د روسیې د بهرنیو چارو وزارت ویاندې، ماریا زاخارووا، ویلي چې امریکا د روسیې او امریکا ترمنځ راتلونکي مذاکرات لغوه کړي دي.
دغه خبرې اترې د دواړو هېوادونو د ډیپلوماتیکو اړیکو د عادي کولو لپاره پلان شوې وې.
زاخارووا د لغوه کېدو لامل نهدی څرګند کړی، خو هیله یې څرګنده کړې چې دغه وقفه اوږده نهشي.
تر دې وړاندې روسي او امریکایي چارواکو دوه ځله په استانبول کې سره لیدلي وو.
روسیې تېره اونۍ ویلي و، چې راتلونکې خبرې به په مسکو کې وشي.
د طالبانو حکومت د ریاست الوزراء اداري مرستیال مولوي عبدالسلام حنفي نن له غرمې مخکې د یوه پلاوي په مشرۍ چین ته ولاړ، ترڅو د چین – جنوبي اسیا په نهم نندارتون او فورم کې ګډون وکړي.
د طالبانو حکومت مرستیال ویاند حمدالله فطرت لیکلي، چې یاد پلاوي د چین په رسمي بلنه دغه هیواد ته سفر کړی، چې په ترکیب کې یې د طالبانو حکومت د صنعت او سوداګرۍ سرپرست وزیر نورالدین عزیزي او د بهرنیو چارو وزارت مالي او اداري معین ډاکټر محمد نعیم وردګ هم شامل دي.
ټاکل شوې ده چې مولوي عبدالسلام حنفي به د دغه سفر په ترڅ کې د نندارتون او فورم ګډون او وینا تر څنګ، د چین له یو شمېر لوړپوړو چارواکو سره هم وګوري او د دواړو هیوادونو ترمنځ د اړیکو پراختیا، اقتصادي همکاریو او نورو مهمو موضوعاتو په اړه بحث او خبرې وکړي.
د ایران د بهرنیو چارو وزیر عباس عراقچي د درې اروپايي هېوادونو د بهرنیو چارو وزیرانو سره ټیلیفوني خبرې کړې دي.
ایرنا وایي، عراقچي له اروپایي هېوادونو غوښتي چې د اسراییل روڼ تجاوز وغندي.
ده دا بریدونه د ایران پر ضد بېسارې ضربه بللي او د اسراییلي حملو په وړاندې د لویدیځو هېوادونو پر نرم دریځ یې نیوکه کړې.
د طالبانو حکومت د کانونو او پټرولیم وزارت اعلان کړی چې له چینایي شرکت «آفچین» سره د آمو سیند د نفتو ۲۵ کلن قرارداد لغوه کړی دی.
د دغه وزارت ویاند، همایون افغان، ویلي چې دا قرارداد د شرکت لهخوا د پرلهپسې سرغړونو او د ژمنو نه پوره کولو له امله فسخ شوی دی.
نوموړي ویلي، یو ګډ کمیسیون جوړ شوی و چې د شرکت تخلفات یې ارزولي او ثابته شوې چې شرکت په خپلو تعهداتو کې پاتې راغلی دی.
د طالبانو د اقتصادي مرستیال او د ریاست الوزرا دفتر له خوا د قرارداد د لغوه کولو پرېکړه تایید شوې ده.
د طالبانو حکومت له نړیوالو تجربو لرونکو شرکتونو غوښتي چې د قرارداد اسنادو د ارزونې لپاره له دوی سره رسمي اړیکه ونیسي.
د عربي او سيمې د ۲۰ هېوادونو د بهرنيو چارو وزيرانو په يوه ګډه اعلاميه کې د اسرائيل له لوري پر ايران بريدونه سخت وغندل او د تاوتريخوالي د راکمولو غوښتنه يې وکړه.
دغه اعلاميه د مصر رسمي خبري آژانس “مِنا” خپره کړې ده.
په اعلاميه کې مصر، اردن، پاکستان، بحرين، برونئی، ترکيه، چاد، الجزاير، کومور، متحده عربي امارات، جيبوتي، سعودي عربستان، سوډان، سوماليا، عراق، عمان، قطر، کوېت، ليبيا او موريتانيه هغه هېوادونه بلل شوي، چې دا بریدونه یې غندلي.
