د ایران د بهرنیو چارو وزیر عباس عراقچي وایي، چمتو دي چې پر دوی د بندیزونو لرې کېدو په بدل کې د اټومي پروګرام په اړه خبرې پیل کړي.
نوموړي دغه راز ویلي، چې د ټرمپ لیک ته یې په مناسبو الفاظو ځواب ورکړی دی.
عراقچي دغه راز زیاته کړې، چې له هغه لوري سره مستقیمې خبرې هم بې معنی دي، چې یوازې یې د ګواښ ژبه زده وي.
د ملګرو ملتونو د خوړو او کرنې ادارې ویلي چې غور کې یې کروندګرو ته تخمونه او کیمیاوي سرې وېشلې دي.
دوی هر کروندګر ته ۵۰ کیلو ګرامه اصلاح شوی تخم او سل کیلو ګرامه کیمیاوي سره وېشلې.
دا په داسې حال کې ده چې افغان کروندګر ډېر وخت د کیمیاوي سرو او اصلاح شویو تخمونو له نشت شکایت کوي.
د طالبانو حکومت د صنعت او سوداګري وزارت ویلي چې په تېر یو کال کې ایران ته ۱۸ زره ټنه کرنیز محصولات صادر شوي.
یاد وزارت ویلي، د دغو محصولاتو ټولیز ارزښت ۱۹ میلیونو ډالرو ته رسېږي.
دا په داسې حال کې ده چې ایران دغه هېواد ته د افغانستان د کرنیزو محصولاتو پر صادرېدو بندیز لګولی دی.
د ایران د سپاه پاسداران مشر حسین سلامي وايي، هر وخت جګړې ته چمتو دي، خو نه غواړي چې لومړی یې دوی پیل کړي.
هغه ویلي، اسرائیل له زوال سره مخ دي او ورځ په ورځ یې ماتېدل هم باوري کېږي.
نوموړی زیاتوي، که امریکا اسرائیل ته وسلې ورنه کړي؛ نو دا هېواد به لکه د مني پاڼې ورژیږي.
تر دې وړاندې اکسیوس راپور ورکړی وو، چې نتنیاهو له ټرمپ سره پر ایران د برید په اړه خبرې کوي.
پیټر رینولډز، یو ۷۹ کلن بریتانوی تبعه چې د طالبانو لهخوا بندی شوی، د دې ډلې زندان یې د جهنم سره ورته بللی دی.
نوموړي له پلچرخي زندان څخه د تلیفوني تماس له لارې ویلي، چې د بندیانو وضعیت خورا خراب دی او هره ورځ له بد چلند سره مخ دي.
رینولډز د «ډېليمیل» ورځپاڼې ته ویلي، چې ساتونکي پر بنديانو نارې وهي، هغوی وهي، او یوه ډوډۍ ورکوي چې له املهیې وزن بایللی دی، هغه دا فضا ډېره وېرونکې بللې.
نوموړی اندېښنه لري چې ۷۵ کلنه مېرمنیې باربي هم د پلچرخي په ښځو څانګه کې زنداني ده او دواړه د ورځې له مقاماتو د لیدو اجازه غواړي، خو تر اوسهیې غوښتنه نه ده منل شوې.
دا بریتانوي جوړه د فبرورۍ میاشت کې د بامیانو ولایت څخه د راستنېدو پر مهال د جعلي پاسپورتونو له امله د طالبانو لخوا نیول شوې وه.
د امریکا د بهرنیو چارو وزیر مارکو روبیو اعلان کړی چې د سویلي سوډان د ټولو وګړو ویزې لغوه کوي او نور به دغه هېواد ته د ویزو ورکول هم ودرول شي.
نوموړي ویلي، دا پرېکړه د دې لپاره شوې چې د سویلي سوډان موقتي حکومت نهدی توانېدلی خپل بېرته شړل شوي وګړي پر وخت ومني.
روبیو زیاته کړې چې دغه پرېکړه به سمدستي عملي شي.
د طالبانو حکومت د ترانسپورت او هوايي چلند وزارت د هوا پېژندنې ریاست ویلي، چې د هېواد په لسو ولایتونو کې به سبا یکشنبه واورې او بارانونه وشي.
د یاد ریاست په خبرپاڼه کې ویل شوي، چې دغه اورښتونه به د بدخشان، تخار، کندز، بغلان، سمنګان، بلخ، سرپل، بامیان، جوزجان او فاریاب ولایتونو کې وي.
خبرپاڼه زیاتوي، چې د واورې اندازه به له ۱۰ تر ۲۰ سانتيمترو او د بارانونو اندازه له ۱۵ تر ۲۵ میلیمترو پورې وي.
د خبرپاڼې د معلوماتو له مخې، د بادونو چټک جریان له ۵۰ تر ۸۰ کیلومترو په ساعت کې د شماللوېدیځ، مرکزي او سوېلختیځو سیمو لپاره وړاندوینه شوې.
د سعودي عربستان د بهرنیو چارو وزارت د اسراییلو له لوري د غزې په جنوبي برخه کې د دغه هېواد پر یوه طبي مرکز د هوايي برید غندنه کړې.
یاد وزارت ویلي، چې په دغه برید کې د سعودي د مرستندویه مرکز ګودام، چې طبي تجهیزات یې ساتل، بشپړ ویجاړ شوی دی.
ریاض د ملګرو ملتونو د امنیت شورا له غړو غوښتي، چې د فلسطیني ولس د کړاوونو د پای ته رسېدو لپاره عملي ګامونه واخلي.
دغه وزارت ویلي، د اسراییلو له لوري د ملکي وګړو، پناهځایونو او ښوونځیو په نښه کول د نړیوالو قوانینو ښکاره نقض دی.
په ورته مهال د غزې د روغتیا وزارت ویلي، چې د مارچ له ۱۸مې راهیسې په اسراییلي بریدونو کې تر اوسه ۱۲۵۰ کسان وژل شوي او له ۳۰۰۰ زیات نور ټپیان دي.
د روسیې د بهرنیو پانګونو او اقتصادي همکاریو لپاره ځانګړي استازي کریل دیمیتریف ویلي، د امریکا ولسمشر ډونالد ټرمپ د درېیم نړیوال جنګ د رامنځته کېدو مخه نیولې ده.
نوموړي له فاکس نیوز سره په خبرو کې ویلي چې د ټرمپ ادارې د اوکراین د جګړې د پای ته رسولو په مذاکراتو کې د پام وړ پرمختګ کړی، او اوس هم د مسکو او واشنګټن ترمنځ خبرې اترې ښې روانې دي.
کریل دیمیتریف دا څرګندونې په داسې مهال کړي چې د روسیې جګپوړی پلاوی امریکا ته سفر کړی دی.
د کرملېن ویاند دیمیتري پسکوف هم ویلي چې امکان لري د روانې اونۍ تر پایه یو جګپوړی روسي پلاوی امریکا ته ولاړ شي.
د ایران ولسمشر مسعود پزشکيان د امریکا د ګواښونو په غبرګون کې ویلي چې ایران غواړي له برابر دریځه خبرې اترې وکړي.
هغه وایي، داسې خبرې اترې نه غواړي چې له یوې خوا ایران ته ګواښ وکړي او له بلې خوا د مذاکرې غوښتنه وکړي.
نوموړي زیاته کړې، چې امریکا نن یوازې ایران نه، بلکې ټوله نړۍ سپکوي او دا چلند د مذاکرې له غوښتنې سره تضاد لري.
پزشکيان امریکا ته په خطاب کې ویلي: «که مذاکره غواړئ، نو بیا ګواښ ته څه اړتیا ده؟»