د طالبانو حکومت د عامې روغتیا وزارت چارواکي وایي چې د کابل اندراګاندي روغتون کې د ماشومانو د زړه د خلاصو جراحیو څانګه او د هیموډیالیز ځانګړې برخه پرانیستل شوې ده.

د یاد وزارت ویاند شرافت زمان څرګنده کړې چې دا لومړی ځل دی چې په هېواد کې دننه ماشومانو ته د زړه خلاص عملیات ترسره کېږي.

د هغه په وینا، تر اوسه درې داسې عملیاتونه شوي چې ټول یې بریالي ثابت شوي دي.

د طالبانو حکومت د عامې روغتیا وزیر ډاکټر نور جلال جلالي د دغو خدمتونو پرانیسته مهمه لاسته راوړنه بللې او زیاته کړې چې له دې وروسته به ګڼو ناروغانو ته د درملنې فرصت په خپله پلازمېنه کې برابرېږي.

‏د لویدیځ تهران د پولیسو قوماندان، کیومرث عزیزي اعلان کړی چې هغه افغانان چې قانوني اسناد ولري، کولی شي په ازاد ډول تګ راتګ وکړي او هغه کسان چې غواړي په ایران کې کار وکړي، باید کاري ویزه تر لاسه کړي.

نوموړي زیاته کړې چې د قانوني اسنادو پرته د مهاجرینو نیول او شړل د پولیسو له مهمو دندو څخه ګڼل کېږي.

د ده په وینا، په لویدیځ تهران کې شاوخوا ۷ سلنه اوسېدونکي افغان مهاجرین دي.

عزیزي څرګنده کړې، هغه کسان چې هېڅ ډول اسناد نه لري او د غیر رسمي لارو له لارې ایران ته ننوتي، “غیرمجاز اتباع” بلل کېږي او وبه نیول شي.

د ایران د کورنیو چارو وزیر، سکندر مومني هم ویلي چې د روان کال له پیل راهیسې شاوخوا یو میلیون او ۲۰۰ زره افغان مهاجرین شړل شوي دي.

نوموړي د ایران په خاوره کې د “شپږ میلیونو افغانانو” د حضور یادونه کړې او ویلي چې د روان کال تر پایه به نږدې دوه میلیونه نور افغان مهاجرین هم له هېواده وایستل شي.

د ملګرو ملتونو د سرمنشي ځانګړې استازې روزا اوتونبایوا د طالبانو حکومت د اطلاعاتو او فرهنګ له وزیر ملا خیرالله خیرخواه سره په لیدنه کې د افغانستان د فرهنګي میراثونو د خوندیتوب ډاډ ورکړی دی.

د یاد وزارت په خبرپاڼه کې ویل شوي چې اوتونبایوا د کابل د کتاب فستیوال ستاینه کړې او هغه یې د عامه پوهاوي، په ځانګړي ډول د ځوانانو لپاره ارزښتناک بللی دی.

هغې ټینګار کړی چې د افغانستان ملي موزیم او ملي ارشیف د هېواد د تاریخ مهمې پانګې دي او نړیوال بنسټونه به، په ځانګړي ډول یونسکو، د دغو ارزښتونو د ساتنې په برخه کې له افغانستان سره همکاري روانه وساتي.

طالبانو چې پخوا یې د بامیان د بودا مجسمې نړېدلې وې، اوس ژمنه کوي چې د هېواد فرهنګي میراثونه به خوندي کوي او د ناقانونه کیندنو مخه به نیسي.

د اسراییلو لومړي وزیر بنیامین نتانیاهو ویلي، د ایران د ۱۳۵۷ کال انقلاب یو «اسلام‌پاله پاڅون» و، چې «د یوه بااستعداده ملت واک یې مذهبي ډلو ته وسپاره».

نتانیاهو د فارس د پاچا ستر کوروش د واکمنۍ دورې ته په اشارې سره ویلي، د هغه په وخت کې د یهودانو او ایرانیانو ترمنځ دوستانه اړیکې موجودې وې، او دغه اړیکې د شاه د واکمنۍ پر مهال هم، که څه هم په محدود ډول، خو مهمې پاتې وې.

نوموړي ټینګار کړی، چې د شاه له سقوط وروسته، د اوسني رژیم مشرانو له پيله دا هدف درلود چې اسلامي انقلاب ټولې نړۍ ته صادر کړي، او له همدې امله یې د هېواد ټول طبیعي او اقتصادي منابع د جګړې پر لور سوق کړل.

نتانیاهو ادعا کړې چې ایران دا مهال له سخت اقتصادي سقوط سره مخ دی، زېربناوې یې ویجاړې شوې، د اوبو سیستم یې خراب شوی او بندونه یې وچ دي.

یوې سویسي ورځپاڼې راپور ورکړی چې سویس د طالبانو تر واک لاندې افغانستان ته د بشري مرستو د دفتر په پرانیستو سره بېرته راستون شوی دی.

