د طالبانو حکومت د مشر شیخ هبت‌الله اخړندزاده په فرمان یو لړ ټاکنې تر سره شوې دي.

په دغو ټاکنو کې د تخار مخکنی والي مولوي عبید ﷲ امین زاده، دکار او ټولنیزو چارو وزارت دټولنیزو چارو معین په توګه، دکانونو او پترولیم وزارت د پلان او پالیسۍ مخکنی معین شیخ ضیاء الرحمن اریوبي؛ د لوړو زده کړو وزارت دعلمي معین په توګه، د افغانستان بانک د نظارت مخکنی آمر شیخ عبد الرحمن قانت؛ دکانونو او پترولیم وزارت دپلان او پالیسۍ معین په توګه، د کندهار مخکنی امنیه قومندان مولوي سمیع ﷲ حزب ﷲ؛ د تخار د والي په توګه، د هلمند ولایت مخکنی والي مولوي عبدالاحد طالب؛ د کندهار ولایت د امنیه قومندان په توګه، د لوړو زده کړو وزارت مخکنی علمي معین لطف ﷲ خیرخواه؛ د افغانستان بانک د نظارت د آمر په توګه ټاکل شوي دي.

نیویارک ټایمز لیکلي، چې د امریکا ولسمشر ډونالډ ټرمپ په پټه په منځني ختیځ کې خپل ځانګړي استازي سټیو ویتکاف ته دنده سپارلې چې د روسیې او اوکراین ترمنځ د خبرو اترو د اسانتیا چارې پر مخ یوسي.

نیویارک ټایمز د یو شمېر سرچینو له قوله ادعا کړې، چې ویتکاف روسیې ته تر سفر مخکې د ولادیمیر پوتین له نژدې متحدانو سره خبرې کړې دي.

نیویارک ټایمز ته سربېره پر دې، د امریکا د حکومت ځینو لوړپوړو چارواکو، چې نومونه یې نه دي افشا شوي، ویلي چې دوی د پوتین او ټرمپ د خبرو پخلی نه‌شي کولی.

داعش ډلې کندز کې د تېرې ورځې د ځان مرګي برید مسؤلیت منلی دی.

یادې ډلې ویلي، چې برید د دوی له لوري پر طالبانو او د هغوی پر یو شمېر قومندانانو شوی.

که څه هم دوی د مرګ ژوبلې کره شمېر نه ده ښودلی؛ خو ویلي یې دي چې برید کې یې د طالب قومندانانو په ګډون سلګونه طالبان وژلي.

بل لورته بیا د طالبانو حکومت ویلي، چې دغه برید کې د پولیسو په ګډون پنځه تنه عام وګړي وژل شوي.

دا برید تېره ورځ کندز کې د کابل بانک مخ ته شوی وو.

په سویس کې د افغانستان اماني صندوق د مدیره هیئت غړي انوار الحق احدي د اقتصادي او مالي بحران د شدت په اړه خبرداری ورکړی دی.

ښاغلي احدي ویلي، که د نړیوالو مرستې بندې شي او طالبان اصلاحات رامنځته نه کړي؛ نو د افغانستان اقتصادي وضعیت به لا خراب شي.

نوموړي زیاته کړې، چې د طالبانو د حکومت کلني عواید له دوو میلیاردو ډالرو اوړي، چې د بهرنیو مرستو پرته د دولتي مامورینو د معاشونو ورکړه ستونزمنه ده.

هغه داخلي اختلافات، اقتصادي بحران او نړیوال انزوا د رژیمونو د سقوط اصلي لاملونه یاد کړل.

د یادونې ده، چې په هېواد کې د امریکا د مرستو له بندېدو وروسته لسګونه نړیوالې پروژې درېدلې او زرګونه کسان بې‌کاره شوي دي.

د مصر ولسمشر عبدالفتاح السیسي د غزې د بیا رغونې غوښتنه وکړه، خو د فلسطینیانو د بې‌ځایه کېدو مخالفت یې وکړ.

نوموړي د ډنمارک له صدراعظم سره په ټلیفوني خبرو کې د فلسطینیانو د حقونو د تضمین غوښتنه وکړه.

د یادونې ده چې د امریکا ولسمشر ډونالډ ټرمپ د غزې د نیولو او د اوسېدونکو د ګاونډیو هېوادونو ته د لېږدولو وړاندیز کړی.

