د امریکا عدلیې وزارت ویلي، چې د امریکا حکومت له لوري نیول شوي پخواني طالب قومندان حاجي نجیب الله پر خپلو جرمونو اعتراف کړی.
هغه، په ۲۰۰۸ او ۲۰۰۹ میلادي کالونو کې امریکايي ورځپاڼې د خبریال او د دوه افغانو وګړو په تښتولو تورن وو.
یاد وزارت ویلي، چې نوموړي په افغانستان کې امریکايي پوځیان هم په نښه کړي دي.
د سرچینې د معلوماتو له مخې، هغه پر خپل جرم اعتراف کړی او اوس به د خپل جرم سزا وویني.
د افغانستان د ملي امنیت پخواني رییس رحمت الله نبیل د پاکستان دفاع وزیر خواجه اصف څرګندونو ته په ځواب کې لیکلي، چې د ترهګرۍ مډال دې یو وخت د ویاړ په توګه غاړه کې اچوو.
خواجه اصف لیکلي، چې اسامه بن لادن د روس او امریکا ترمنځ د جګړې لپاره پاکستان ته راوړل شوی وو او وروسته، چې معلومه شوه؛ نو پاکستان په سپین ډګر پرېښودل شو او اوس د ترهګرۍ قرباني دی.
تر دغه ټویټ لاندې ورته نبیل لیکلي، چې«ګران خواجه اصف نه قدرتونو ګټه درلوده، او نه د خدای فضل پاتې شو؛ اوس ستا په غاړه کې د ترهګرۍ هماغه زنځیر پاتې دی، کوم چې تا به یو وخت د مډال په توګه په غاړه کې اچولی وو.!»
د یادونې ده، چې اصف تېره ورځ هم ویلي و، چې درې لیسیزې یې د امریکا په خوښه ناپاک کارونه وکړل.
د پاکستان د بهرنیو چارو وزارت ویاند شفقت علي وايي، کابل له اسلام اباد سره پخوانۍ اړیکې لري او د یو ښه دوست په توګه غواړي، چې د دواړو لوریو اړیکې بهترې وي.
هغه ویلي، کابل ته د اسحق ډار د سفر پر مهال د یاد هېواد له بهرنیو چارو وزارت سره په بېلابېلو برخو کې هوکړې شوې دي.
نوموړی زیاتوي، د کډوالو ستونزو ته له رسېدنې، بیا د سیاسي او سوداګریزو اړیکو تر پراختیا پورې؛ ټول مسائل په دغه سفر کې بحث شوي دي.
د امريکا ولسمشر ډونالد ټرمپ له خپلې مېرمنې ميلانيا ټرمپ سره يو ځای د پاپ فرانسيس د جنازې د مراسمو د ګډون لپاره د ایټالیا پلازمېنې روم ته رسېدلی دی.
د واشنګټن پوسټ د راپور له مخې، لسګونه نړیوال مشران به په دغو مراسمو کې ګډون وکړي.
د اوکراين ولسمشر ولوديمير زلنسکي، د بريتانيا لومړی وزير کيير ستارمر او د فرانسې ولسمشر ايمانوئل ماکرون د هغو مهمو مشرانو له ډلې دي چې د ګډون لپاره روم ته روان شوي دي.
پاپ فرانسيس، چې د نړۍ د کاتوليکانو معنوي مشر و، د ثور پر لومړۍ نېټه، د ۸۸ کلونو په عمر وفات شو.
له بلې خوا، راپورونه ښيي چې د روسیې ولسمشر ولاديمير پوتين به په دغو مراسمو کې ګډون ونه کړي.
د پاپ فرانسيس جسد د چهارشنبې له ورځې راهیسې د درې ورځو لپاره د واتیکان په سنت پیتر کلیسا کې د خلکو د ليدو لپاره ايښودل شوی دی.
د سوريې د انتقالي حکومت د بهرنيو چارو وزير اسعد حسن الشیباني د ملګرو ملتونو د امنیت شورا په غونډه کې په خپل لومړي ګډون کې ځان د سوريې نوی استازی معرفي کړ.
الشيباني ټينګار کړی چې د بشار اسد د رژيم کړنو د سیمې بېثباتۍ ته لاره هواره کړې وه او اوسنۍ سوریه د هېڅ هېواد، حتی د اسراییلو لپاره هم ګواښ نه دی.