دا دفتر، چې د سویسي بهرنیو چارو وزارت د پراختیايي او بشري همکاریو د ادارې برخه ده، یوازې د مرستو رسونې په برخه کې فعالیت کوي.

د دفتر مشري اریک مارکلي کوي، او ویلي یې دي چې د طالبانو تر واک لاندې د افغانستان امنیتي وضعیت مثبت ارزوي.

د یادونې ده، چې دا مهال پنځه سویسي او لس افغان کارکوونکي، چې درې ښځې هم پکې دي، په دفتر کې کار کوي.

دیني عالم شیخ عبدالسمیع غزنوي یو وار بیا د طالبانو حکومت له زندان خلاص شو.

نوموړی، چې پر پاکستان د جهاد فتوا له امله نیول شوی وو، نن له بند ازاد او خپل کورته ورسېد.

د هغه د نیول کېدو په غبرګون کې یو شمېر طالبانو لیکلی وو، چې دا ډول کړنې د نظام د بقا نه؛ بلکې پر نظام د باور کمېدو سبب کېږي.

د عزیزي ګروپ مشر میرویس عزیزي د طالبانو حکومت د رییس الوزرا اقتصادي مرستیال ملا عبدالغني برادر ته د ۱۰ زره میګاواټه برېښنا د تولید پروژې راپور وړاندې کړی دی.

هغه ویلي، تر هوکړې وروسته، تخنیکي ټیمونو په بغلان، بلخ، جوزجان، هرات او بامیان کې د پروژې لومړنۍ ارزونې ترسره کړي دي.

نوموړي ویلي، پروژه په درېیو پړاوونو وېشل شوې، چې په لومړي پړاو کې به ۴ زره میګاواټه برېښنا تولید شي.

بل لورته ملا برادر د پروژې د څار لپاره ځانګړې کمېټه ټاکلې او لارښوونه یې کړې چې راپورونه دې اقتصادي مرستیالۍ ته وسپارل شي.

د امریکا ولسمشر ډونالډ ټرمپ ویلي، چې هېواد یې تر ټولو قوي پوځ او پرمختللي تجهیزات لري؛ خو ځینې وسایل په “احمقانه ډول” افغانستان کې پرېښودل شوي دي.

هغه دا څرګندونې د کابینې په غونډه کې وکړې او ویې ویل، که څه هم دغه تجهیزات ډېر نه وو، خو لا هم دا نه ده معلومه چې ولې پرېښودل شول.

ټرمپ تر دې وړاندې هم ځو ځله ویلي، چې دا تجهیزات باید نه وی پرېښودل شوی.

د یادونې ده چې څه موده وړاندې پاکستان غوښتنه کړې وه، چې امریکا باید دغه وسلې بېرته وپېري.

یوې امریکایي محکمې پرېکړه کړې چې د ۲۰۰۱م کال د سپټمبر ۱۱مې ترهګریزو بریدونو او د ختیځې افریقا کې د امریکا پر سفارتونو د حملو قربانیان، د افغانستان بانک د ۳.۵ میلیارد ډالرو کنګل شوې شتمنۍ اخیستو حق دار نه دي.

محکمې په خپله پرېکړه کې ویلي، افغانستان بانک د بهرنیو شتمنیو د خوندي ساتنې قانون لاندې راځي، او داسې هېڅ شواهد نشته چې دا بانک دې د طالبانو حکومت تر کنټرول لاندې راغلی وي.

خو د محکمې یوه قاضي له دې پرېکړې سره مخالفت څرګند کړی، او ویلي یې دي چې د ترهګرۍ د قربانیانو د جبران قانون له مخې، قربانیان باید د ترهګرۍ اړوند شتمنیو دعوه ولري.

نوموړي ټینګار کړی چې دا چې اوسنی افغانستان په نړیواله کچه په رسمیت نه دی پېژندل شوی؛ نو باید مرکزي بانک یې هم د شتمنیو ساتلو حق و نه لري.

د پاکستان د طبيعي پېښو ادارې خلکو ته خبرداری ورکړی چې په پنجاب او ازاد جمو کشمیر کې د سختو بارانونو له امله د سېلابونو او ځمکې ښویېدو وېره شته.

یادې ادارې ویلي، چې په لاهور، سیالکوټ، ګوجرانواله او ګڼو نورو ولسوالیو کې د بارانونو امکان شته.

د یادو سیمو اوسیدونکو ته سپارښتنه شوې چې له سیندونو، د غرونو له لمنو او ټیټو سیمو څخه خوندي ځایونو ته ولاړ شي.

دا په داسې حال کې ده چې څو ورځې وړاندې خیبر پښتونخوا او د پاکستان ګڼو سیمو کې سیلابونو سلګونه تنو ته مرګ ژوبله واړوله.