هندوستان ټایمز ویلي، چې د طالبانو حکومت د بهرنیو چارو وزیر امیرخان متقي د هند د بهرنیو چارو له وزیر جي‌شنکر سره په تلیفوني خبرو کې د پاکستان هغه ادعاوې رد کړې چې ګواکې هند د افغانستان په خاوره د توغندیو برید کړی.

هندوستان ټایمز زیاتوي، چې متقي دا راپورونه «بې‌اساسه» بللي او ویلي، چې دا ډول هڅې د کابل او نوي‌ډهلي ترمنځ د بې‌باورۍ د رامنځته کولو لپاره دي.

یادې رسنۍ دغه راز ویلي، چې دواړو لوریو د اقتصادي همکاریو د پراخېدو، د سوداګرۍ د خنډونو د لرې کولو، او د افغان مهاجرو د مرستې پر اړتیا هم خبرې کړې.

هندوستان ټایمز زیاته کړې، چې په دې تلیفوني تماس کې جي‌شنکر یو ځل بیا ټینګار کړی چې د افغانستان لپاره د ټول‌شموله حکومت جوړېدل ضروري دي، او باور لري چې د افغانستان خاوره باید د هېڅ بل هېواد پر ضد د ترهګرۍ لپاره ونه کارول شي.

د ټولنیزو رسنیو ګڼو کارونکو لیکلي، چې «جنرال» مبین د طالبانو حکومت له زندان څخه خوشې شوی؛ خو تازه یو شمیر سرچینو حماسه میډیا ته ویلي چې نوموړی نه دی خوشې شوی او لاهم زنداني دی.

ټولنیزو رسنیو کې د «جنرال» مبین یوه زړه ویډیو لاس په لاس کیږي چې په کې لیدل کیږي نوموړی له زندان څخه خلاص شوی او پلویان یې هرکلی کوي؛ خو سرچینې وایي چې یاده ویډیو پخوانۍ ده.

تر دې وړاندې یو شمېر راپورونو کې ویل شوي چې «جنرال» مبین د طالبانو د حکومت له لوري په یونیم کال بند محکوم شوی دی.

د امریکا د ملي امنیت پخواني سلاکار جان بولټن ویلي، ایران د حماس ډلې له بریدونو وروسته سخت زیان لیدلی او اوس هڅه کوي چې د اسرائیل د احتمالي بریدونو مخه ونیسي.

بولټن وايي، د ایران نیابتي ډلې کمزورې شوې او د نفتو صادرات یې تر یوې کچې بندیزونو لاندې دي، چې له امله یې ایران سخت فشار احساسوي.

نوموړي زیاته کړې، ایران غواړي یو بهیر پیل کړي څو د خپلو اټومي تاسیساتو لپاره د اسرائیلي بریدونو مخنیوی وکړي؛ خو هېڅ داسې نښه نشته چې دې هېواد دې له اټومي وسلو د لاس اخیستو پرېکړه کړې وي.

بولټن دغه مذاکرات د وخت تېروونې لپاره د ایران کلاسیکه دیپلوماسي وبلله او ویې ویل، ایران ته د یورانیمو د غني‌سازۍ اجازه ورکول یوه مرګونې تېروتنه ده.

هغه دغه راز ویلي، د خلیج عربي هېوادونه به د ایران د اټومي پروګرام له منځه وړلو هرکلی وکړي.

د امریکا ولسمشر ډونالډ ټرمپ نن د خلیج هېوادونو تر څلور ورځني سفر وروسته له ابوظبۍ څخه واشنګټن ته روان شو.

ټرمپ د دې سفر په ترڅ کې سعودي عربستان، قطر او متحده عربي اماراتو ته ولاړ.

راپورونه وایي، د دغه سفر پر مهال ابوظبۍ ژمنه وکړه، چې د امریکا د انرژۍ په برخه کې به خپلې پانګونې په راتلونکې لسیزه کې ۴۴۰ میلیارده ډالرو ته ورسوي.

د یادونې ده، چې ټرمپ په دې سفر کې له عرب هېوادونو سره په پراخه کچه تړونونه وکړل.

د ګلبدین حکمتیار زوی حبیب الرحمن حکمتیار وایي، له پاکستان سره د افغانستان د یو ځای کولو د طرحې په اړه د ده پر پلار لګېدلي تورونه حقیقت نه لري.

نوموړی وایي، د ده پلار یوازې یو تحلیل کړی؛ نه پرېکړه او یو شمېر خلک د تحلیل د ارزولو پرځای عقدوي چلند کوي.

حکمتیار وایي، د ده پلار نه؛ بلکې اشرف غني پر فرضي کرښه معامله وکړه او پاکستان ته یې اجازه ورکړه چې اغزن تار تېر کړي.

نوموړي په پیغوریزه بڼه ویلي، هغه چې د ده په پلار نیوکه کوي، باید خپل ګرېوان کې وګوري، چې دوی څه کړي دي.

تر دې وړاندې د ګلبدین حکمتیار هغو خبرو ته، چې ګواکې د پاکستان تجزیه د افغانستان تجزیه ده؛ د چارو ادارې پخواني رئیس فضل محمود فضلي ویلي، چې حکمتیار له تېرو پنځو دېرش کالو راهیسې غوښتل ترڅو افغانستان د پاکستان برخه کړي.

