د طالبانو حکومت د بهرنیو چارو وزارت سرپرست امیرخان متقي په کابل کې د پاکستان د سفارت له سرپرست عبیدالرحمن نظاماني سره لیدنه کې د افغان کډوالو د جبري ایستلو او له هغوی سره د ځینو پاکستاني ادارو د ناسم چلند په اړه اندېښنه څرګنده کړې ده.

د بهرنیو چارو وزارت د عامه اړیکو رئیس، ضیا احمد تکل وایي، چې امیرخان متقي په دې لیدنه کې دا ډول چلند پاروونکی بللی او ټینګار یې کړی چې دا عملونه د افغانستان او پاکستان تر منځ اړیکو ته زیان رسوي.

په ورته مهال، د پاکستان د سفارت سرپرست ژمنه کړې چې د طالبانو حکومت اندېښنې به له اړوندو ادارو سره شریکې کړي.

خراسان ډایري د سیمه‌ییزو سرچینو له قوله ویلي، چې ټي‌ټي‌پي ډلې پورې تړلي وسلوالو کسانو د نورستان ولایت د کامدېش ولسوالۍ له لارې پاکستان ته د تګ هڅه کړې؛ خو د پاکستاني سرحدي ځواکونو له خوا له سخت مقاومت سره مخ شوي دي.

یادې رسنۍ ویلي، چې د دواړو لوریو تر منځ وسله‌واله نښته شوې چې نږدې یوه ساعت یې دوام کړی دی.

سرچینې زیاتوي، چې وسلوال بېرته د کامدېش ولسوالۍ د ګاوردېش سیمې ته تښتېدلي دي.

سرچینو دغه راز ویلي، چې د نښتې له پای ته رسېدو وروسته، پاکستاني ځواکونو پر ګاوردېش سیمه له ۴۵ زیات هاوان مرمۍ ویشتي دي.

د راپورونو له مخې، په پېښه کې یو شمېر کسان ټپیان شوي، چې د درملنې لپاره د کونړ ولایتي روغتون ته انتقال شوي دي.

د طالبانو حکومت تر اوسه په دې اړه څه نه دي ویلي.

د امریکا ولسمشر ډونالډ ټرمپ ویلي، چې هېواد به یې ژر د ایران په اړه پرېکړه وکړي.

نوموړي دا څرګندونې له فلوریدا څخه واشنګټن ته د بېرته ستنېدو پر مهال، د ایر فورس وان الوتکه کې له خبریالانو سره کړې دي.

ولسمشر ټرمپ ویلي، ځانګړي استازي یې، سټیو ویتکاف، په منځني ختیځ کې ګټورې لیدنې درلودې او د روسیې او اوکراین د جګړې په اړه هم بحثونه شوي دي.

دغه څرګندونې په داسې حال کې کېږي، چې د ایران او امریکا ترمنځ د غیرمستقیمو خبرو یو پړاو په عمان کې ترسره شوی.

د بلخ سیمه‌ییزو سرچینو رسنیو ته ویلي، چې نن سهار د مزارشریف ښار په دویمه امنیتي حوزه کې چاودنه شوې ده.

دا چاودنه شاوخوا ۸:۲۰ بجې د سه‌دکان جومات ته نږدې شوې، چې یاد جومات د شیعه مذهبه هزاره ټولنې پورې اړه لري او په یوه هزاره‌ مېشته سیمه کې موقیعت لري.

د عیني شاهدانو په وینا، د چاودنې له امله یوه مېرمن وژل شوې او درې تنه نور ټپیان شوي دي.

سرچینې وايي، چاودنه د ځای پر ځای شویو چاودیدونکو توکو له امله رامنځته شوې ده.

د طالبانو ځایي چارواکو تر اوسه د دې پېښې په اړه رسنیو ته څه نه دي ویلي.

د کرېکټ نړۍوالې شورا (ICC) ویلي، چې د افغانستان د ښځینه کرېکټ لوبډلې د ملاتړ لپاره یوه ځانګړې کاري ډله جوړوي.

یادې شورا ویلي، چې دغه کاري ډله به د هند، انګلستان او اسټرالیا له کرېکټ بورډونو سره په همغږۍ کار کوي.

د دې شورا وینا، د دغې ډلې له لارې به یو ځانګړی مالي صندوق هم رامنځته شي، څو د افغان ښځینه لوبغاړو لپاره مستقیم مالي ملاتړ برابر شي.

د کرکټ نړیوالې شورا زیاته کړې، چې د مالي مرستې ترڅنګ د روزونکو لپاره ټریننګونه، د نړیوالو اسانتیاوو کارول، او نور مسلکي پرمختیايي پروګرامونه هم پکې شامل وي.

د یادونې وړ ده چې د افغانستان د ښځینه کرېکټ لوبډلې غړي دا مهال له هېواده بهر ژوند کوي.

د ملګرو ملتونو د خوړو نړیوال پروګرام (WFP) ویلي، چې د امریکا د مرستو وروستی ځنډ او د خوراکي مرستو بودیجه کې کموالي د افغانستان د زیان‌منو خلکو لپاره د خوړو خوندیتوب ته جدي ګواښونه پېښ کړي دي.

