د افغان سولې لپاره د امریکا پخواني ځانګړي استازي زلمي خلیلزاد د نومیالي شاعر مطیعالله تراب د مړینې په اړه خواشیني څرګنده کړې ده.
هغه ویلي، ارواښاد تراب د جګړو په کلونو کې د افغانانو د کړاوونو ژور انځور وړاندې کاوه او وروستیو کې یې د نجونو او ښځو د تعلیم لپاره غږ پورته کړی و.
خلیلزاد د هغه مړینه یوه لویه ضایعه بللې او د هغه کورنۍ ته یې د تسلیت غوښتنه کړې.
د مصالحې شورا پخواني مشر ډاکټر عبدالله عبدالله د نومیالي پښتو شاعر مطیعالله تراب د مړینې له امله خواشیني څرګنده کړې.
هغه ویلي، تراب په شاعرانه ژبه د ټولنې دردونه انځورول او تل یې انتقادي او اصلاحي دریځ درلود.
عبدالله دا مړینه د پښتو ادب لپاره یوه لویه ضایعه بللې او د هغه کورنۍ او دوستانو ته یې تسلیت وړاندې کړی.
د روسیې د ولسمشرۍ ماڼۍ ویاند دیمیتري پسکوف ویلي، چې روسیه به د امریکا د ولسمشر ډونالډ ټرمپ تازه څرګندونې چې له اوکراین سره د پوځي مرستو په اړه دي، په هر اړخیز ډول و ارزوي.
نوموړي دا خبرې د سهشنبې په ورځ په یوه خبري غونډه کې وکړې او ویې ویل چې د ټرمپ ځینې څرګندونې مستقیماً له ولسمشر ولادیمیر پوتین سره تړاو لري.
ټرمپ د جولای په ۱۴مه د ناټو له سرمنشي سره په لیدنه کې ویلي، له پوتین او د روسیې له کړنو «ناامیده» دی او اعلان یې کړی چې له اوکراین سره به نورې نظامي مرستې هم وشي.
هغه ګواښ کړی که د ۵۰ ورځو په موده کې کوم توافق رامنځته نه شي، پر روسیې او شریکو هېوادونو به ۱۰۰ سلنه تعرفې ولګوي.
د ملګرو ملتونو د سرمنشي ځانګړې استازې، روزا اوتونبایوا، د افغان کډوالو پراخې اجباري اېستنې په اړه خبرداری ورکړی او له نړیوالې ټولنې یې د عاجلو اقداماتو غوښتنه کړې.
هغې ویلي چې دا وضعیت د نړیوالو د مسؤلیت نه منلو پایله ده.
اوتونبایوا، د اسلامقلعه له پولي لیدنه کړې او ویلي یې دي، چې دا بېرته ستنېدنه له ستړیا، ناهیلیو او رواني زیانونو سره مل ده.
نوموړې ویلي، افغانستان د وچکالۍ او بشري بحران سره مخ دی او په یوازې ځان د دې حالت مقابله نشي کولای.
د هېواد پخواني ولسمشر حامد کرزي ویلي، چې افغانان نږدې څلور نیمې لسیزې وړاندې د پخواني شوروي یرغل او بهرنیو مداخلاتو له امله مهاجرت ته اړ شول، او اوس هم دا ستونزه زیاته شوې ده.
کرزي زیاته کړې چې د مهاجرو پراخ حضور د کوربه هېوادونو لپاره ستونزې جوړوي؛ خو افغانستان کې اوسنی حالت د مهاجرو د بېرته راستنیدو لپاره مناسب نه دی، او جبري ایستل یې نه یواځې چې ستونزې زیاتوي، بلکې د خطرونو او جدي ګواښونو سبب کېدای شي.
نوموړي له کوربه هېوادونو غوښتنه کړې چې د افغان مهاجرو د جبري ایستلو پرېکړه دې له سره و ارزوي.
د امریکا ولسمشر ډونالډ ټرمپ یو ځل بیا ویلي، چې د بایډن ادارې د امریکا نظامي تجهیزات طالبانو ته پرې ایښي دي او اوس د طالبانو لاس کې دي چې دی یې لیدل نشي زغملی.
ټرمپ په سپینه ماڼۍ کې د مذهبي ازادیو او ټولنیزو ابتکاراتو غونډې ته وویل:«کله چې موږ له افغانستانه ووتو، دا د بایډن کار و، هغه وویل هر څه پرېږدئ، حتی جنګي جټ الوتکې هم.»
ټرمپ زیاته کړې چې ده له افغانستانه وتل غوښتل، خو په عزت او قدرت سره.
طالب چارواکو مخکې ویلي وو چې دا تجهیزات یې د غنیمت په توګه ترلاسه کړي او بېرته به یې ور نه کړي.
د طالبانو حکومت د عدليې وزیر عبدالحکیم شرعي د اندونیزیا له شارژدافیر نندا ایوالست سره د لیدنې پر مهال ویلي چې د طالبانو حکومت د ټولو قوانینو بنسټ قرآن کریم او د نبوي سنتو پر اساس ایښودل شوی دی.
هغه زیاته کړې چې تر اوسه یې له فقهې څخه لسګونه قوانین استخراج کړي دي.
د عدليې وزارت وایي چې دواړو لوریو د اړیکو پیاوړتیا، دوه اړخیزې همکارۍ، او په ځانګړي ډول د قانون جوړونې پرمختګونو په اړه خبرې کړې دي.
د طالبانو حکومت د اطلاعاتو او فرهنګ وزارت د ولسي شاعر مطیع الله تراب په مړینه خواشیني څرګنده کړې.
له دغه وزارت څخه په خپره شوې خبرپاڼه کې راغلي، چې تراب د پښتو ژبې یو پیاوړی حماسي شاعر وو.
خبرپاڼه کې د تراب کورنۍ او خواخوږو ته تسلیت وړاندې شوی دی.
د یادونې ده، چې مطیع الله تراب تېره شپه د زړه د حملې له امله ومړ.
پخواني ولسمشر حامد کرزي د مطیع الله تراب په مړینه خواشیني څرګنده کړې.
هغه لیکلي، چې تراب د هیواد او ولس ستونزې او دردونه په شاعرانه احساس بیانول او د وطندوستۍ او یووالي پیغام یې همیش په خپلو اشعارو تر خلکو رسول.
نوموړي د تراب له کورنۍ سره د خواخوږۍ مراتب شریک کړي دي.
د یادونې ده، چې مطیع الله تراب تېره شپه د زړه د حملې له امله وفات شو.
د طالبانو حکومت ویاند ذبیح الله مجاهد د ولسي شاعر مطیع الله تراب پر مړینه خواشیني څرګنده کړې.
نوموړي لیکلي، چې د تراب مړینې متاثره کړی دی.
مجاهد د تراب له کورنۍ سره خواخوږي شریکه کړې.
ټاکل شوې، چې د مطیع الله تراب جنازه نن دوه بجې په شیرزي لوبغالي او تر هغې وروسته په خپل پلرني ټاټوبي کې ترسره شي.