د ایران او امریکا ترمنځ د عمان په پلازمېنه مسقط کې د مقدماتي خبرو اترو وروسته، دواړو هېوادونو توافق کړی چې راتلونکې اونۍ د اټومي مذاکراتو نوي دور ته دوام ورکړي.

د ایران د بهرنیو چارو وزارت په یوه اعلامیه کې ویلي، چې لومړۍ دوره د یو جوړوونکي او متقابل درناوي فضا کې ترسره شوې ده.

په دې غیرمستقیمو مذاکراتو کې، د ایران او امریکا لوړپوړو مذاکراتي استازو عباس عراقچي او سټیو ویتکاف د خپلو حکومتونو نظرونه د عمان د بهرنیو چارو وزیر بدر بن حمد البوسعیدي له لارې تبادله کړل.

د عمان د بهرنیو چارو وزارت هم په یوه اعلامیه کې تایید کړې چې دواړو خواوو موافقه کړې چې مذاکرات په راتلونکې اونۍ کې ادامه پیدا کړي.

د ایران او امریکا د پلاویو ترمنځ غیرمستقیمې خبرې چې نن د عمان په پلازمېنه مسقط کې ترسره شوې، پای ته ورسېدې.

دغه خبرې څو ساعته وړاندې د ایران له لوري د بهرنیو چارو وزیر عباس عراقچي په مشرۍ او د امریکا له لوري د ډونالډ ټرمپ ځانګړي استازي استیو ویتکاف په ګډون پیل شوې وې.

د دغه خبرو په اړه تر اوسه کره جزیات نه دي ورکړل شوې.

د یادونې ده چې تر دې وړاندې ډونالډ ټرمپ ویلي، که له ایران سره خبرې بې نتیجې وې؛ نو پوځي اقدام به وکړي.

د کابل ـ جلال اباد پر لویه لار د یوې ترافیکي پیښې له امله ۸ تنو ته مرګ ژوبله اوښتې.

ځایي سرچینو ویلي، چې د مشالې کمر سیمه کې د رامنځته شوې ترافیکي پیښې له امله یوه میرمن وژل شوې او په موټر کې اووه تنه نور سپاره سخت ژوبل شوي دي.

ځایي طالب چارواکو تر اوسه په دې اړه څه نه دي ویلي.

د ایران د بهرنیو چارو وزارت ویاند، اسماعیل بقايي، ویلي چې د ایران او امریکا ترمنځ “غیر مستقیمې خبرې” د عمان د بهرنیو چارو وزیر بدر بن حمد البوسعیدي په منځګړیتوب پیل شوې.

نوموړي پر خپله ایکس‌پاڼه لیکلي:«دغه خبرې به د عماني کوربه‌وو له لوري په ټاکل شوي ځای کې ترسره شي، چیرې چې د ایران او د امریکا استازي به په جلا خونو کې کېني.»

د ولسي جرګې پخوانۍ غړې فوزیه کوفي د پاکستان د بهرنیو چارو وزارت له مرستیالې حنا رباني کهر سره د افغان کډوالو د ستونزو په اړه خبرې کړي دي.

آغلې کوفي ویلي چې په دې لیدنه کې د افغان ښځینه فعالانو، د پاکستان د پارلمان د نړیوالو اړیکو کمېټې، او د افغانستان لپاره د پاکستان د ځانګړي استازي ګډون درلود.

د دې په وینا، افغان کډوالو خپلې ستونزې په یوه څلور ماده‌ییزه طرحه کې چمتو کړې وې او د پاکستان اړوندو چارواکو ته یې سپارلې ده.

په یاده طرح کې له پاکستان غوښتنه شوې چې د له ګواښ سره مخ کډوالو، لکه پخواني سرتېري، خبریالان او فعالان، جبري ایستل ودروي، د ویزو قانوني او اوږدمهاله تمدید ته زمینه برابره کړي او یوه مشخصه سیمه د دوی د لنډمهاله استوګنې لپاره ځانګړې کړي.

همداراز، غوښتل شوي چې پاکستان د ملګرو ملتونو او نړیوالو ادارو په همغږۍ له دغو کډوالو سره بیړني بشري او امنیتي مرستې وکړي، څو د یوې احتمالي فاجعې مخه ونیول شي.

