د افغانستان لپاره د امریکا ځانګړی پخوانی استازی زلمی خلیلزاد له یو پلاوي سره کابل ته راغلی.
خلیلزاد او د بندیانو چارو کې د ټرمپ ځانګړي استازي اډم بوایلر کابل ته له راتګ وروسته د طالبانو حکومت د بهرنیو چارو وزارت سرپرست امیرخان متقي سره کتلي.
په دې کتنه کې د بندیانو په تبادلې او ځینو نورو مثبتو اړخونو خبرې شوې.
د یادونې ده، چې د طالبانو حکومت له واک ته رسېدو وروسته زلمی خلیلزاد د لومړي ځل لپاره کابل ته راغی.
د نوي لمریز کال په پار د افغانستان د جمهوري غوښتونکو خوځښت په یو خپره کړې اعلامیه کې ویلي، چې له تېرو تقریبا څلورو کلونو راهیسې افغانستان د انزوا په حالت کې دی او د هېواد راتلونکی نامعلومې خواته روان دی.
اعلامیه کې راغلي، د یو بل کال پیل سره هم د نجونو پر مخ ښوونځي او پوهنتونونه تړل شوي او د هلکانو زدهکړې بیا د ملايي کچې ته راټیټې شوې دي.
یاد خوځښت زیاته کړې، چې د ملایې طرز فکر د اسلامي اصولو د طرز فکر سره په مخالفت کې دی او د اسلامي احکامو سره هیڅ مطابقت نه لري.
اعلامیه کې دغه راز ویل شوي، د افغانستان سفارتخانې فلج او په نړیوال سټیج کې د افغانستان استازیتوب نور کوي.
دوی یو وار بیا هیله ښودلې، چې افغانستان کې په نوي کال کې د نفې سیاست ختم او ټول په یو ټغر راټول شي.
د تېر جمهوري حکومت د چارو ادارې لوی رییس فضل محمود فضلي وايي، افغانې نجونې او ښځې د استعمار د زړې دښمنۍ قرباني دي او د طالبانو د ناانساني سیاستونو له امله له زدهکړو محرومې دي.
نوموړي د نوي کال په مناسبت خپاره کړي پیغام کې ویلي، چې د ښځو او نجونو پر وړاندې د کار، ښوونځیو او پوهنتونونو دروازې بندېدل او هغوی ټولنه کې له هر راز ګډون څخه بې برخې کول کومه تصادفي پېښه نه ده، بلکې د تاریخ تکرار او یو تاریخي ظلم دی.
نوموړی وايي دا یوه زړه او تکراري استعماري پروژه ده چې په پوره بې رحمۍ او قساوت د حاکمې نیابتي ډلې په وسیله پلې کېږي.
د فضلي په خبره، د افغانو نجونو پر زدهکړو بندیز نه زموږ د ټولنې له عقایدو سرچینه اخلي او نه هم زموږ له دودونو؛ بلکې دا یوازې د واکمنې نیابتي ډلې بهانې دي چې د خپلو بادارانو د خوښۍ لپاره او زموږ د نسلونو تباهۍ لپاره کوي.
فضلي وايي، افغانان باید سپیڅلې مبارزه وکړي او د یو ستراټیژیک فکر له لارې هدف ته ورسېږي.
د سپینې ماڼۍ ویانده کارولین لیویت وايي، چې اسرائیل پر غزې وروستۍ حملې په اړه له ټرمپ سره مشوره کړې وه.
کارولین لیویت ویلي، چې ټرمپ په دې اړه هغوی ته مشوره ورکړې وه.
دا په داسې حال کې ده، چې اسرائیل نن سهار پر غزې بریدونه پیل کړل چې ۶۹ تنه یې وژلي.
حماس بیا وايي، دا بې دلیله تاوتریخوالی دی او د بندیانو برخلیک به خراب کړي.