بل لورته د اردن پاچا عبدالله هم د دې وړاندیز مخالفت کړی او خپل دریځ یې څرګند کړی.

په ورته وخت کې ټرمپ خبرداری ورکړی که مصر او اردن د غزې خلک ونه مني، نو د امریکا مرسته به پرې ودروي.

د اسراییل لومړي وزیر بنیامین نتنیاهو ویلي، که حماس تر شنبې غرمه ټول یرغمل نیول شوي کسان خوشې نه کړي، اسرائیل به په غزه کې جګړه بیا پیل کړي.

تر دې وړاندې د حماس د سیاسي دفتر غړي، حسام بادران، ویلي و چې د غزې د توافق دوام په بشپړ ډول د اسرائیل پر کړنو پورې تړلی دی.

د یادونې ده چې د امریکا ولسمشر ډونالډ ټرمپ هم ګواښ کړی که حماس تر شنبې اسراییلي بندیان خوشې نه کړي، د غزې اوربند د لغوه کېدو وړاندیز به وکړي.

یوې باوري سرچینې حماسه میډیا ته ویلي، چې طالب استخباراتو د کابل هوایي ډګر کې دوحې غونډې ته د ۱۴ کسیزې ډلې د سفر مخه نیولې او دغه کسان یې له ځان سره بیولي دي.

سرچینې د نوم نه اخیستو په شرط ویلي، چې دا ډله ټاکل شوې وه نن «د افغانستان راتلونکي فکر فورم» په غونډه کې د ګډون لپاره دوحې ته لاړه شي.

سرچینې دغه راز ویلي، چې لطیف نظري، فیض محمد ځلاند، عزیز احمد حنیف، نظر محمد مطمئن، انجیلا احمدي او مدینه محبوبي د هغو کسانو په ډله کې دي چې دوحې ته له سفر کولو منع شوي او استخباراتو له ځان سره وړي دي.

د یادونې ده، چې «د افغانستان راتلونکي فکر فورم» یو بنسټ دی چې ۳۰ غړي لري او په دې بنسټ کې د پخواني حکومت مامورین، د مدني ټولنې فعالان او د پوهنتون استادان شامل دي.

د پکتیا پخواني والي محمد حلیم فدایي د کندز د نننۍ پیښې په تړاو ویلي، طالبانو همیش د سرتاسري امنیت ټینګېدو دعوه کړې؛ خو دا ځل یې بیا ترې لار غلطه کړې.

ښاغلي فدایي په خپله ایکس پاڼه لیکلي، په افغانستان کې د وسله والو ډلو انتحار او انفجار که څه هم طالبان نه مني؛ خو داسې پیښې د دوی دروغ ثابتوي او په وینا یې که قانع کولو ته مجبور شي د خپلو سرتیرو د مرګ ژوبلو شمیر بیخي کم ښایي.

هغه طالبانو ته ویلي:« ترڅو ولسي همدردي راجلب نکړئ ولس پوهېږي چې د دې ټولو بدبختیو سبب ستاسو انحصاري، استبدادي، حذف، افراطیت دیکتاوري او بې عدالتي ده.»

د طالبانو حکومت په ملګرو ملتونو کې د پاکستان د استازي هغه څرګندونې رد کړې چې ګواکې ترهګرې ډلې افغانستان کې پټنځایونه لري.

د طالبانو حکومت د بهرنیو چارو وزارت یوه اعلامیه کې ویلي، چې د دوی له واکمنېدو وروسته ټولې ترهګرې ډلې ختمې شوې او که افغانستان کې کومه امنیتي پېښه شوې وي؛ نو له پولې پورې غاړې څخه سرچینه اخلي.

اعلامیه کې سره له دې، چې د کوم هېواد نوم نه دی اخیستل شوی؛ خو ویل شوي چې یو شمېر هېوادونه د خپلو کورنیو ستونزو ملامتي پر دوی ور اچوي.

د طالبانو حکومت رئیس الوزرا کندز کې د ننني ځانمرګي برید له کبله د قربانیانو کورنیو ته تسلیت وړاندې کړی.

د ریاست الوزرا څخه خپره شوې خبرپاڼه کې راغلي چې دا برید د اسلام او بشر دوښمنانو له لوري شوی.

خبرپاڼه کې په هېواد کې د سولې او امن غوښتنه شوې.