د هېواد د کورنیو چارو پخواني وزیر محمد عمر داودزي ویلي، چې حامد کرزي د پاکستان د خوشالولو لپاره د دغه هېواد له پوهنتونونو فارغ محصلین کابینه کې شامل کړل.
هغه د امریکا سنا کې د افغانستان د جګړې ارزونې کمېسیون په ناسته کې ویلي، چې افغانستان له طالبانو وروسته درې ولسمشران درلودل، چې کرزی، خلیلزاد او اخضر ابراهیمي وو.
د داودزي په خبره، دغو څېرو د افغانستان پر سیاسي بهیر خورا لوی اغېز درلود.
د امریکا د ولسمشر ډونالډ ټرمپ ځانګړي استازي سټیو ویتکاف او د روسیې د ولسمشر ولادیمیر پوتین ځانګړي استازي کیریل دیمیترییف د جمعې په ورځ په سن پترزبورګ کې د اوکراین د جګړې د سولهییز حل په موخه څلور ساعته خبرې وکړې.
د روسیې استازي دا خبرې ساختماني بللي او ویلي، دا د ویتکاف او پوتین ترمنځ درېیمه لیدنه ده.
تر دې وړاندې کرملین ویلي و، دا ناسته د دې لپاره وه چې روسیه وکولای شي خپلې اندېښنې مستقیم واشنګټن ته ورسوي.
بل لورته ډونالډ ټرمپ ویلي که د روانې میاشتې تر پایه کوم پرمختګ و نه شي؛ نو ښايي پر مسکو د نويو بندیزونو د لګولو ګام پورته کړي.
فارس خبري آژانس، چې د سپاه پاسداران پورې تړاو لري، راپور ورکړی چې د ایران او امریکا ترمنځ خبرې به د عمان د بهرنیو چارو وزیر بدر البوسعیدي په منځګړیتوب ترسره شي.
فارس ویلي، چې دغه خبرې به په غیر مستقیم ډول او د لیکلي متن د تبادلې له لارې ترسره شي.
فارس زیاته کړې، د ایران د پلاوي مشري به عباس عراقچي او د امریکا د پلاوي مشري به سټیو ویتکاف کوي.
د بخښنې نړیوال سازمان د طالبانو لهخوا په درې ولایتونو کې د څلورو کسانو په عام محضر کې اعدام ته اندېښنه څرګنده کړې ده.
دغه سازمان دا اقدام د بشري حقونو ښکاره نقض او د بشري کرامت سپکاوی بللی دی.
په اعلامیه کې راغلي چې دا ډول سزاوې ظالمانه دي او نه یوازې پر قربانیانو، بلکې پر لیدونکو هم ژورې منفي اغېزې لري.
یاد سازمان له نړیوالې ټولنې غوښتي چې پر طالبانو فشار زیات کړي څو دا ډول سزاوې پای ته ورسوي او د نړیوالو اصولو درناوی وکړي.
د ایران د اټومي انرژۍ د سازمان مشر محمد اسلامي ویلي، چې لوېدیځوال یورانیم غنيکول یوازې د ځان حق ګڼي او نه غواړي موږ اټومي صنعت ولرو.
نوموړی وایي، د دښمنانو د سترګو د ړندیدو لپاره، موږ به داسې اټومي بټۍ جوړه کړو چې بشپړ ایراني سون توکي ولري.
اسلامي همداراز ویلي، چې امریکا او نور هېوادونه لا هم دا فکر کوي چې په ګواښ، ویرې، رواني عملیاتو او بېعقله پېښو سره کولی شي زموږ ملت او هېواد ته خنډ شي؛ خو موږ د هغوی له هغه سرې کرښې تېر شوي یو، چې دوی ځانته د ممنوعې سیمې په توګه اعلان کړې وه.
د ملګرو ملتونو د بشري حقونو ځانګړي راپور ورکوونکي ریچارډ بینېت ویلي، چې د طالبانو د امر بالمعروف قانون یو تبعیضي قانون دی، چې د افغانستان پر خلکو، په ځانګړې توګه د ښځو او نجونو پر ژوند ژور منفي اغېز کړی.
بینېت ویلي، دا قانون نه یوازې فردي ازادۍ محدودې کړې، بلکې افغانستان یې له نړیوالو ژمنو هم لیرې کړی دی.
