د مقاومت په نوم جبهې ادعا کړې چې فراه کې یې پنځه طالب سرتېرو ته مرګ ژوبله اړولې.
یادې ډلې ویلي، دغه برید یې تېره ورځ له غرمې مخکې کړی، چې په پایله کې یې ۲ تنه وژل شوي او ۳ نور ټپیان دي.
د سرچینې د معلوماتو له مخې، دا پېښه د څلورمې حوزې اړوند سیمه کې رامنځته شوې.
د طالبانو حکومت تر اوسه په دې اړه څه نه دي ویلي.
رویټرز راپور ورکړی، چې د امریکا د بهرنیو چارو وزیر مارکو روبیو اسرائیل ته تللی دی.
د سرچینې د معلوماتو له مخې، نوموړی به له لوړپوړو اسراییلي چارواکو سره د حماس او اسرییل ترمنځ د اوربند، بندیانو د تبادلې او پر ایران خبرې وکړي.
په پام کې ده، چې هغه به تر دې وروسته، متحده عربي اماراتو او سعودي عربستان ته هم سفر وکړي.
دا سفر داسې مهال ترسره کېږي، چې وړمه ورځ هم د اسرائیل او حماس ترمنځ بندیان تبادله شول.
د امریکا د بهرنیو چارو وزیر مارکو روبیو د روسیې له بهرنیو چارو وزیر سرګي لاوروف سره تلیفوني خبرې کړي دي.
د امریکا د بهرنیو چارو وزارت ویلي، چې مارکو روبیو په دې تماس کې د اوکراین د بحران د حل لپاره د ډونالډ ټرمپ پر ژمنې ټینګار کړی.
په دې تلیفوني خبرو کې دواړو لوریو د دوه اړخیزو همکاریو د فرصتونو په اړه هم خبرې کړي دي.
د روسیې او امریکا د بهرنیو چارو وزیرانو د نړیوالو شخړو د حل لپاره د احتمالي همکاریو پر امکان هم غږېدلي دي.
دا تماس د واشنګټن او مسکو ترمنځ د اړیکو د ښه کولو لپاره د احتمالي هڅو یوه برخه بلل کېږي.
ټاکل شوې، چې د امریکا او روسیې استازي به نږدې راتلونکي کې سعودي عربستان کې د روسیې او اوکراین ترمنځ د جګړې په پای ته رسېدو خبرې وکړي.
پخواني سناتور مایکل مککال رویټرز ته ویلي، چې نږدې ورځو کې به د امریکا د بهرنیو چارو وزیر مارکو روبیو، د ملي امنیت مشاور مایک والتز او د منځني ختیځ لپاره د امریکا استازی استیو ویتکاف به سعودي عربستان ته لاړ شي.
خو تر اوسه نه ده معلومه چې دا کسان به له کومو روسي چارواکو سره وګوري.
د یادونې ده، چې تر دې وړاندې د روسیې ولسمشر ویلي وو چې د اوکراین جګړې ختمولو لپاره امریکا سره خبرو ته چمتو دی.
د ولسي جرګې پخوانۍ غړې فوزیه کوفي، د مونیخ امنیتي کنفرانس ته په خپله وینا کې ویلي، چې طالبان د ښځو پر ضد د سختو بندیزونو په دوام سره دا ثابته کړې چې دوی نه دي بدل شوي، او دا باور چې طالبان به بدل شي، یوه ناکامه تمه ده.
کوفي ویلي، چې د طالبانو د بدلون یوازینۍ حل لاره د نړیوالې ټولنې له خوا پر طالبانو فشار راوړل دي.
نوموړې له نړیوالو هېوادونو غوښتي، چې د طالبانو مخالفو ډلو ته، چې د دیموکراسۍ او د ښځو د حقونو ملاتړ کوي، د فعالیت زمینه برابره کړي، تر څو دوی خپل سیاسي او ټولنیز نفوذ پراخ کړي.
کوفي زیاته کړې، چې نړۍ باید پر طالبانو د سیاسي تعامل پر ځای یو ستراتیژیک لیدلوری خپل کړي، ځکه چې طالبانو پرلهپسې د ښځو حقوق نقض کړي او دا یې ثابته کړې چې د منځلارو طالبانو تصور حقیقت نه لري.
د المان پولیسو ادعا کړې چې مونیخ کې د یو افغان کډوال لخوا پر موټریز برید یوه ۳۷ کلنه ښځه او ورسره دوه کلنه لور یې د سختو ټپونو له امله ساه ورکړه.
د یاد هیواد پولیسو د دغې ۲۴ کلن بریدګر نوم فرهاد نوري یاد کړی او د برید جنبه یې په دې اساس مذهبي انګېرلې چې د 《 الله اکبر》 غږونه یې کول.
الماني پولیسو زیاته کړې، فرهاد نوري د معتبرو اسنادو درلودونکی و او تر دې دمه یې دلته اوسېدنه او کار کول قانوني وو.
د بلوچستان په مستونګ سیمه کې یو دیني عالم وژل شوی.
دا دیني عالم عبدالواحد نومیږي او پېښه د کردیګپ اړوند اشخان سیمه کې رامنځته شوې.
تر اوسه چا د برید مسؤلیت نه دی منلی.
سیمهییزې سرچینې وایي، نن ماښام د تخار په مرکز تالقان کې چاودنه شوې.
دا چاودنه د اولې امنیتي حوزې اړوند شوې؛ خو تر اوسه یې د څرنګوالي او تلفاتو په اړه څه نه دي ویل شوي.
ځایي طالب مسؤلینو هم تر اوسه په دې اړه څه نه دي ویلي
د کندز ښار اوومې امنیتي حوزې اړوند د ډزو غږونه اورېدل شوي.
سرچینې وایي، ډزې شاوخوا نیم سات شوي؛ خو تر اوسه یې په اړه نور جزیات نه دي ورکړل شوي.
دا په داسې حال کې ده چې تېره اوونۍ د کندز مرکز کې د کابل بانک مخې ته ځانمرګی برید هم شوی و.
د طالبانو د حکومت لوړپوړی چارواکی، ملا عبدالغني برادر، قطر ته د یو میاشتې درملنې لپاره تللی دی.
د ملګرو ملتونو د امنیت شورا د بندیزونو کمیټې اعلان کړی، چې د ملا برادر د سفر بندیز یې له ۹ فبرورۍ څخه د ۲۰۲۵ کال د مارچ تر ۳مې پورې معاف کړی دی.
د طالبانو حکومت تر اوسه د ملا برادر د سفر د اصلي لامل او د هغه د ناروغۍ په اړه څه نه دي ویلي.
دا هم معلومه نه ده چې ملا برادر د کومې ناروغۍ سره مخ دی.
د یادونې ده، چې د ملګرو ملتونو د امنیت شورا د بندیزونو کمیټې له دې وړاندې د طالبانو حکومت د کورنیو چارو وزیر سراجالدین حقاني، د بهرنیو چارو وزیر امیرخان متقي او د حج او اوقافو وزیر نورمحمد ثاقب ته هم د عربي متحده اماراتو او سعودي عربستان ته د سفر اجازه ورکړې وه.