دغو هېوادونو وزيرانو د سيمې د خطرناک کړکېچ په اړه ژوره اندېښنه ښودلې او پر دې يې ټينګار کړی چې بايد د هېوادونو حاکميت او ځمکنۍ بشپړتيا ته درناوی وشي.
دوی له ټولو خواوو غوښتي چې خپل اختلافات د سولهييزو لارو هوار کړي.
همداراز، د منځني ختيځ له سيمې څخه د هستوي او نورو وژونکو وسلو د پاکېدو غوښتنه شوې او له ټولو هېوادونو غوښتنه شوې چې د هستوي وسلو د نهخپرېدو له تړون سره يو ځای شي.
د ایران دولتي رسنیو راپور ورکړی چې د اسراییلو د هوایي برید له امله د ایران صدا و سیما ټلویزیون لږ تر لږه درې تنه وژل شوي دي.
راپورونه زیاتوي چې د برید تر مخه د تهران د درېیمې ناحیې اوسېدونکو ته خبرداری ورکړل شوی و چې سیمه تخلیه کړي.
د برید له امله د ملي تلویزیون ژوندۍ خپرونې په ناڅاپي ډول بندې شوې.
یوه ویډیويي صحنه ښيي چې خبریاله د خپرونې پر مهال له خپل مېز څخه پاڅېږي او ستوډیو پرېږدي، وروسته دود د سټوډیو فضا نیسي.
ایران یو وار بیا د اسرائیل بېلابېلې سیمې په نښه کړي دي.
دا بریدونه، چې نږدې دوه ساته وړاندې شوي، د اسرائیل پلازمېنې په ګډون یې ځینې مهم ښارونه هدف ګرځولي.
یو شمېر رسنیو لیکلي، چې په دې بریدونو کې د موساد ودانۍ هم په نښه شوې.
تر اوسه د تلفاتو په اړه څه نه دي ویل شوي.
راپورونه ښيي چې د امریکا ولسمشر ډونالډ ټرمپ اداره د هغو هېوادونو شمېر پراخوي چې پر وګړو یې د امریکا سفر بندېږي.
د امریکايي رسنیو د څرګندونو له مخې، د دغې ارزونې موخه دا ده چې د ۳۶ نورو هېوادونو اتباع هم د امریکا خاورې ته د سفر اجازه له لاسه ورکړي.
د امریکا د بهرنیو چارو وزارت هم دا موضوع تایید کړې، او وایي چې اداره هڅه کوي د امنیتي دلایلو له مخې د سفر پر بندیزونو کې پراخوالی راولي.
د یادونې ده چې ولسمشر ټرمپ نږدې وخت کې یو اجرائیوي فرمان لاسلیک کړی و چې له مخې یې د ۱۲ هېوادونو اتباعو ته د امریکا ویزې بندې شوې، چې افغانستان هم په دغه نوملړ کې شامل و.
د فرانسې ولسمشر امانوئل مکرون، چې د G7 سرمشریزې لپاره کاناډا ته تللی، ویلي چې ټرمپ د ډلې مشرانو ته ویلي، چې د ایران او اسرائیل ترمنځ د اوربند لپاره خبرې روانې دي.
مکرون زیاته کړې، چې که اوربند وشي، اروپایي هېوادونه چمتو دي له ایران سره د اټومي پروګرام په اړه جدي مذاکراتو کې برخه واخلي.
هغه دا هم ویلي چې امریکا ایران ته د لیدنې وړاندیز کړی او که ټرمپ له غونډې داسې راستون شي چې د منځني ختیځ اوربند هدف نږدې شوی وي؛ نو دا یو مثبت ګام بلل کېږي.
امریکایي رسنۍ سيانان د یو امریکایي چارواکي له قوله ویلي، ډونالډ ټرمپ خپل ټیم ته ویلي چې ژر تر ژره د ایران له چارواکو سره د لیدنې هڅه وکړي.
د نوموړي په وینا، دا لیدنه د دې لپاره کېږي، ترڅو دا معلومه کړي چې تهران له اسرائیل سره د شخړې د دیپلوماتیک حل په برخه کې جدي دی که نه.
تر دې وړاندې ټرمپ ویلي وو، چې دا جګړه به هم د هند او پاکستان د جګړې په څېر حل کړي.