدف دی.
نوموړي د خصوصي سکتور له استازو سره په ناسته کې ویلي، چې د صادراتو او وارداتو ترمنځ به توازن رامنځته کړي.
عزیزي ادعا کړې، چې د طالبانو تر واکمنۍ وروسته، افغانستان د ترانسپورتي سیستم په برخه کې پرمختګ کړی.
هغه ویلي، چې د صادراتو او وارداتو توازن به د افغانستان اقتصاد پراخ کړي او د پولې د ثبات لامل به شي.
د طالبانو حکومت داسې مهال د خپلو اقتصادي لاستهراوړنو ادعا کوي، چې د افغانستان میلیونه ځوانان د فقر او بېکارۍ له امله د مهاجرت په سختو لارو کې خپل ژوند له لاسه ورکوي.
د سعودي عربستان د بهرنیو چارو وزارت په یوه بیان کې د اسرائیل د چهارشنبې شپې برید پر سوریه غندلی او له نړیوالې ټولنې یې غوښتي چې د اسرائیل اقدامات ودروي، ځکه چې دا کار سیمه بېثباته او ناامنه کوي.
په دې بیان کې د اسرائیل پرلهپسې بریدونه پر سوریه په کلکه غندل شوي دي.
د سعودي عربستان د بهرنیو چارو وزارت د سوریې له حکومت او خلکو سره خپله همدردي او پیوستون څرګند کړی دی.
د افغانستان پخواني ولسمشر اشرف غني ټولو هېوادوالو ته د کرکټ مبارکي ویلې.
پخواني ولسمشر په خپله ایکس پاڼه لیکلي،:” دا بری چې د نړۍ پر یوې ډېرې پیاوړې لوبډلې ـ انګلستان مو ترلاسه کړه، ستاسې د ټینګار او هیله مندۍ نښه ده چې ملت ته په سختو شېبو کې د هیلو څرک راوړي.”
ښاغلي غني د دې بریا په اړه د کرکټ اتلانو، هېوادوالو او په ځانګړې توګه د کرکټ مینوالو ته له ولولو د ډکې مبارکۍ په رسولو پیغام خپور کړی دی.
د پښتون ژغورنې غورځنګ مشر منظور پښتین د لوبې ګټلو مبارکي ټولو افغانانو ته ویلې.
ښاغلي منظور پښتین په خپله ایکس پاڼه لیکلي: “د انګلستان پر خلاف د اتلانو بریا دې ټولو ته نیکمرغه وي.”
نن افغان کریکټ لوبډلې د چمپینز ټرافي سیالیو کې د انګلستان لوبډلې ته ماتې ورکړه.
د ویانا ناسته کې د عطا محمد نور خبرو د هېواد د ملي امنیت پخواني سلاکار ډاکټر رنګین دادپر سپنتا غبرګون راپارولی.
دادفر سپنتا ویلي، هغو خلکو ته باید احترام وشي، چې د موخو لپاره جنګیږي.
نوموړي عطا محمد نور ته په خطاب کې ویلي، مخکې له دې، چې بې ځایه څرګندونې وکړې، باید اول څېړنه وکړې.
د یادونې ده چې عطا محمد نور په هغو کسانو سخته نیوکه کړې چې په افغانستان کې د روانې کشالې حل لاره جګړه بولي.
جمهوري حکومت کې د اوبو او انرژۍ وزیر خان محمد تکل له انګلستان څخه د کرکټ لوبې د ګټلو مبارکي ویلې.
تکل ویلي، دا ښه خبر دی، چې د افغانستان کرکټ لوبغاړو د اتلانو جام سیالیو کې د کرېکټ بنسټګر(انګلستان) ته ماتې ورکړه.
نوموړي د افغان کرکټ لوبغاړي، د هېواد ريښتیني اتلان بللي دي.