ټاکل شوې چې د پاکستان د پوځ ویاند به یو مهم خبري کنفرانس ولري.

دا کنفرانس نن پېښور کې ترسره کېږي.

تر اوسه په دې اړه زیات جزیات نه دي ورکړل شوي.

د یادونې ده چې دغه کنفرانس پر کابل تر بربد یوه ورځ وروسته ورکول کېږي.

تحریک طالبان پاکستان یا ټي‌ټي‌پي ویلي، چې د دوی مشر نورولي محسود ژوندی دی او هغه هیڅکله کابل کې نه و.

ټي‌ټي‌پي زیاته کړې، چې موږ د کرښې پورې غاړه د پاکستان د پوځ پر وړاندې خپل جهاد ته دوام ورکوو.

ټي‌ټي‌پي د خپل مشر نور ولي محسود یوه غږیزه ثبت شوې مرکه خپره کړې، چې پکې د نېټې او وخت یادونه شوې او هغه پخپله وایي چې ژوندی دی.

راپور زیاتوي، چې د محسود څو غږیز پیغامونه په بېلابېلو رمز شوو (encrypted) ډلو کې خپاره شوي، څو د هغه د ژوند ثبوت وړاندې کړي.

بل لورته یو شمېر پاکستاني اکونټونو لیکلي، چې د کابل ښار په عبدالحق څلورلارې کې په لنډکروزر موټر کې پاکستاني جنګي الوتکو د ټي‌ټي‌پي مشر مفتي نور ولي محسود وژلی.

د طالبانو حکومت ویاند ذبیح الله مجاهد وایي، په کابل ښار کې د یوې چاودنې غږ اوریدل شوی؛ خو خلکو ته د اندېښنې اړتیا نشته.

نوموړي زیاته کړې، چې د پېښې د څرنګوالي معلومولو لپاره څېړنې روانې دي او تر اوسه د مرګ‌ژوبلې یا زیانونو په اړه کوم راپور نه‌دی ترلاسه شوی.

مجاهد داسې مهال دا څرکندونې کوي چې د کابل ښار اوسیدونکي وایي، چې پاکستاني جیټ الوتکو د کابل په هوایي ډګر او د کارته نو باګرامیو کې نظامي ځایونه په نښه کړي دي.

یو شمېر باوري سرچینو په تازه معلوماتو کې حماسه میډیا ته ویلي، نن ماښام په کابل ښار کې دوه جلا ډرون بریدونه یو د عبدالحق څلور لارې په سیمه کې ترسره شوی، چې پکې یو لنډکروزر موټر ویشتل شوی دی.

د سرچینو په وینا، بل برید بیا د کارته نو په سیمه کې په یو استوګنیز کور شوی دی.

تر اوسه معلومه نه ده چې په دغه بریدونو کې څوک په نښه شوي.

یوې باوري سرچینې چې نه یې غوښتل نوم یې واخیستل شي حماسه میډیا ته وویل چې پاکستاني جیټ الوتکو د کابل هوایي ډګر او د کارته نو باګرامیو کې نظامي ځایونه په نښه کړي دي.

تردې مهاله د اوښتې زیان په اړه مالومات نشته.

هڅه مو وکړه په دې اړه د طالبانو د کابل امنیه قوماندانۍ او کورنیو چارو وزارت نظر واخلو خو هغوې په دې اړه څه ونه وویل.

دا خبر وروسته بشپړیږي.

د کابل هوایي ډګر ته څیرمه د چاودنو او ډزو غږونه اوریدل شوي.

د سیمې اوسیدونکو حماسه میډیا ته وویل چې د هوایي ډګر شاوخوا څخه د سختو ډزو او پرلپسې چاودنې اوریدل کیږي.

طالبانو تردې مهاله په دې اړه څه نه دي ویلي.

