د امریکا حکومت امریکایي وګړي د جمو او کشمیر سیمې ته له سفر منع کړي.
دوی یوې خبرتیا کې ویلي، چې د امریکا حکومت وګړو لپاره دغې سیمې ته سفر ممنوع دی.
د یادونې ده، چې د هند تر کنټرول لاندې کشمیر د وړمې ورځې تر برید وروسته له سختو امنیتي تدابیرو لاندې دی.
د امریکا د ځانګړو ځواکونو پخواني قومندان ران مک کمون ویلي، چې واک ته د طالبانو له رسېدو وروسته د دې ډلې ترمنځ اختلاف پیدا شوی او دوی هیڅکله د یوې واحدې ډلې په توګه عمل نه دی کړی.
نوموړي ویلي، کندهار او حقاني ډله له یو بل سره ژور اختلاف لري؛ خو دغه اختلاف ته په چوپتیا سره دوام ورکوي.
کمون ویلي، کندهار ډله تندرویه ده، چې په تېرو څه باندې درې کالو کې یې ګڼ شمېر توند کارونه کړي؛ خو حقاني بیا یوازې مشاهده کړې او داسې ښکاري، چې اوس دا حالات بدل شوي دي.
د افغانستان لپاره د روسیې ځانګړي استازي ضمیر کابلوف ویلي، چې د کازان په ناسته کې به له طالبانو سره د افغان ټرانس اوسپنې پټلۍ په اړه خبرې وشي.
نوموړي ویلي، چې د افغانستان غني سرچینې، ستراتیژیک جغرافیوي موقعیت هم د پام وړ دی.
ضمیر کابلوف دا څرګندونې ایزوستیا ورځپاڼې ته کړې دي.
د یادونې ده، چې هغه تېره ورځ کابل کې د طالبانو حکومت د کورنیو او بهرنیو چارو وزارتونو سرپرستانو سره هم کتلي وو.
والسټرېټ ژورنال لیکلي که ډونالډ ټرمپ غواړي په اوکراین کې یوې دوامداره سولې ته ورسېږي، باید پر دغه هېواد پوځي مرستې روانې وساتي.
په مقاله کې خبرداری ورکړل شوی چې ناڅاپي د مرستو بندیدل کولی شي اوکراین ټرمپ په دوهم افغانستان بدل کړي، لکه څنګه چې د بایډن د پرېکړې له امله افغانستان سقوط وکړ.
والسټرېټ ژورنال دا هم ویلي چې روسیه اوس هم ستراتیژیک هدفونه لري او د چیچنیا تجربې ته په کتو، پوتین ښايي هر ډول هوکړه تر پښو لاندې کړي.
د ناټو یو لوړپوړي چارواکي هم کانګرس ته ویلي چې روسیه د جګړې حالت ته تللې او د چین، ایران او شمالي کوریا ملاتړ له ځان سره لري.
اکسیوس راپور ورکړی، چې ایلن ماسک او د امریکا د خزانې وزیر سکاټ بنسټ له یو بل سره لفظي شخړه کړې.
دا شخړه په سپینه ماڼۍ کې د یاد وزارت د مشرۍ پر سر رامنځته شوې.
راپور کې راغلي، چې شخړه د امریکا د ولسمشر ډونالډ ټرمپ په حضور کې شوې ده.
سرچینه زیاتوي، چې واک کې د ماسک له شرېکېدو وروسته؛ نوموړي ګڼ شمېر چارواکي نا ارامه کړي دي.
رویټرز راپور ورکړی، چې د هند تر کنټرول لاندې کمشېر پر سیلانیانو له خونړي برید وروسته، نوي ډهلي له اسلام اباد سره خپلې اړیکې په بې ساري ډول کمې کړې دي.
دوی په یو تازه اقدام کې له پاکستان سره د سند اوبو تړون لغوه او پاکستاني وګړو ته یې د ویزو ورکول هم منع کړل.
