د امریکا ولسمشر ډونالډ ټرمپ د ملګرو ملتونو عمومي اسمبلۍ په څنډه کې د قطر، سعودي عربستان، مصر، اندونیزیا، ترکیې او پاکستان له مشرانو سره لیدلي دي.
نوموړي دا ناسته د خپلو ناستو تر ټولو مهمه ناسته بللې او ویلي یې دي چې له ۳۲ ناستو څخه دا ورته ډېره ارزښتناکه وه.
ډونالډ ټرمپ تر دې وړاندې ویلي و چې دا به د غزې په اړه یوه مهمه ناسته وي.
نړیوال بانک په یوه نوي راپور کې څرګنده کړې، چې په پاکستان کې د بېوزلۍ کچه په وروستیو دریو کلونو کې د پام وړ لوړه شوې ده.
د راپور له مخې، د دغه هېواد د بېوزلۍ شاخص ۷ سلنه پورته شوی او اوس ۲۵.۳ سلنې ته رسېدلی دی.
راپور زیاتوي، چې اقتصادي ستونزې، د قېمتونو لوړوالی او د عایداتو کمښت د بېوزلۍ د زیاتېدو مهم عوامل ګڼل شوي دي.
د نړیوال بانک په وینا، که د اصلاحاتو بهیر چټک نه شي، ښايي د بېوزلۍ کچه نور هم زیاته شي.
په ملګرو ملتونو کې د افغانستان د دایمي استازولۍ سرپرست نصیر احمد فایق وایي، افغانستان له څلورو کلونو راهیسې د مشروع حکومت د نه لرلو له امله د عمومي مجمعې په څېر غونډو کې د وینا حق نه لري او یوازې ګډون کولی شي.
هغه د افغانستان د انزوا لامل د طالبانو سخت دریځې پالیسۍ وبللې او زیاته یې کړه، چې دغه ډله نه ملي او نه هم بشري قوانینو ته ژمنه ده.
فایق وویل، د افغانستان استازولۍ یوازې په جانبي غونډو کې ګډون او وینا کولی شي او د ملګرو ملتونو د حق السهميې د نه ورکړې له امله د رایې ورکولو حق هم ځنډول شوی دی.
هغه زیاته کړه، د طالبانو پر حاکمیت د ډېری هېوادونو لومړنۍ خوشبیني اوس پر شک بدله شوې او د افغانستان ستونزو ته د یوې منسجمې تګلارې جوړېدو غوښتنه کوي.
د طالبانو حکومت بیا نصیر احمد فایق خپل استازی نه ګڼي او له ملګرو ملتونو غواړي چې د افغانستان څوکۍ دوی ته وسپارل شي.
د بلخ لپاره د طالبانو حکومت والي محمد یوسف وفا په یوه اداري غونډه کې ویلي، چې افغان ولس سخت ځپل شوی او داسې کورنۍ هم شته چې د ماښام د خوړو لپاره څه نه لري.
نوموړي ویلي، چې د خلکو د زورولو پر ځای باید د هغوی زړونه وګټل شي او خدمت ورته وشي.
هغه زیاته کړې چې ټول پخواني قوانین لغوه شوي او ادارې دې له مرکزه نوي شرعي قوانین تر لاسه کړي.
دا څرګندونې په داسې حال کې کېږي چې ملګرو ملتونو او نړیوالو سازمانونو څو ځله د افغانانو د لوږې په اړه راپورونه ورکړي دي.
د ملګرو ملتونو سرمنشي انتونیو ګوتریش د ملګرو ملتونو د ۸۰مې عمومي غونډې په وینا کې ویلي، په ډېرو هېوادونو کې ښځې او نجونې له زدهکړو بېبرخې پاتې دي.
هغه ویلي، چې غزه عاجل اوربند ته اړتیا لري او د سوډان او اوکراین جګړې باید پای ته ورسېږي.
