د امریکا د ولسمشر ډونالډ ټرمپ حکومت د هارورډ پوهنتون اجازه لغوه کړې چې بهرني محصلین ومني.

د امریکا د کورني امنیت وزارت وايي، دا پرېکړه د امنیتي اندېښنو او د یهودي زده‌کوونکو پر وړاندې د تاوتریخوالي له امله شوې ده.

دغه وزارت ادعا کوي چې پوهنتون د چین له یو شکمنې ډلې سره اړیکې درلودې او د مظاهرو پر مهال یې یهودي زده‌کوونکي خوندي نه دي ساتلي.

یاد وزارت ویلي، چې اقدام شاوخوا ۶۸۰۰ نړیوال زده‌کوونکي اغېزمنوي او ښايي راتلونکی کال کې د نویو بهرنیو محصلینو د داخلې مخه ونیسي.

بل لورته هارورډ دا پرېکړه غیرقانوني بللې او وایي له خپلو نړیوالو محصلینو به دفاع وکړي.

هارورډ پوهنتون، چې د امریکا تر ټولو پخوانی تعلیمي بنسټ دی، له ۱۰۰ څخه د زیاتو هېوادونو محصلین لري.

د ایران د بهرنیو چارو وزارت ویاند، اسماعیل بقايي، د امریکا لخوا د ایران د ساختماني سکتور پر ضد نویو بندیزونو ته سخت غبرګون ښودلی.

هغه دا بندیزونه “غیرقانوني، غیرانساني او دښمنانه” بللي او ویلي چې دا اقدامات د ایران د خلکو پر معیشت مستقیم اغېز لري او د بشریت پر ضد جرم ګڼل کېږي.

نوموړي ټینګار کړی چې دا ډول فشارونه به د ایران پرمختګ ونه شي درولی او د امریکا د دیپلوماتیکو هڅو نیت تر سوال لاندې راولي.

دا څرګندونې په داسې حال کې شوي چې ټاکل شوې په روم کې د ایران او امریکا د خبرو پنځم پړاو پیل شي.

امریکا ویلي، دا بندیزونه ځکه لګول شوي چې د ایران ساختماني سکتور له سپاه پاسداران سره تړاو لري، او لس مهم مواد لکه نکل-کروم الیاژ، منیزیم، او پرکلوریټ پکې شامل دي.

د ترکیې ولسمشر، رجب طیب اردوغان، اعلان وکړ چې نور د ولسمشرۍ په ټاکنو کې ګډون نه کوي.

هغه ویلي، چې د ولسمشرۍ د ټاکنو ته د نوماندېدو نیت نه لري او هدف یوازې د هېواد حیثیت لوړول دي.

اردوغان ټینګار وکړ چې ترکیه نوې اساسي قانون ته اړتیا لري، ځکه اوسنی قانون د کودتا میراث دی.

هغه زیاته کړې چې هېواد باید یو داسې قانون ولري چې ولسي کسان یې جوړ کړي، نه کودتاچیان.

نوموړي ویلي، د عدالت او پرمختګ ګوند د نوې اساسي قانون پر مسوده کار پیل کړی او له مخالفو ګوندونو یې وغوښتل چې په دې بهیر کې برخه واخلي.

اردوغان همداراز د وخت نه مخکې ټاکنو غوښتنې رد کړې او ویلي چې اوس د منځمهالو ټاکنو اړتیا نه لیدل کېږي.

د بلوچستان د بشري حقونو شورا وایي، روان کال اپرېل میاشت کې د پاکستان حکومت ۶۷ بلوچان وژلي.

یادې شورا یو راپور کې ویلي، چې په دغه موده کې بیا ۱۶۸ نور تري تم شوي.

راپور کې دا وژنې او نیونې غیرقانوني او صحرایي محکمې بلل شوې دي.

په نیول شویو کسانو کې بیا ۵۱ تنه محصلین دي.

د ایران د بهرنیو چارو وزیر عباس عراقچي ملګرو ملتونو نه یو لیک کې غوښتنه کړې چې امنیت شورا دې د اسرائیلو له لوري د ایران پر اتومي تاسیساتو د احتمالي برید مخه ونیسي.

دا غوښتنه وروسته له هغې شوې چې سي‌ان‌ان د ایران پر اټومي تاسیساتو د اسرائیل له لوري د برید د چمتووالي راپور ورکړی.

عراقچي ویلي، که اسرائیل برید وکړي، قاطع ځواب به ورکړل شي او خبرداری یې ورکړی که برید وشي، امریکا به هم پکې ښکېله وبلل شي.

بل‌خوا، د ایران او امریکا ترمنځ څلور پړاوه خبرې اترې په عمان کې شوي؛ خو د ایران مذهبي مشر علي خامنه‌يي ویلي، له امریکا سره خبرې ګټه نه لري.

