د طالبانو حکومت د عامې روغتیا وزارت وایي، په کابل کې د سرطان ناروغیو لومړنی ۲۰۰ بستریز روغتون به ډېر ژر فعاله شي.
د عامې روغتیا وزارت ویلي، چې سرپرست وزیر نورجلال جلالي د دې روغتون د جوړېدو چارې له نږدې وکتلې.
ښاغلي جلالي ویلي، چې د روغتیا وزارت د سرطان د ناروغانو درملنې ته ځانګړې پاملرنه لري.
یاد وزارت دغه راز ویلي، چې ددې روغتون لپاره د پرمختللو طبي وسایلو برابرولو او د کارکوونکو د ظرفیت لوړولو ځانګړي پلانونه په پام کې نیول شوي دي.
د ایران د بشري حقونو سازمان راپور ورکړی چې د لرستان په بروجرد زندان کې چارواکو د یوه افغان زنداني د اعدام سزا په پټه او د کورنۍ له خبرولو پرته ترسره کړې ده.
دغه سازمان ویلي چې افغان زنداني سلمان همدرد پرون چهارشنبه پرته له دې چې له خپلې کورنۍ سره وروستی ملاقات وکړي، اعدام شوی دی.
د بشري حقونو سازمان د دغه افغان زنداني هویت ۳۰ کلن او نوم سلمان همدرد یاد کړی چې د افغانستان د ارزګان ولایت اوسېدونکی و.
د راپور په وینا، سلمان درې کاله وړاندې د ایران د امنیتي ځواکونو له خوا د «مخدره موادو د لېږد» په تور نیول شوی و او وروسته د ایران د عدلي ارګان له لوري په اعدام محکوم شو.
د ترکیې پخواني لومړي وزیر داوود اوغلو ترکیه د عثماني امپراتورۍ قانوني وارث وباله او د غزې اوسېدونکي یې د ترکیې طبعي هېوادوال وبلل.
داوود اوغلو وړاندیز وکړ چې د غزې تړانګه باید د ترکیې له جمهوریت سره د یوه خودمختاره سیمې په توګه وصل شي.
هغه غوښتنه وکړه چې د دې پرېکړې لپاره دې د غزې په خلکو ټولپوښتنه ترسره شي.
داوود اوغلو دغه راز ویلي، چې فلسطینیانو تر اوسه په خپل تاریخ او وجدان کې د عثماني هویت ساتلی دی.
هغه د امریکا د ولسمشر ډونالډ ټرمپ د فلسطینیانو د بیا مېشتېدو او د غزې د بیا رغونې په اړه څرګندونې وغندلې.
داوود اوغلو ټینګار وکړ چې ټرمپ یوازې د ګازو او سمندري سرچینو په ترلاسه کولو پسې دی او د غزې سره هېڅ علاقه نه لري.
د طالبانو حکومت د کور او ښار جوړولو وزارت ویاند، محمد کمال افغان وایي، چې ځانمرګي برید کې یو تن وژل شوی او درې نور ټپیان دي.
هغه وایي، چې نن له غرمې مخکې یوه ځانمرګي بریدګر چې غوښتل یې دغه وزارت ته ننوځي، په دروازه کې د ساتونکو له لوري له منځه وړل شوی او چاودنه رامنځته شوې ده.
د طالبانو حکومت د کور او ښار جوړونې وزارت په داخل کې ځانمرګی برید شوی.
د کورنیو چارو وزارت ویاند عبدالمتین قانع رسنیو ته منلې، چې دا برید څو شېبې وړاندې شوی.
تر اوسه د تلفاتو په اړه څه نه دي ویل شوي.
د امریکا د بهرنیو چارو وزیر مارکو روبیو راتلونکې اوونۍ د غزې د اوربند د دویم پړاو د وروستي کولو او د امریکایي یرغمل شویو د خوشې کولو په اړه د خبرو لپاره اسراییل، سعودي عربستان او متحده عربي اماراتو ته سفر کوي.
د امریکا د بهرنیو چارو وزارت ویاندې تامي بروس ویلي، مارکو روبیو به د پنجشنبې په ورځ د مونیخ د امنیتي غونډې او د جي ۷ د بهرنیو چارو وزیرانو په غونډه کې ګډون وکړي.