هند ویلي، تر هغې چې پاکستان په بشپړ ډول له ترهګري لاس نه وي اخیستی؛ نو دا تړون به ورسره ځنډېدلی وي.
په همدې حال کې هند دواړو هېوادونو ترمنځ د تګ راتګ یوازینۍ لار هم تړل شوې ده.
ټاکل شوې، چې د پاکستان حکومت د هند تر کنټرول لاندې کشمیر کې د شوي برید په اړه بېړنۍ امنیتي ناسته را وبولي.
دا غونډه د برید په اړه د هند تر توندو غبرګونونو وروسته جوړیږي.
د یاد هېواد دفاع وزیر خواجه اصف وايي، دوی په دغه غونډه کې د هند د برید څرنګوالي په اړه خبرې کوي.
نوموړی زیاتوي، هېواد یې چمتو دی، چې د هر ډول برید ځواب ورکړي.
بل لورته بیا هند ویلي، چې د دغه برید غچ به واخلي.
د سپینې ماڼۍ ویاندې کارولین لوویت اعلان وکړ چې متحده ایالات به د چیني توکو پر وارداتي تعرفو کې هېڅ ډول یو اړخیز کمښت ونه کړي.
نوموړې له فاکس نیوز سره خبرو کې ویلي: «د تعرفو د یو اړخیز کمښت پرېکړه نه ده شوې. دا یوه پیاوړې او همغږې پالیسي ده چې د هېواد د ملي ګټو پر بنسټ ولاړه ده.»
دا څرګندونې په داسې حال کې کېږي چې چین پر واشنګټن فشارونه زیات کړي څو د سوداګریزو خبرو پر مهال تعرفې راکمې کړي.
د چین حکومت مخکې له دې، په رسمي ډول د تعرفو د کمولو غوښتنه کړې وه.
د سپینې ماڼۍ چارواکو بیا ټینګار کړی چې تر هغه چې چین خپلې سوداګریزې ژمنې عملي نه کړي، د تعرفو د کمښت هېڅ پلان نه لري.
چین هم په غبرګون کې پر امریکايي توکو تعرفې لوړ کړې دي.
جمهوري حکومت کې د ملي دفاع وزارت سرپرست شاه محمود میاخېل د ملي مقاومت په نوم په جبهې سختې نېوکې کړي.
نوموړی وایي، د مقاومت جبهه، نه ملي مقاومت دی او نه جبهه.
نوموړي ویلي، دوی سیاستمداران نه؛ بلکې د ماشومانو غوندې یو ځای او بل ځای مښوکې وهي.
د هغه په خبره، دا نوې لوبه نه ده؛ بلکې د دوی پخوانیو مشرانو هم مکه کې سره قسم وخوړ؛ خو بیا هم متعهد پاتې نشول.
ښاغلی میاخېل وایي، دلته ائتلاف د شخصي ګټو او د نورو د اهدافو لپاره د وریجې د غوريو په څېر دی او کله چې وریجې په غوري کې خلاصې شي بیا د خالي غوري په دور څوک نه پاتې کیږي.
د جمهوري حکومت لومړی مرستیال امرالله صالح وایي، یوازینی بنسټ چې د افغانستان د ملي بیرغ د بدلون صلاحیت لري، لویه جرګه یا عمومي ټولپوښتنه ده او یوازینی سند چې کولای شي ملي بیرغ تعریف کړي، د افغانستان اساسي قانون دی.
هغه په ټولنیزو رسنیو کې د بیرغ د سپکاوي په تړاو جوړې شوې ویډیو ته غبرګون کې ویلي، هر ډول هڅه چې د دې بیرغ سپکاوی یا توهین وکړي، نه یوازې بېنتیجې به وي، بلکې لا به د مخالفانو د انزوا سبب شي.
نوموړي ویلي، ګوندونه او قومونه په ټوله نړۍ کې حق لري چې د قانون له مخې خپل سمبولونه ولري؛ خو دا سمبولونه د ملي سمبول په توګه نه پېژندل کېږي.