د ولسي جرګې پخوانی غړی کمال ناصر اصولي وايي، پاکستان خپلې دروازې د طالبانو مخالفینو ته پرانېستي او یو وار بیا غواړي، چې د افغانستان بنسټونه، سړکونه، مواصلاتي لارې هوايي ډګرونه او د خلکو کورونه ړنګ شي، تر څو افغانان ان خپل ملک ته هوايي پرواز هم ونشي کړی.
نوموړی زیاتوي، پاکستان داسې نیت لري، چې یو وار بیا یو افغان پلار د ټیلفون کولو لپاره اسلام اباد ته لاړ شي.
اصولي دغه راز ویلي، افغانان باید هوښیار واوسي؛ ځکه د پاکستان غېږ ته نامرده مخالفین ورځي، چې بیا به خپلې خاورې ته بمونه را وړي.
کاناډایي رسنیو راپور ورکړی چې د قطر، عمان او کاناډا په ګډون، د ۱۲۰ افغان نجونو تحصیلي بورسونه، چې د امریکا له خوا تمویل کېدل، ښایي په راتلونکو څو میاشتو کې وتړل شي.
راپورونه وایي، د ټرمپ ادارې تېره میاشت دغو محصلینو ته د یو برېښنالیک له لارې خبر ورکړی چې ممکن بېرته افغانستان ته ستنې کړای شي.
فعالانو د کاناډا له حکومته غوښتنه کړې چې د امریکا په تمویل په زده کړو د بوختو افغان نجونو ملاتړ وکړي.
د پخواني حکومت د مصالحې شورا مشر ډاکټر عبدالله عبدالله د نوي تعلیمي کال او نوروز د پیل په درشل کې ویلي چې هیله لري په راتلونکي کال کې د هیواد د ښځو او نارینه وو “انساني او اسلامي حقوق” تامین شي.
هغه په خپله ایکسپاڼه لیکلي چې تمه لري د افغانستان د خلکو د ژوند د ښه والي لپاره شرایط برابر شي.
دا په داسې حال کې ده چې دوه ورځې وروسته نوی تعلیمي کال پیلېږي؛ خو د طالبانو حکومت د څلورم پرلهپسې کال لپاره د شپږم ټولګي څخه پورته د نجونو د ښوونځیو او پوهنتونونو دروازې تړلې ساتلې دي.
د بشري حقونو یو بنسټ ویلي، چې طالبان په سیستماتیک ډول اقلیتونه له دولتي خدماتو، پروژو او بشري مرستو محروموي.
د یاد بنسټ د راپور له مخې، طالبان بشري مرستې د قومیت او ملګرتیا پر اساس وېشي.
راپور کې راغلي چې اقلیتونه له دولتي دندو هم لرې کېږي.
اکسیوس خبري اژانس ویلي، چې ډونالډ ټرمپ د اټومي وسلو پر سر د خبرو لپاره د ایران مذهبي مشر علي خامنهیي ته دوه میاشتې وخت ورکړی.
اکسیوس زیاته کړې، چې ټرمپ علي خامنهیي ته لیک کې تونده ژبه کارولې.
دا لیک د عربي متحده اماراتو له لوري ایران ته سپارل شوی.
سرچینه زیاتوي، که دواړه اړخونه هوکړې ته ونه رسېږي؛ نو ښایي اسرائیل یا امریکا د تهران په اټومي تاسیساتو بریدونه وکړي.
د طالبانو حکومت تر واک لاندې د مخابراتو او معلوماتي ټکنالوژۍ وزارت وايي، تر دې وروسته د موبایلونو واردونکي مکلف دي، چې د مخابراتي خدماتو د تنظیم له ادارې د وارداتو جواز ترلاسه کړي.
یاد وزارت یوه اعلامیه کې ویلي، داسې سیسټم یې فعال کړی، چې هدف یې د ټیټکیفیت او جعلي موبایلونو د وارداتو مخنیوی او همدارنګه د غلا شوو ګرځنده ټلېفونونو کنټرول دی.
د دې سیسټم له مخې، ټول د موبایل IMEI شمېرې باید بازار ته تر وړاندې کېدو مخکې ثبت شي.