روبیو به د خپل دوه ورځني سفر په پای کې د دلوې له ۲۷ څخه تر ۳۰ پورې اسراییل، سعودي عربستان او متحده عربي اماراتو ته سفر وکړي.
دا د امریکا د بهرنیو چارو د نوي وزیر لومړنی بهرنی سفر دی چې له پاناما، هندوراس، ګواتیمالا او کوسټاریکا وروسته اروپا او منځني ختیځ ته ترسره کوي.
د دې سفر هدف د اوربند د وروستي کولو او په سیمه کې د امنیتي او سیاسي وضعیت په اړه د خبرو اترو ترسره کول دي.
د امریکا د دفاع وزیر پیټ هېګسټ وایي، د اوکراین بېرته خپلو پخوانیو پولو ته ګرځېدل یوه خیالي موخه ده.
هغه ویلي، چې د دې هېواد د ناتو غړیتوب د جګړې د پای حل لار نه ده.
پیټ هېګسټ ټینګار کړی چې د اوکراین هڅې د له لاسه وتلو سیمو د بېرته نیولو لپاره به جګړه اوږده او زیانونه ډېر کړي.
نوموړي له ناټو متحدینو وغوښتل چې د اروپا امنیت ته زیات پام وکړي.
هغه ویلي، د امریکا لومړیتوب د خپلو پولو امنیت او د چین له احتمالي ګواښونو سره مبارزه ده.
د طالبانو حکومت مشر شیخ هبتالله اخندزاده ویلي، چې د دوی حکومت د هېواد په کچه د زده کړو ټولې اړینې اسانتیاوې برابرې کړي دي.
هغه د لوړو زده کړو وزارت ته سپارښتنه کړې چې د افغانستان د ځوان نسل د روزنې لپاره بهرني متخصص استادان وګوماري او د لوستو کسانو ترمنځ یې پر یووالي ټینګار کړی دی.
په خبرپاڼه کې ویل شوي چې شیخ هبتالله ټینګار کړی چې هر فرمان او امر یې د شریعت مطابق دی او د دیني عالمانو سره په مشوره صادر شوی دی.
هغه زیاته کړې: «که کوم فرمان د شریعت خلاف وي، مه یې منئ.»
د ملګرو ملتونو امنیت شورا د کندز ولایت په مرکز کې د کابل بانک مخې ته شوې چاودنه «تروریستي او وحشیانه» برید بللی او په کلکه یې غندلی دی.
امنیت شورا ویلي، ترهګري د افغانستان او نړۍ لپاره د سولې او امنیت جدي ګواښ دی.
دا چاودنه د سې شنبې په ورځ د کابل بانک مخې ته وشوه، چې داعش یې مسوولیت منلی دی.
د طالبانو د کندز امنیه قومندانۍ ویلي چې برید ځانمرګي بریدګر کړی و، او په دې پېښه کې پنځه کسان وژل شوي او اووه نور ټپیان دي.
بل لورته ځینو ځایي سرچینو د پېښې د تلفاتو شمېر ۱۸ تنه وژل شوی او ۳۰ ټپیان ښودلی دی.
د طالبانو حکومت مشر شیخ هبتالله اخندزاده د لومړي ځل لپاره د کندهار یوه دولتي پوهنتون ته ورغلی او هلته یې له محصلینو او استادانو سره خبرې کړې دي.
د طالبانو حکومت د لوړو زده کړو وزارت په یوه خبرپاڼه کې ویلي، چې شیخ هبتالله د عصري او دیني زده کړو پر اهمیت ټینګار کړی او له محصلینو یې غوښتنه کړې چې د هېواد د خدمت لپاره کار وکړي.
د خبرپاڼې له مخې، شیخ هبتالله اخندزاده استادانو او محصلینو ته د وینا پر مهال ویلي چې د عصري او دیني زده کړو ترمنځ واټن له منځه یوسئ او دواړه زده کړئ.
هغه زیاته کړې: «زه هیله لرم چې د دې هېواد د اتلانو او شهیدانو تاریخ ثبت کړئ او نړۍ ته یې وروپېژنئ. زموږ هېواد نن د دوی د قربانیو په برکت خپلواک دی. تاسو باید د زده کړو له لارې هېواد په نړیواله کچه سیال کړئ او بهرنیان دلته زده کړو ته وهڅوئ.»