یوناما په خپل تازه راپور کې ویلي، چې طالبانو د اسد له ۳۱مې وروسته د امر بالمعروف قانون په پراخه بڼه پلي کړی، چې له امله یې پراخې خودسرې نیونې او سخت محدودیتونه وضع شوي دي.
په راپور کې راغلي، طالبانو په شپږو میاشتو کې ۳۳۰۰ تنه محتسبین د نظارت لپاره په ۲۸ ولایتونو کې ګومارلي، او د دغه قانون تمرکز تر ډېره د خلکو پر ظاهري بڼه او د ښځو د عامه حضور محدودولو باندې دی.
د طالبانو حکومت سترې محکمې اعلان کړی چې د دوی حکومت په بادغیس او نیمروز ولایتونو کې درې کسان د قتل په تور اعدام کړي دي.
یادې محکمې په یوه خپره شوې خبرپاڼه کې ویلي، چې لومړی کس سلیمان نومېږي، د تگاب علم ولسوالۍ اوسېدونکی و او د درې کسانو د قتل تور پرې لګېدلی و.
محکمې زیاته کړې، بل اعدام شوی کس حیدر نومېده او د بادغیس د دره بوم سیمهییز اوسېدونکی و، چې هغه هم د قتل په تور اعدام شوی دی.
محکمې دغه راز یلي، چې درېیم کس عبدالقدیر نومېده او د زرنج ښار په ورزشي لوبغالي کې د یو کس د قتل په تور اعدام شوی دی.
د طالبانو د سترې محکمې په وینا، د قصاص حکم د تطبیق پر مهال عادي خلک او د طالبانو یو شمېر چارواکي حاضر وو.
د ولسي جرګې پخوانی غړی کمال ناصر اصولي وایي، که رښتیا وي چې د طالبانو د معارف وزارت ۹۰ زره د معلمانو بستونه له منځه وړي او تشکیل کموي؛ نو دا به د نظام له خوا د معارف د له منځه وړلو هڅه وي.
هغه ویلي:«که داسې وي؛ نو په داسې هېواد کې چې د یو سره نظام د معارف د منځه وړلو هڅې کوي؛ نو پخپله حاکمان لوی خیانت کوي او د هېواد ریښې وباسي او د ۴۰ ملیونه نفوس سره دښمني کوي.»
د بریتانیا دفاع وزارت اعلان کړی چې له اوکراین سره به د ۵۸۰ میلیونه ډالرو په ارزښت نظامي مرسته کوي.
د دې مرستې ۳۵۰ میلیونه پونډه به لندن تمویل کړي او پاتې برخه ناروی ورکوي.
ویل شوي چې دا مرسته به د وسایطو، نظامي تجهیزاتو، رادار سیستمونو، د ټانک ضد ماینونو او بېپیلوټه الوتکو د ترمیم او ساتنې لګښتونه پوره کړي.
د بریتانیا د دفاع وزیر جان هیلي ویلي، دغه مرسته د اوکراین د پیاوړي دریځ لپاره مهمه ده څو پر پوتین فشار زیات شي او دې جګړې ته د پای ټکی کېښودل شي.
د طالبانو د حکومت مشر شيخ هبت الله اخندزاده، د پکتيا له والي او نورو طالب مسوولینو سره په کتنه کې ویلي، چې دا مهال د شریعت د تطبیق لپاره مناسب وخت دی او باید په اقتصادي، سیاسي او پوځي برخو کې شرعي اصول پلی شي.
د طالبانو حکومت ویاند ذبیحالله مجاهد په یوه خپره شوې خبرپاڼه کې ویلي، چې شيخ هبت الله اخندزاده په دغې غونډه کې مسوولینو ته سپارښتنه کړې چې د امر بالمعروف او نهی عن المنکر قانون باید جدي تطبیق کړي او په ټولنه کې شرعي احکام نافذ شي.
نوموړي همداراز زیاته کړې چې مسوولین مکلف دي د خلکو خدمت ته ژمن واوسي، د ولس ترمنځ اختلافونه له منځه يوسي او د یووالي فضا رامنځته کړي.
شیخ هبتالله اوسنی وضعیت د علم، دین او اسلام د خدمت لپاره مناسب بللی او مسوولین یې هڅولي چې له دې فرصت څخه اعظمي ګټه پورته کړي.