نوموړي همداراز ویلي، چې د شيميایي وسلو د مخنيوي له سازمان سره د نوې سوريې همکاري مثبته ده.
د یادونې ده چې له دې وینا وړاندې، د احمد الشرع حکومت نوی ملي بيرغ هم د ملګرو ملتونو په مقر (نيويارک) کې ورپول شو.
د طالبانو حکومت د بهرنيو چارو وزارت وياند عبدالقهار بلخي د هند تر واک لاندې د کشمير په پهلګام سيمه کې وروستی وسلهوال بريد چې له امله يې ۲۶ ملکي وګړي ووژل شول، غندلی.
بلخي ویلي، چې دا ډول بريدونه کولای شي د سيمې ثبات او امنيت له خطر سره مخ کړي.
نوموړي لیکلي: «د اسلامي امارت د بهرنيو چارو وزارت د پهلګام په سيمه کې پر سيلانيانو وروستی بريد په کلکه غندي.»
د طالبانو حکومت داسې مهال دا څرکندونې کوي، چې تر دې وړاندې دوی پخپله د ورته بريدونو مسؤلين پاتې شوي دي.
هندي رسنيو راپور ورکړی چې د هند تر کنټرول لاندې د کشمیر پت پلوامه او اننتناګ سیمو کې د دوو شکمنو کسانو کورونه د چاودېدونکو موادو په وسیله ويجاړ شوي دي.
دا کسان، چې نومونه یې عادل تاکر او آصف شيخ یاد شوي، په دې تورن دي چې د لشکر طيبه وسلهوالې ډلې غړي دي او په دې وروستيو کې د پهلګام په سيلانيزه سيمه کې د خونړي بريد سره تړاو لري.
که څه هم د هند حکومت تر اوسه په رسمي ډول د دغې پېښې په اړه څه نهدي ويلي؛ خو هندي رسنيو راپور ورکړی چې «د لشکر طيبه د هغو دوو ترهګرو کورونه چې د پهلګام بريد کې شکمن بلل کېږي، په پلوامه او اننتناګ کې ويجاړ کړل شول.»
دغه اقدامات داسې مهال ترسره کېږي چې د اپرېل په ۲۲مه د پهلګام په سيمه کې يو خونړی بريد وشو، چې له امله يې ۲۶ تنه هندي وګړي، ووژل شول.
د بلخ لپاره د طالبانو حکومت والي، یوسف وفا ویلي، د ملاهبت الله په شمول ټول ملایان د نظام مهم غړي دي.
هغه ویلي، د دوی مسوولیت له ټولو دولتي ادارو پورته دی.
نوموړي دا څرګندونې کې بلخ کې د علماوو شورا ته کړې دي.
وفا په خپلو خبرو کې ویلي، چې د نظام په تحکیم کې د علماوو ونډه زیاته ده او دوی کولای شي، چې د فرمانونو په پلي کولو کې اغېزناک واقع شي.
د پاکستان دفاع وزیر خواجه اصف وایي، تېرو درې لسیزو کې یې له ترهګرو ډلو ملاتړ ته دوام ورکړی، چې دا یو تر ټولو کثیف کار دی.
نوموړي ویلي، چې دا کار یې د غرب په اشاره کړی.
هغه له سکای نیوز سره خبرو کې ویلي: «موږ درې لسیزې د امریکا او بریټانیا په ګډون د لویدیځو هېوادونو لپاره دا ناپاک کارونه کړي دي.»
اصف دغه چاره د پاکستان ستره “تېروتنه” بللې او په خبره یې له همدې امله یې ډېر زیان هم لیدلی دی.
اصف دا څرګندونې داسې مهال کوې، چې د هند کشمېر کې پر سیلانیانو تر برید وروسته پاکستان د هند له سختو فشارونو سره مخ دی.
د دولت په چارو کې د پاکستان د کورنیو چارو وزیر طلال چودري، ویلي چې د پاکستان حکومت د ملګرو ملتونو د کارتونو (POR) لرونکو افغان کډوالو ته د جون میاشتې تر پایه پورې وخت ورکړی، څو په خپله خوښه له دغه هېواده ووځي.
پاکستاني رسنیو ویلي، چې تر دې وروسته به په جبري ډول د دغو کډوالو د اېستلو لړۍ پیل شي.
دا په داسې حال کې ده چې تېرو ۱۳ ورځو کې له ایران او پاکستان څخه ۱۳۰ زره کډوال را اېستل شوي دي.