د ازادۍ په نوم جبهې ادعا کړې چې وړمه شپه یې په کابل کې درې طالب سرتېرو ته مرګ‌ژوبله اړولې ده.

د یادې جبهې په وینا، دا چریکي برید د کابل د ارزان‌قیمت په مسیر، د بنایي په سیمه کې ترسره شوی، چې په ترڅ کې یې دوه طالبان وژل شوي او یو بل ټپي شوی دی.

تر اوسه د طالبانو حکومت په دې اړه څه نه دي ویلي.

د افغانستان لپاره د پاکستان ځانګړي استازي محمد صادق خان ویلي، افغانستان دا مهال د اقتصادي بندیزونو، بانکي محدودیتونو، بې‌کارۍ، فقر او د اقلیمي بدلونونو له امله د بشري کړکېچ له سخت وضعیت سره مخ دی.

نوموړي د مسکو د فارمت اوومې ناستې ته ویلي، له نړیوالې ټولنې سره د افغانستان نه‌ادغام د سیمې د ثبات او همکارۍ هڅې کمزورې کړې دي.

هغه ټینګار کړی چې د مسکو فارمټ د سولې او ثبات د پیاوړتیا مهم سیمه‌ییز چوکاټ دی، او له ګاونډیو هېوادونو یې غوښتي چې د یوه باثباته افغانستان د ملاتړ لپاره خپلې هڅې زیاتې کړي.

د جمهوري نظام د کورنیو چارو وزارت د پالیسي او ستراتیژۍ پخواني معین صدیق صدیقي ویلي، د طالبانو د بهرنیو چارو وزیر امیرخان متقي سفر هند ته د نوې جیوپولیتیکې لوبې پیل ته اشاره کوي.

ښاغلي صدیقي په خپله ایکس‌پاڼه لیکلي، داسې ښکاري چې چین، هند او ایران په ظاهر د طالبانو د ملاتړ په لور روان دي؛ خو د هر هېواد تر شا بېلابېل او پټ اهداف پراته دي.

د هغه په وینا، ایران، روسیه او هند غواړي د طالبانو ملاتړ وکړي څو د امریکا د بیا حضور مخه په افغانستان کې ونیسي، او هند هڅه کوي د طالبانو له نفوذ څخه د پاکستان پر ضد د تحریک طالبان پاکستان په مهارولو کې ګټه واخلي.

صدیقي زیاتوي، پاکستان که څه هم د دغو هېوادونو سره په ښکاره د امریکا د نه‌ستنېدو په هدف هم‌نظر دی؛ خو له هند سره په یوه جبهه کې نه شي درېدای.

هغه پوښتنه راپورته کړې چې اوس پاکستان به کومه لاره غوره کړي؟ ایا امریکا به بېرته لوبې ته راکاږي؟

د نوبل جایزې کمیټې د اکتوبر پر ۸مه اعلان وکړ چې ډاکټر عمر یاغي، فلسطیني الاصله ساینسپوه، د جاپاني سوسومو کیتاګاوا او استرالیایي ریچارد رابسن سره په ګډه د کیمیا په برخه کې د ۲۰۲۵ کال نوبل جایزه ترلاسه کړې ده.

ډاکټر یاغي په عمان کې د فلسطیني کډوالو په کمپ کې زېږېدلی او اوس د کالېفورنیا پوهنتون استاد دی.

هغه د جایزې تر اعلان وروسته وویل: «زه په بېوزله کورنۍ کې لوی شوی یم، دا یو اوږد او ستونزمن سفر و.»

د نوبل کمیټې په وینا، درې واړو ساینسپوهانو د فلزي او کووالنټ عضوي چوکاټونو د جوړښت او پرمختګ له لارې د کیمیا په علمي او صنعتي برخو کې بنسټیز بدلونونه رامنځته کړي دي.

نوموړی به خپله جایزه د ډسمبر پر ۱۰مه د سویډن په پلازمېنه سټاکهولم کې ترلاسه کړي.