په داسې حال کې چې د طالبانو حکومت او پاکستان ترمنځ اړیکې خړې پړې دي، چین هڅه کوي چې د دواړو هیوادونو ترمنځ اړیکې ورغوي.

په بیجینګ د طالبانو، پاکستان او چین درې اړخیزه غونډه کې پاکستان ژمنه کړې چې له طالبانو سره به ډیپلوماتیکې اړیکې پراخوي او خپل سفیر به افغانستان ته استوي.

د چارو شننونکي په دې آند دي چې د طالبانو او هند ترمنځ اړیکو پاکستان وارخطا کړی او پاکستانیان اوس هڅه کوي د خپل نږدې ستراتیژیک ملګري چین له آغیز په استفادې د طالبانو سره اړیکې عادي او د هند سره د دوي د اړیکو د پراخیدو مخه ونیسي.

څو ورځې وړاندې د هند د بهرنیو چارو وزیر جی شنکر او د طالبانو حکومت د بهرنیو چارو وزیر مولوي امیرخان متقي په ټیلیفوني خبرو کې د دواړو هیوادونو ترمنځ د اړیکو په پراخوالي خبرې کړې وې.

افغان خبریال داود جنبش د پاکستان د پوځي مشر مارشال عاصم منیر تر ټولو لوړ پوځي رتبې ته په اشارې سره یوې تاریخې مسلې ته اشاره کړې.

ښاغلي جنبش په خپل ایکس پاڼې لیکلي:« پاکستان کې، ایوب خان لومړی په ۱۹۵۸ کال کې کودتا وکړه او بیا یې یو کال وروسته خپل ځان ته د فیلډ مارشال رتبه ورکړه؛ منیر هم همدا کار کوي، خو په معکوس ترتیب سره»

تازه د شهباز شریف حکومت عاصم منیر ته د فیلډ مارشالۍ رتبه منظور کړې.

هند ته د طالب پلاوي د پټ سفر په ترڅ کې یو شمیر سرچینو چې نه یې غوښتل نوم یې واخیستل شي حماسه میډیا ته منلې چې طالب پلاوي د هند تر ټولو مشهوره مدرسه دیوبند څخه د لیدنې په ترڅ کې د طالبانو امیر شیخ هبت الله اخوندزاده ته د بلنې لیک ترلاسه کړی.

سرچینې ویلي دغه بلنه د طالبانو مشر، هبت‌الله اخندزاده، ته دارالعلوم دیوبند سره د هغه د ځانګړې مینې له امله ورکړل شوې ده.

سرچینه ادعا کوي چې د سفر پر مهال، یاد پلاوي ته د هند له ستر مفتي او د دیوبند د چارواکو له لوري یو ځانګړی لیک ورکړل شوی، چې په رسمي ډول پکې د طالبانو امیر ته د مدرسې بلنه ورکړل شوې.

ویل کېږي چې په دغه لیک کې دا هم ویل شوي چې د سفر پر مهال به هغه ته د “شیخ الحدیث والقرآن” اعزازي لقب هم ورکړل شي.)))

جاپان ټایمز په یوه راپور کې ویلي، چې کابل د اوبو له شدید کمښت سره مخ دی، او که ژر اقدام و نه‌شي، ښايي تر ۲۰۳۰ کال پورې د دې ښار ځمکنۍ اوبه پای ته ورسېږي.

راپور زیاتوي چې د نفوس زیاتوالی، اقلیمي بدلون او د ښاري پلان نشتوالي د اوبو زیرمې له سخت ګواښ سره مخ کړې دي.

جاپان ټایمز زیاته کړې، شاوخوا ۸۰ سلنه د کابل ځمکنۍ اوبه ککړې دي، او تر ۱۰۰ زرو زیاتې ناقانونه څاګانې له همدې اوبو کار اخلي.

کارپوهان وایي، سره له دې چې د ځمکنۍ اوبو بېرته تغذیه ممکنه ده؛ خو هر کال تر هغه زیاتې اوبه ایستل کېږي، چې ځای پر ځای کېږي، چې دا کار د ۷۶ میلیونه مکعب مترو په کچه کموالی راولي.

د ایران د البرز د طبي علومو پوهنتون خبر ورکړی چې د کرج د امام علي روغتون ډاکترانو وتوانېدل چې له یوه ۶۰ کلن ناروغ څخه ۴۷ تېره او فلزي پیچونه له جراحي پرته د اندوسکوپي په وسیله وباسي.

د روغتون مسوولین وايي چې عملیات بې له دې چې د ناروغ د هاضمې یا تنفسي سیستم ته زیان ورسوي، بریالی ترسره شوی او پیچونه په لنډ وخت کې اېستل شوي دي.

تر اوسه دا نه ده روښانه شوې چې دغه شمېر فلزي پیچونه څنګه د ناروغ خېټې ته تللي.