د هندي رسنیو د راپورونو له مخې، د طالبانو حکومت د بهرنیو چارو وزیر مولوي امیرخان متقي ټاکل شوې وه نن یکشنبه د آګرې ښار د تاریخي تاج محل له ودانۍ څخه لیدنه وکړي؛ خو دا سفر په وروستیو شېبو کې لغوه شوی دی.
د آګرې پولیسو ویلي چې د سفر د لغوه کېدو امر له نوي ډېلي څخه ورکړل شوی دی.
سرچینې زیاتوي چې د سفر د لغوه کېدو لامل لا نه دی څرګند؛ خو چارواکي وایي د امنیتي او دیپلوماتیکو دلایلو له مخې دا پرېکړه وشوه.
د پاکستان لومړي وزیر شهباز شریف د طالبانو حکومت له لوري د تېرې شپې پر سرحدي پوستو د بریدونو په غبرګون کې ویلي، د پاکستان پوځ چټک او اغېزمن ځواب ورکړی دی.
د لومړي وزیر د دفتر په وینا، بریدونه د افغانستان له خاورې د انګور اډې، باجوړ، کرم، دیر، چترال او بهرامچې په ګډون څو سیمو کې ترسره شوي دي.
په اعلامیه کې راغلي چې د دغو بریدونو په ځواب کې د پاکستان پوځ د “یاغیانو څو ځایونه” په نښه کړي دي.
شهباز شریف ټینګار کړی چې هېواد به د خپلې ځمکنۍ بشپړتیا دفاع وکړي او هیڅ ډول تېری به بې ځوابه پاتې نه شي.
هغه د پوځ د کړنو ستاینه کړې او ویلي یې دي چې د پاکستان ولس د خپلو ځواکونو تر شا ولاړ دی.
د طالبانو حکومت ویاند ذبیح الله مجاهد ویلي، چې په پاکستان کې ځانګړي کسان د «اسلامي امارت» پر ضد دسيسې جوړوي.
نوموړي زیاته کړې، چې دغه کسان د افغانستان د امنیت د ښه والي او سیاسي، اقتصادي او ټولنیزو پرمختګونو پر وړاندې ناخوښ دي.
هغه دغه راز ویلي، چې دغه کسان د پاکستان د پوځ یوه حاکمه ډله ده چې له افغانستان سره ښې اړیکې نه لري او له همدې امله دسيسې جوړوي.
د طالبانو حکومت ویاند ذبیح الله مجاهد کابل کې خبري کنفرانس ته ویلي، چې پاکستان د داعش خراسان څانګې غړي پټوي.
هغه له پاکستانه غوښتي چې د داعش مهم غړي ونیسي یا یې افغانستان ته وسپاري.
نوموړي ادعا کړې چې د داعش نوې روزنیزې مرکزونه د خیبر پښتونخوا په سیمه کې جوړ شوي دي.
مجاهد دغه راز ویلي، چې افغانستان د خپل سرحد او هوايي حریم د دفاع حق لري.
په عین حال کې مجاهد د بهرنیو چارو د وزیر مولوي امیرخان متقي د هند سفر “یو عادي دوه اړخیز تعامل” بللی او ویلي یې دي چې هېڅ هېواد باید له دې امله اندېښمن نه وي.
د طالبانو حکومت ویاند ذبیحالله مجاهد په کابل کې یوې خبري ناستې ته ویلي، د پاکستاني ځواکونو سره د وروستیو سرحدي نښتو پر مهال پاکستان ته درنه مرګژوبله اوښتې ده.
مجاهد ادعا کړې چې ۵۸ پاکستاني سرتېري وژل شوي، لسګونه ټپیان دي، او د طالبانو نهه سرتېرو هم ژوند له لاسه ورکړی.
هغه ویلي چې له ۲۵ زیاتې د پاکستان پوځې پوستې له منځه وړل شوې او ګڼ شمېر وسلې د طالبانو لاس ته ورغلې دي.