د ایران د بشري حقونو سازمان حال‌وش ویلي چې ناڅرګندو وسله‌والو د جمعې په شپه یو ۱۶ کلن افغان ځوان، محمدافضل ملاخېل، د ایران د خاش ښار څخه برمته کړی دی.

راپورونه وایي، چې محمدافضل د شپې لس بجې له بازاره کور ته روان و، چې څلورو وسله‌والو پرې برید کړی، په زوره یې موټر ته پورته کړی او له سیمې وتلي.

تر اوسه د پېښې پړه کومې ډلې نه ده منلې او د ایران چارواکو هم غبرګون نه دی ښودلی.

د محمدافضل کورنۍ له ایراني پولیسو سره اړیکه نیولې، خو چارواکو ورته ویلي چې د رخصتۍ له ختمېدو وروسته دې مراجعه وکړي.

د یادونې ده چې له وړاندې هم په ایران کې د افغان وګړو د برمته کېدو پېښې ثبت شوې دي.

د هرات د صنايعو او کانونو د خونې رئیس حمیدالله خادم ویلي، چې د دغه ولایت په صنعتي ښارګوټي کې د کارتن جوړونې یوې فابریکې کې پراخ اورلګیدنه شوې، چې تر دې دمه یې له ۱۰ میلیونه ډالرو زیات مالي زیان اړولی دی.

طالب چارواکي وایي، اور څو ساعته دوام وکړ او د اور وژنې ډلې د مهار هڅې وکړې.

د طالبانو د ۲۰۷ الفاروق قول اردو د اور وژنې ټیم ویلي، دا اور یې د څو ساعتونو هڅو وروسته کنټرول کړی دی.

دا اورلګیدنه د جمعې په ورځ له غرمې وروسته پیل شوې وه او تر شنبې سهاره پورې یې دوام درلود.

د سوریې د لنډ مهالي حکومت مشر احمدالشرع له خپلې مېرمن سره یو ځای د انتالیا دیپلوماسي په څلورم کنفرانس کې ګډون کړی.

د دغه کنفرانس په څنډه کې د احمد الشرع مېرمنې لطیفې الدروبي د ترکیې د ولسمشر له مېرمنې امینې اردوغان سره هم لیدلي دي.

امینې اردوغان لیکلي، چې په دې لیدنه کې یې د نورو مسائیلو ترڅنګ سوریه کې د مېرمنو او ماشومانو د وضعیت په اړه هم خبرې کړې دي.

د انټالیا څلورم دیپلوماسي کنفرانس د جمعې په ورځ د سلګونو نړیوالو چارواکو او دیپلوماتانو په ګډون پیل شو.

له امریکا سره د ایران د مذاکراتي ټیم مشر عباس عراقچي وايي، دوی په ټول جدیت سره په دغو مذاکراتو کې ګډون کړی او ایران نیت لري، چې یوې ښې پایلې ته ورسېږي.

نوموړی وايي، که مقابل لوری، د ستونزو د حل اراده ولري؛ نو پایلې به غوره وي.

هغه ویلي، ښايي په دې لیدنو کې ځینې لومړني مسائیل روښانه شي.

عراقچي یو وار بیا ټینګار کړی، چې دا مذاکرات غیر مستقیم دي.

د یادونې ده، چې نن عمان د ایران او امریکا ترمنځ د مذاکراتو کوربه دی.

فرانسې خبري اژانس د پنټاګون د یو چارواکي په حواله ویلي، چې په بګرام هوايي اډې کې د امریکايي الوتکې د کېناستو راپورونه بې اساسه دي.

یاد اژانس د دغه چارواکي نوم نه دی ذکر کړی؛ خو د سرچینې له قوله یې ویلي، چې تر اوسه امریکا په دغه اډه کې هیڅ حضورنه لري.

تر دې وړاندې داسې راپورونه خپاره شوي وو، چې ګواکې امریکايي الوتکې بګرام هوايي اډه کې ناسته کړې؛ خو د طالبانو حکومت هغه مهال هم دا راپورونه بې اساسه بللي وو.