د افغان سولې لپاره د امریکا پخواني ځانګړي استازي زلمي خلیلزاد د طالبانو حکومت د مشر، شیخ هبت الله اخندزاده، له لوري پر ډیموکراسۍ شویو نیوکو ته غبرګون ښودلی دی.

خلیلزاد وایي، افغانان حق لري چې د خپلې خوښې د حکومت ډول وټاکي؛ خو شیخ هبت الله ته یې توصیه کړې چې دې ته پام وکړي، چې بریالي، باثباته او شتمن هېوادونه ولسواک نظامونه لري.

نوموړي د ولسواکۍ اهمیت ته په اشارې ویلي چې د بریالي هېواد راز په ډيموکراتیک نظام کې نغښتی دی.

دا په داسې حال کې ده چې شیخ هبت الله د لوی اختر په مناسبت په خپله وینا کې یو ځل بیا پر ډیموکراسۍ سختې نیوکې وکړې او د شرعي نظام پر پلي کېدو یې ټینګار وکړ.

د طالبانو حکومت له واک ته رسېدو راهیسې نه یوازې په هېواد کې ولسواک نظام ختم کړی، بلکې د خپل مدعي شرعي نظام له مخې یې پر ښځو او نجونو د زده کړو، کار، او نورو بنسټیزو حقونو بندیزونه لګولي دي.

د تسنیم خبري آژانس د راپور له مخې، د اسراییلو په وروستي برید کې د ایران شپږ مهم اتومي ساینسپوهان وژل شوي دي.

وژل شويږ کسانو کې سید امیرحسین فقهی، عبدالحمید مینوچهر، احمدرضا ذوالفقاري، مطلبي‌زاده، محمد مهدي تهرانچي، او فریدون عباسي شامل دي.

همداراز، د ایران درې لوړپوړي نظامي مشران، محمد باقري، حسین سلامي، او غلام علي رشید هم په برید کې وژل شوي دي.

د ایران حکومت ویلي، چې د دغه بریدونو سخت غچ به واخلي او په اسراییلو به خوب حرام کړي.

د پاکستان لومړي وزیر شهباز شریف د اسراییلو له‌خوا پر ایران ترسره شوی هوایي برید په کلکه غندلي او دا یې یو بې‌دلیله، خطرناک او نامسوولانه اقدام بللی دی.

شریف ویلي، دغه ډول اقدامات د سیمې د لا زیاتې بې‌ثباتۍ لامل ګرځي او د اندېښنې وړ دي.

نوموړي ټینګار کړی چې دا وضعیت نه یوازې د ایران، بلکې د ټولې سیمې او نړۍ لپاره خطرناک دی.

هغه له نړیوالې ټولنې غوښتي چې د تاوتریخوالي د پراخېدو د مخنیوي لپاره سمدستي او اغېزمن ګامونه پورته کړي.

د اسراییلو رسنیو د یوې امنیتي سرچینې له قوله راپور ورکړی چې موساد په ایران کې یوه پټه اډه د ځانمرګو بې‌پيلوټه الوتکو لپاره جوړه کړې وه.

دغه بې‌پيلوټه الوتکې له اوږدې مودې وړاندې ایران ته داخل شوې وې او د اسراییلو ځینې توغندي هم د ایران له خاورې څخه توغول شوي دي.

سرچینه زیاتوي چې موساد او د اسراییلو پوځ د ایران پر ستراتیژیکو توغندیو پټ او پیچلې عملیات ترسره کړي دي.

راپورونه وایي چې د موساد ځانګړو ځواکونو په ایران کې په مرکزي سیمو کې دقیقې هدایت شوې وسلې له مخکې ځای پر ځای کړې وې.

د طالبانو حکومت د اسراییلو له‌خوا پر ایران وروستي بریدونه په کلکو ټکو غندلي دي.

د طالبانو حکومت ویاند ذبیح‌الله مجاهد دا بریدونه د نړیوالو اصولو، ملي حاکمیت او د ایران د خاورې د بشپړتیا پر ضد څرګنده سرغړونه بللې ده.

مجاهد ویلي چې دغه بریدونه په داسې حال کې شوي چې د فلسطین خلک په غزه کې د اسراییلو له سختو حملو سره مخ دي.

هغه دغه راز ویلي، چې اسراییل د بشري او نړیوالو قوانینو احترام نه کوي.

نوموړي ټینګار کړی چې د تاوتریخوالي دوام د سیمې امنیت نور هم زیانمن کړی او له ټولو اړخونو یې غوښتنه کړې چې د سیمې د سولې او ثبات لپاره مسؤلانه چلند وکړي او د ناامنیو مخه ونیسي.

