د پاکستان د بهرنیو چارو وزیر اسحاق ډار تایید کړې چې اسلام‌اباد او نوي‌ډیلي د فوري اوربند پرېکړه کړې ده.

هغه ویلي، پاکستان تل د سیمې د سولې لپاره هڅه کړې، پرته له دې چې د خپلې خاورې پر حاکمیت معامله وکړي.

تر دې وړاندې، د امریکا ولسمشر ډونالډ ټرمپ هم اعلان کړی و چې دا اوربند د امریکا په منځګړیتوب ترسره شوی دی.

دغه اوربند په داسې حال کې شوی چې تېرو څلورو ورځو کې دواړو هېوادونو یو بل ته توغندیز او ډرون بریدونه کړي وو.

راپورونه ښيي چې په دې بریدونو کې لږ تر لږه ۶۶ ملکي وګړي د دواړو خواوو پر پوله وژل شوي دي.

د امریکا ولسمشر ډونالډ ټرمپ اعلان کړی چې د هند او پاکستان ترمنځ د امریکا په منځګړیتوب د اوږدو خبرو وروسته، دواړو هېوادونو پر یو بشپړ او سمدستي اوربند هوکړه کړې ده.

نوموړي دا څرګندونې پر خپلې رسنۍ سوشل تروت کړې دي.

هغه خوښي څرګنده کړې، چې دواړه لوري اوربند ته رسېدلي.

د یادونې ده، چې له څو ورځو راهیسې، دواړو لوریو پر یو بل سخت بریدونه پیل کړي وو.

د امریکا د بهرنیو چارو وزیر مارکو روبیو ویلي، چې په تېرو ۴۸ ساعتونو کې، ده او د امریکا مرستیال ولسمشر وینس د هند او پاکستان له لوړپوړو چارواکو سره جلا جلا خبرې کړې دي.

روبیو ویلي، چې دا اړیکې د دواړو هېوادونو صدراعظمانو نریندرا مودي او شهباز شریف، د هند د بهرنیو چارو وزیر جې شنکر، د پاکستان د پوځ لوی درستیز عاصم منیر، او د دواړو هېوادونو د ملي امنیت سلاکاران اجیت دووال او عاصم ملک سره نیول شوې دي.

نوموړي زیاته کړې، چې د دغو خبرو پایله کې، دواړو هېوادونو سمدستي اوربند ته غاړه ایښې او هوکړه یې کړې چې د یوه بې پرې ځای په ټاکلو سره به د ټولو مهمو موضوعاتو په اړه رسمي خبرې پیل کړي.

نن په کابل کې د افغانستان، پاکستان او چین ترمنځ درې اړخیزه غونډه جوړه شوې.

دغه غونډه د طالبانو د بهرنیو چارو وزارت په کوربه توب ترسره شوه، چې پکې د دواړو ګاونډیو هېوادونو لوړپوړو استازو ګډون کړی و.

د افغانستان لپاره د پاکستان ځانګړي استازي محمد صادق په خپله ایکس پاڼه لیکلي، دا غونډه یوه مهمه موقع وه چې درې واړه هېوادونه پکې د اقتصادي او امنیتي همکاریو پر پراخېدو او د سیمې پر ثبات خبرې اترې وکړي.

صادق زیاتوي، دا ډول غونډې کولای شي د سیمې هېوادونه د ګډو اهدافو لپاره نږدې کړي، د اړیکو نوی باب پرانیزي او د ستونزو د حل لپاره همغږي رامنځته کړي.

د غونډې نور جزییات تر اوسه نه‌دي خپاره شوي.

پر نور خان هوايي ډګر د هند تر برید څو ساعته وړاندې د پاکستان پي ایس ایل لیګ ته راغلي بهرني لوبغاړي په یوه چارتر الوتکه کې اېستل شوي دي.

دغه لوبغاړي او نور اداري او تخنیکي کارکوونکي د هوايي ځواک په ملتیا اېستل شوي دي.