یاد سازمان په خپل تازه راپور کې ویلي، دا مرستې داسې مهال کمې شوې چې د هېواد د تورم کچه لوړېږي او له پاکستان څخه راستانه شوي کډوال بېړنۍ مرستې ته اړتیا لري.

د راپور له مخې، د خوراکي توکو تورم د ۲۰۲۴ کال د جنورۍ په پرتله په فبرورۍ کې لوړ شوی.

راپور کې ټینګار شوی چې د افغانستان زیاتره خلک لا هم د ژوند د بنسټیزو اړتیاوو لپاره نړیوالو مرستو ته اړتیا لري.

دا په داسې حال کې ده چې رویټرز د امریکا د نړیوالې پراختیایي ادارې د بشري مرستو د پخواني دفتر رییس او ۹ نورو سرچینو له قوله ویلي، د ډونالډ ټرمپ اداره غواړي له افغانستان او یو شمېر نورو هېوادونو سره مرستې پای ته ورسوي.

د طالبانو حکومت د کډوالو او راستنېدونکو چارو سرپرست وزیر عبدالکبیر، له پاکستان او ایران څخه د افغان کډوالو جبري ایستل د اسلامي، بشري او نړیوالو اصولو خلاف عمل بللی دی.

نوموړي دا څرګندونې د طالبانو د کورنیو چارو وزارت د پالیسۍ او ستراتیژۍ له مرستیال عبدالحق مخدوم سره د افغان کډوالو د ایستلو په تړاو د یوې لیدنې پر مهال کړې دي.

د کډوالو وزارت په خبرپاڼه کې ویل شوي، چې عبدالحق مخدوم د کډوالو د بېرته راستنېدو لپاره په ټولو ولایتونو کې د لازم چمتووالي خبر ورکړی؛ خو د دغو تدابیرو جزییات نه دي ورکړل شوي.

د ملګرو ملتونو د کډوالو عالي کمېشنرۍ د معلوماتو له مخې، یوازې د حمل له ۱۲مې تر ۲۲مې پورې شاوخوا ۴۴،۹۰۰ افغان کډوال له پاکستان څخه بېرته افغانستان ته ستانه شوي دي.

په ورته وخت کې، د ایران د کورنیو چارو وزارت د بهرنیو اتباعو مرکز ویلي چې په تېر میلادي کال کې له دغه هېواده له یو میلیون زیات افغانان ایستل شوي دي.

د افغانستان لپاره د اروپايي ټولنې ځانګړي استازي توماس نیکلاسون اعلان کړی چې دنده یې پای ته رسېدلې ده.

نوموړي دا خبره په یوه پیغام کې د خپلې ایکس‌پاڼې له لارې کړې ده.

نیکلاسون ویلي، چې د اروپايي ټولنې د ځانګړي استازي په توګه یې ماموریت د روان میلادي کال د مارچ میاشتې په لومړۍ نېټه پای ته رسېدلی دی.

هغه له ټولو افغانانو او همکارانو څخه چې د ماموریت پر مهال یې ورسره مرسته کړې، مننه کړې ده.

د امریکا د دفاع وزیر پیت هگست ویلي، چې که څه هم امریکا د ایران د اټومي وسلو د مخنیوي لپاره د خبرو اترو لاره غوره ګڼي؛ خو که دا خبرې پایله ورنه کړي، نور بدیلونه هم پر مېز دي.

نوموړي له فاکس‌نیوز سره په یوه مرکه کې ویلي، چې ولسمشر ډونالډ ټرمپ پیاوړی هوډ لري چې د ایران د اټومي وسلو د ترلاسه کولو مخه ونیسي.

هغه زیاته کړې:«هېله لرو چې نظامي اقدام ته اړتیا پېښه نه شي، خو که اړتیا شي، امریکا دا وړتیا لري چې پراخ او ځواکمن عملیات ترسره کړي.»

هگست د عمان خبرې رغنده بللي او ویلي دي چې ټرمپ د خبرو له لارې توافق ته رسېدو ته ژمن دی؛ خو ټینګار کوي چې نور انتخابونه هم شته.

هغه د یمن د حوثیانو پر ضد د امریکا د وروستیو اقداماتو یادونه هم کړې او ویلي چې امریکا نه غواړي له خپل پوځي ځواک څخه کار واخلي؛ خو که اړتیا وي، د ایران د اټومي بم د مخنیوي لپاره به یې وکاروي.

پاکستاني چارواکي وایي، چې د افغانستان پولې ته څېرمه د ترهګرو بریدونو له زیاتوالي وروسته، ټاکل شوې ده چې د جولای په میاشت کې د اسلام‌اباد او واشنګټن ترمنځ د ترهګرۍ ضد مبارزې په تړاو ځانګړې خبرې اترې ترسره شي.

د پاکستان د کورنیو چارو وزیر محسن نقوي د امریکا د کانګرس له یو پلاوي سره په اسلام‌اباد کې لیدلي او ټینګار یې کړی چې نړیواله ټولنه باید له پاکستان سره د ترهګرۍ ضد مبارزه کې پراخه همکاري وکړي.

نوموړي زیاته کړې، چې ترهګري یو نړیوال ګواښ دی او د اطلاعاتو تبادله او پرمختللې ټکنالوژي د دې مبارزې لپاره اړینه ده.