د افغانستان د پخواني حکومت د ملي روغې جوړې د عالي شورا مشر، ډاکټر عبدالله عبدالله، د اسراییل له لوري پر ایران ترسره شوي وروستي هوایي بریدونه په کلکه غندلي او دا یې یو ښکاره تیری بللی دی.

عبدالله په یوه خپره کړې اعلامیه کې د بریدونو له امله د ایران له ولس سره ژوره خواخوږي څرګنده کړې او د وژل شویو ایرانیانو د کورنیو ته یې تسلیت ویلی دی.

هغه د پېښې قربانیان “بې‌ګناه ملکي وګړي او چارواکي” بللي چې د ده په وینا، د یوې ناروا یرغلګرې حملې ښکار شول.

نوموړي له نړیوالو بشري او سیاسي بنسټونو او د اسلامي همکاریو له سازمان غوښتي، چې د اسراییلي رژیم پر ضد چوپ پاتې نه شي او د دې نامشروع او جنایتکارانه بریدونو د مخنیوي لپاره باید عملي اقدامات ترسره کړي.

عبدالله ټینګار کړی چې دا ډول بریدونه نه یوازې د نړیوالو قوانینو خلاف دي، بلکې د سیمې امنیت او ثبات ته هم جدي ګواښ پېښوي.

د افغانستان پخواني ولسمشر حامد کرزي د اسراییلو له‌خوا پر ایران وروستي بریدونه سخت غندلي او دا یې د نړیوالو اصولو سره ښکاره مخالفت بللی دی.

کرزي ویلي، بریدونه چې له امله یې ملکي تلفات او تاوانونه اوښتي، د نړیوالو قوانینو خلاف دي.

هغه ایران د افغانستان نېک ګاونډی یاد کړی او ویلي چې دغه هېواد تل له افغانانو ملاتړ کړی دی.

نوموړي ټینګار کړی چې نړۍ اوس سولې او ثبات ته اړتیا لري او جګړې د بشریت لپاره ستر ګواښ دی.

کرزي له ټولو هېوادونو غوښتي چې د نړیوالو اصولو درناوی وکړي او د سولې لپاره هڅې وکړي.

نوموړي د ایران له خلکو سره خواخوږي څرګنده کړې او د قربانیانو لپاره یې دعا کړې ده.

د سعودي عربستان د بهرنیو چارو وزارت د اسراییلو له لوري پر ایران بریدونه په کلکه غندلي دي او دا یې د ایران د حاکمیت ښکاره نقض بللی دی.

دغه وزارت ویلي چې دا بریدونه د نړیوالو قوانینو خلاف دي او له نړیوالې ټولنې یې غوښتي چې سمدستي د اسراییلو دغه یرغل ودروي.

د یادونې ده چې نن سهار د اسراییلو په بریدونو کې د ایران لوړپوړي پوځي مشران او اتومي ساینسپوهان وژل شوي دي.

د بریتانیا لومړي وزیر، کی‌یر استارمر، ویلي چې د اسراییلو له لوري پر ایران بریدونه د اندېښنې وړ دي او ټول لوري باید شاتګ وکړي او کړکېچ راکم کړي.

د بریتانیا د بهرنیو چارو وزیر، دیوید لمي، هم ویلي چې په منځني ختیځ کې ثبات د نړیوال امنیت لپاره حیاتي اهمیت لري.

هغه خبرداری ورکړی چې د کړکېچ زیاتوالی د سیمې لپاره جدي ګواښ دی او زیاته کړې یې ده چې دا یو خطرناک پړاو دی، او له ښکېلو لورو یې غوښتي چې زغم وښيي.

د اسراییلو لومړي وزیر بنیامین نتانیاهو، پر ایران تر نظامي برید وروسته، د ایران خلکو ته په یوه پیغام کې ویلي چې ایراني رژیم نږدې پنځوس کاله د هغوی د ښه ژوند فرصت له منځه وړی دی.

هغه ټینګار کړی چې د آزادۍ ورځ د پخوا په پرتله نږدې شوې او زیاته یې کړه چې کله هغه ورځ راورسي، اسراییلي او ایراني ملتونه به یو ځل بیا خپل تاریخي اړیکي تازه کړي او یو ګډ، هوسا، سوله‌ییز او هیله‌مند راتلونکی به جوړ کړي.

نتانیاهو دا هم ویلي، چې اسراییل د آزادې نړۍ دفاع کوي، د هغه ترهګرۍ او تاوتریخوالي مخه نیسي چې د ایران رژیم یې تولیدوي او صادروي.