د ایران د بهرنیو چارو وزارت د طالبانو حکومت له لوري د پاکستاني ځواکونو پر سرحدي پوستو د غچ اخیستونکو عملیاتو وروسته، دواړو لورو ته د زغم سپارښتنه کړې ده.
د دغه وزارت ویاند، اسماعیل بقایي، ویلي چې تهران د افغانستان او پاکستان ترمنځ د رامنځته شویو نښتو په اړه اندېښمن دی او دواړه هېوادونه باید د یو بل د ځمکنۍ بشپړتیا او ملي حاکمیت درناوی وکړي.
بقایي زیاته کړې چې ایران چمتو دی د اسلاماباد او کابل ترمنځ د تاوتریخوالي د کمولو او د اړیکو د عادي کېدو لپاره د منځګړیتوب او همکارۍ رول ولوبوي.
پاکستان نن د تورخم دروازه د هر ډول تګ راتګ لپاره تړلې ده.
د ننګرهار د طالبانو د اطلاعاتو او کلتور ریاست امر قریشي بدلون ویلي، چې دا پرېکړه د «اسلامي امارت» ځواکونو له لوري پر پاکستاني پوځیانو د غچ اخیستنې عملیاتو په غبرګون کې شوې ده.
دا مهال سلګونه مسافر، لسګونه باروړونکي موټر او ناروغان د تورخم دواړو غاړو ته بند پاتې دي.
د افغان سولې لپاره د امریکا پخواني ځانګړي استازي زلمي خلیلزاد د طالبانو او پاکستاني ځواکونو ترمنځ د وروستیو نښتو لامل د پاکستان د هوايي بریدونو غچ بللی دی.
خلیلزاد پر خپله ایکس پاڼه لیکلي، دغه نښتې د غچ اخیستنې او مخنیوي په هدف ترسره شوې دي.
طالبانو تېره شپه له پاکستاني ځواکونو سره پر فرضي کرښو سخته جګړه وکړه، چې د راپورونو له مخې، پاکستاني پوځیانو ته پکې مرګژوبله اوښتې ده.
د هلمند ولایت د طالبانو د اطلاعاتو او کلتور رییس راشد هلمندي ویلي، افغان ځواکونو د تېرې شپې په درې ساعته عملیاتو کې د بهرامچې ولسوالۍ په شکېج، بي بي جاني او صالحانو سیمو کې د پاکستاني ځواکونو درې سرحدي پوستې نیولې دي.
نوموړي رسنیو ته څرګنده کړې چې په دې عملیاتو کې د پاکستان ۱۵ سرتېري وژل شوي او د هغوی له لیکو څخه پنځه کلاشنکوفونه، یوه دهشکه، د شپې دوربین او د یو وژل شوي سرتېري جسد د افغان ځواکونو لاس ته ورغلی دی.
هلمندي زیاته کړې چې عملیات د سیمهییزو ځواکونو له لوري ترسره شوي او اوس سیمه د طالب ځواکونو تر بشپړ کنټرول لاندې ده.
د قطر د بهرنیو چارو وزارت په یوه تازه اعلامیه کې د افغانستان او پاکستان تر منځ د پولو پر سر د رامنځته شوو نښتو په اړه اندېښنه څرګنده کړې ده.
په اعلامیه کې ویل شوي چې قطر دواړه هېوادونه هڅوي څو د شخړو د هوارولو لپاره د خبرو اترو او ډیپلوماسۍ لاره خپله کړي، نه دا چې د تاوتریخوالي له لارې ستونزې حل کړي.
د وزارت په وینا، اړینه ده چې د اختلافاتو د پراخېدو مخه ونیول شي او د سیمې د سولې، امنیت او ثبات د ټینګښت لپاره ګډې هلې ځلې وشي.
اعلامیه زیاتوي، قطر چمتو دی چې که اړخونه وغواړي، د منځګړیتوب او د باور د فضا د رامنځته کولو لپاره مرسته وکړي.