نوموړي ټینګار کړی چې ټکنالوژي باید د خلکو د پرمختګ لپاره وکارول شي.
د ګوتریش په خبره، انسانیت د جګړو او ظلمونو له امله له پوښتنې سره مخ دی.
هغه ویلي: «سوله زموږ لومړیتوب دی، ځواک باید د خلکو په لاس کې وي او هېڅکله باید تسلیم نه شو.»
د هرات ځایي سرچینې وايي، د طالبانو حکومت د ټلوېزیونونو، راډیوګانو او یوټیوبرانو مسوولین را بللي او ورته یې ویلي چې د ساکښو او ژوندیو موجوداتو د انځورونو له خپرولو ډډه وکړي.
سرچینې زیاتوي چې ځینو رسنیزو مسوولینو استدلال کړی چې که په کابل کې ملي ټلوېزیون دا ډول خپرونې لري؛ نو په هرات کې خصوصي رسنۍ باید نه محدودېږي.
د هرات رسنۍ ټینګار کوي چې دغه بندیز به یوازې هغه وخت ومني، چې په ټول افغانستان کې په مساوي ډول پلی شي.
د طالبانو حکومت ویاند ذبیحالله مجاهد ویلي، بګرام هوايي اډه د افغانستان برخه ده او هېڅ تړاو له بهرنیو هېوادونو نه لري.
نوموړي «العربیه» ته په مرکه کې ټینګار کړی چې افغانان د بهرنیو ځواکونو شتون نه مني او امریکا باید له افغانستان سره په منطقي او ډیپلوماټیک ډول چلند وکړي.
دغه څرګندونې د امریکا د ولسمشر ډونالډ ټرمپ د وروستیو ادعاوو په غبرګون کې شوي، چې ویلي یې و د بګرام د بېرته اخیستو په اړه خبرې روانې دي.
د طالبانو حکومت دا څرګندونې بېاساسې بللي او رد کړې دي.
د طالبانو حکومت د اطلاعاتو او فرهنګ وزارت مرستیال عتیقالله عزیزي ویلي، خبریالان د جنګیالیو په څېر په لومړۍ کرښه کې جنګېږي او د طبیعي ناورینونو او کډوالو د ستونزو په راپورونو کې یې رول د ستاینې وړ دی.
نوموړي د خبریالانو د ملي غونډې په وینا کې ټینګار کړی، چې ژورنالېستان دې د ټولنې د ارزښتونو او حساسیتونو په پام کې نیولو سره خپل مسلک پر مخ یوسي.
عزیزي زیاته کړې چې د «اسلامي امارت» مشرتابه د خبریالانو ملاتړ کوي او ځانونه د هغوی په خدمت کې بولي.
د طالبانو حکومت تر واک لاندې د ننګرهار ولایت د رسنیو دفتر ویلي، د تورخم لار نن سېشنبه د مسافرو او ټرانزیټ پرمخ بېرته پرانیستل شوې ده.
یاده لار پرون د پاکستان د انټرنېټي ستونزې له امله تړل شوې وه او یوازې د هغو کډوالو او ټرانزیټ پرمخ خلاصه وه، چې له پاکستانه اېستل کېدل.
پاکستاني چارواکو تر اوسه د دې لارې د تړل کېدو او پرانیستل کېدو په اړه رسمي څرګندونې نه دي کړې.
د طالبانو حکومت د امر بالمعروف وزارت خبر ورکړی چې تېره میاشت یې ۳۰ کوډګر نیولي دي.
دغه وزارت وايي، په همدې موده کې یې د ښځو د حقونو ۱۴۱ قضیې او ۱۰۸ شخړې حل کړې، ۱۶۷ اصلاحي غونډې یې جوړې کړې او ۱۵۱۰ رواني ناروغان یې سرې میاشتې ته ورپېژندلي دي.
یاد وزارت د شخړو د نوعیت په اړه جزئیات نهدي ورکړي.