د هند او پاکستان ترمنځ د کړکېچ تر حل وروسته، په لاهور کې ولاړو ۱۵۰ افغان سوداګریزو لاریو ته د واګه بندر له لارې هند ته د داخلېدو اجازه ورکړل شوه.

دا لارۍ چې تازه او وچه مېوه پکې بار وه، له تېرو دوو اونیو راهیسې بندر ته څېرمه درول شوې وې.

تر اوسه پنځه لارۍ هند ته داخلې شوي او تمه ده پاتې نورې هم په یوه اونۍ کې داخل شي.

دا پرمختګ د هند او طالبانو د بهرنیو چارو وزیرانو تر ټلیفوني خبرو وروسته شوی، چې د دواړو لورو له‌خوا رغوونکی بلل شوی دی.

د جمهوري حکومت د چارو ادارې رئیس فضل محمود فضلي وایي، د پاکستان د پوځي مشر جنرال ایوب خان هغې خبرې ته اشاره کوي چې د دې هېواد د امنیت شورا په یوه ناسته کې افغانستان د ستونزو د حل لپاره د خپلو “ستراتیژیکو بمونو” چې موخه یې مذهبي افراطیان و کار واخیستل شي.

ډاکتر فضلي د حزب اسلامي مشر انجنیر ګلبدین حکمتیار د دغو ستراتیژیکو بمونو یوه بیلګه یادوي.

نوموړی وایي، له نن پنځه دېرش کاله وړاندې ۱۹۸۹ کال د پاکستان د استخباراتو رئیس اسد دراني سره منلې وه، چې د ډاکټر نجیب‌الله د حکومت له سقوط وروسته به د افغانستان او پاکستان ترمنځ کنفډراسیون جوړ او افغانستان به عملاً له پاکستان سره یوځای شي.

ښاغلي حکمتیار د جمهوریت په وروستیو کې په خپله مرکه کې ددې موقف څخه دفاع وکړه او پوښتي وو که د افغانستان او پاکستان ترمنځ کنفډریشن جوړ او مرکز یې کابل وي څه ستونزه لري؟

فضلي، حکمتیار تورنوي چې له پاکستان سره په ګډه هرکال دغه ناکامه پلان په بېلابېلو الفاظو تکراروي.

نوموړی لیکلي:«نن حکمتیار د پاکستان د تجزیې له امله د افغانستان د تجزیې نارې هم وهي؛ خو دی باید وپوهیږي، چې دا چاره ناممکنه ده.»

د یادونې ده چې د حزب اسلامي مشر ګلبدین حکمتیار ویلي وو، چې که پاکستان تجزیه کېږي؛ نو دا به د افغانستان د تجزیې سبب هم وي.

بلوڅ ازادي غوښتونکو ویلي، چې دوی تېره ورځ د کیچ ولسوالۍ د دشت په چوټ بازار کې د CPEC سړک پر غاړه د زونګ شرکت یو د جاسوسۍ لپاره نصب شوی موبایل ټاور په ډزو ویشتلی.

خبرپاڼه کې راغلي، چې دوی دغه ټاور کې ټول تخنیکي ماشینونه سوځولي دي.

بلوڅو ویلي، چې د پاکستان د دولت مخابراتي وسیلې، استعماري اقتصادي پروژې او پوځ به تر اخره پورې خپل هدف وګرځوي.

د سوریې د ځمکنيو او بحري بندرونو عمومي ادارې اعلان کړی چې له دبۍ ورلډ شرکت سره یې د ۸۰۰ میلیونه ډالرو په ارزښت د تفاهم یادداشت لاسلیک کړی دی.

دا تړون د طرطوس بندر د یو څو اړخیز ترمینل د پراختیا، مدیریت او کارونې لپاره دی، چې هدف یې د بندري زیربناوو پیاوړتیا او عملیاتي ظرفیت لوړول دي.

د طرطوس بندر اداره له ۲۰۱۹ کال راهیسې روسي شرکت «ستروي ترانس‌ګاز» ته ۴۹ کلن قرارداد ورکړی و، خو د سوریې نوې حکومت دا قرارداد لغوه کړ.

د ۲۰۲۵ جنورۍ میاشت کې، الوطن ورځپاڼې د طرطوس د ګمرکاتو رئیس ریاض جودي له خولې راپور ورکړی و چې پخوانی قرارداد لغوه شوی او د بندر عواید به د سوریې د داخلي ګټو لپاره ولګول شي.

وروسته تر هغې، چې رسنیو د پاکستان او هند د جګړې پر مهال هند ته د لوړ پوړي طالب چارواکي صدر ابراهیم له سفر خبر ورکړ؛ اوس تازه هندي ورځپاڼو ویلي، چې دا سفر اغېزناک وو.

سنډي ګارډین لیکلي، چې لوړ پوړی طالب چارواکی صدر ابراهیم د پاکستان خلاف انتقادي فکر لري او دا سفر ځکه مهم دی، چې له طالبانو سره د نویو او پټو اړیکو چینل جوړ شوی.

دا سفر د هند او پاکستان ترمنځ د جګړې پرمهال شوی.

تېره شپه بیا جي شینکر هم ویلي و، چې له امیرخان متقي سره یې خبرې کړې دي.