که څه هم پاکستان پرېکړه کړې چې د پي ایس ایل پاتې لوبې به دوبۍ کې ترسره کړي؛ خو هندي رسنیو ویلي، چې اماراتو د دغو سیالیو له کوربه توب انکار کړی.

د پاکستان د دفاع وزیر خواجه محمد اصف د لومړي وزیر شهباز شریف په مشرۍ د ملي قومندې ادارې غونډې رابلل رد کړي دي.

تر دې وړاندې، د رویټرز خبري آژانس د پاکستان د پوځ له قوله راپور ورکړی و چې شهباز شریف غواړي د ملي قومندې ادارې غونډه راوبلي، څو پکې د ځمکنیو، هوایي او سمندري عملیاتو پلانونه او د اټومي وسلو د کارولو یا نه کارولو په اړه پرېکړې وشي.

دا په داسې حال کې ده، چې هند د پاکستان یو اټومي مرکز هم په نښه کړی وو.

د طالبانو حکومت د دفاع وزارت د پاکستان هغه اوازې رد کړې، چې ګواکې هند د افغانستان خاوره هم په نښه کړې.

د دغه وزارت ویاند عنایت الله خوارزمي ویلي، چې په دې اړه د پاکستاني چارواکو ادعا له حقیقت لرې ده.

تر دې وړاندې بیا هند هم دا ادعا بې اساسه او خندونکې بللې وه.

پاکستان ویلي وو، چې هند د افغانستان یو شمېر سیمې هم په نښه کړې دي.

د هند د بهرنیو چارو وزارت مرستیال ویکرم مسري د پاکستان د پوځ هغه ادعا خندونکې بللې چې ګواکې د هند ځینې توغندي د افغانستان پر خاوره لګېدلي دي.

نوموړي د یوې خبري ناستې پر مهال خبریالانو ته ویلي:«د افغانستان خلکو ته مه ور یادوئ، چې په تېر یو نیم کال کې د افغانستان بنسټونه او بې‌ګناه افغانان چا په نښه کړي دي.»

دغه څرګندونې وروسته له هغې کېږي چې د پاکستان پوځ نن سهار ادعا وکړه، چې د هند د توغندیزو بریدونو د افغانستان خاوره هم هدف ګرځولې ده.

د طالبانو حکومت تر اوسه په دې اړه څه نه دي ویلي.

د امریکا د بهرنیو چارو وزیر مارکو روبیو له خپلو هندي او پاکستاني سیالانو، محمد اسحاق ډار او جې شنکر سره په جلا جلا ټیلیفوني اړیکو کې د دواړو هېوادونو ترمنځ د روان کړکېچ په اړه خبرې کړې دي.

روبیو له نوې ډیلي او اسلام‌اباد غوښتي چې د ترینګلتیا د کمولو لپاره جدي هڅې وکړي او د تاوتریخوالي د لا زیاتېدو مخه ونیسي.

د امریکا د بهرنیو چارو وزیر همداراز د جګړې د مخنیوي او د وضعیت د ارامولو په موخه د هند او پاکستان ترمنځ د خبرو اترو لپاره د واشنګټن د همکارۍ وړاندیز هم کړی دی.

د افغان سولې لپاره د امریکا پخواني ځانګړي استازي، زلمي خلیلزاد ویلي، چې د هند او پاکستان ترمنځ روانه شخړه د اندېښنې وړ ده.

نوموړي پر خپله ایکس‌پاڼه لیکلي، چې دا جګړه اوس خطرناک پړاو ته رسېدلې ده.

هغه ویلي: «دواړه هېوادونه اوس خپل حیاتي نظامي تاسیسات د برید د هدفونو په لیست کې شاملوي. دا وضعیت ډېر د اندېښنې وړ دی.»

نوموړی دا څرګندونې داسې مهال کوي، چې اوس مهال هند او پاکستان په یو بل بریدونو ته زور ورکړی.