په خوست ولایت کې یو ځوان د بېکارۍ له امله ځان وژنه کړې.
ځايي سرچینې وايي، دا پېښه نن د خباشخېل په سیمه کې شوې.
یاد کس شمسالله نومېده او ویل شوي چې د خرابو اقتصادي شرایطو له امله یې ځانوژنه کړې.
تر دې مخکې هم یو ماشوم په همدې ولایت کې ځان وژلی و.
د یادونې ده چې واک ته د طالبانو حکومت له رسېدو وروسته په افغانستان کې د اقتصادي ستونزو له امله ګڼو خلکو ځان وژنه کړې.
د پاکستان لومړي وزیر شهباز شریف ویلي، اسلامآباد د ایران د سوله ییزې اټومي انرژۍ د ترلاسه کولو د حق ملاتړ کوي.
هغه دا څرګندونې د ایران له ولسمشر مسعود پزشکیان سره په یوه ګډ خبري ناسته کې وکړې.
ولسمشر پزشکیان د شنبې په ورځ په دوه ورځني سفر پاکستان ته تللی، چې هلته یې تود هرکلی وشو.
د آلمان د کورنیو چارو وزیر الکساندر دبرینت ویلي، چې سږ کال د پناه غوښتنې غوښتنلیکونه د تېر کال په پرتله ۵۰ سلنه کم شوي دي.
نوموړي د اګست په ۳مه ویلي، چې په روان میلادي کال کې تر دې دمه شاوخوا ۷۰ زره غوښتنلیکونه ثبت شوي، چې د تېر کال په همدې موده کې ۱۴۰ زره وو.
هغه ټینګار کړی چې آلمان به د پناه غوښتونکو د شمېر کمولو دغه لړۍ روانه وساتي او له انسانقاچاقبرو سره به لا سخت چلند کېږي.
په همدې تړاو، شپږ اروپایي هېوادونو د جولای په پای کې په یوه ناسته کې د پناه غوښتنې پر ضد د سختو تدابیرو په شمول د افغان او سوریایي پناه غوښتونکو بېرته شړلو، هوکړه هم کړې.
آلمان د جولای ۲۷مه، ۸۱ افغان پناه غوښتونکي چې په جرمونو تورن وو، بېرته افغانستان ته شړلي دي.
نامعلومو وسله والو د پښتونخوا په فتح پور سیمه کې د پاکستاني پولیسو پر پوسته برید کړی.
د دغه برید په پایله کې یو پولیسو وژل شوی او درې نور ټپیان دي.
ویل کېږي، چې پر پوسته لسګونو وسله والو برید کړی او داسې ښکاري، چې ټيټيپي پورې تړلي کسان وو.
پولیسو ویلي، چې په نښته کې دوه وسله وال هم وژل شوي دي.
پخواني ولسمشر حامد کرزي پر خپله ایکسپاڼه ليکلي، چې هېواد کې د برق او انرژي په برخه کې د ميرويس عزيزي هڅې ستايي.
د ښاغلي کرزي په خبره، دغه اقدام به هېواد کې ځوانانو ته د کار کولو زمينه برابره کړي.
تر نوموړي وړاندې هم د پخواني حکومت یو شمېر چارواکو د میرویس عزیزي دغه اقدام ته بېلابېل غبرګونونه ښودلي وو.
یو شمېر باوري سرچینې وايي، چې پاکستان ته د طالبانو حکومت د بهرنیو چارو وزیر امیرخان متقي سفر ځنډول شوی.
ټاکل شوې وه، چې دا سفر سبا ترسره شي؛ خو ویل کېږي، چې د تخنیکي ستونزو له امله به له ټاکلې نېټې وروسته ترسره کېږي.
دا سفر د پاکستان د بهرنیو چارو وزیر اسحاق ډار په رسمي بلنه ترسره کېده.
په پام کې وه، چې متقي به هلته له سفر وروسته د پاکستان لومړي وزیر او یو شمېر نورو چارواکو سره هم وګوري.
یوې باوري سرچیني چې نه یې غوښتل نوم یې واخیستل شي حماسه میډیا ته ویلي، چې د طالبانو حکومت د امربالمعروف وزارت کې د سلګونه میلیونه افغانیو د فساد له امله د ماليې وزارت د یاد وزارت بودیجه ځنډولې.
سرچینې ویلي د طالبانو حکومت د مالیې وزارت اوس د امربالمعروف وزارت څخه د تیرو درېو کلونو حساب غوښتنه کړې.
سرچینه وايي، چې د دواړو وزارتونو ترمنځ جنجال د طالبانو حکومت مشر شیخ هبت الله اخوندزاده دفتر رسیدلی او هغه هم په حساب ورکولو ټینګار کړی دی.
بل لورته د امربالمعروف وزارت ویاند سیف خیبر حماسه میډیا ته ویلي:«نه د فساد خبره وجود لري، نه مونږ په دې اړه چاته څه ویلي،
نه د مالیې وزارت سره د یاد وزارت هیڅ خبره په دې اړه شوې او دا ټول د تېر په څیر هغه تبلیغات دي چې منابع یې په خپله مفسد اشخاص دي، پر دي وزارت الحمدلله د هر چا باور ښه پوخ دی.»
د یادونې وړ ده چې د طالبانو حکومت امیر شیخ هبت الله اخوندزاده یاد وزارت ته ګڼ شمیر صلاحیتونه ورکړي چې ښایي همدا صلاحیتونه په دې وزارت کې د فساد لامل شوي وي.
د روسیې په ختیځ کې د کراشینینیکوف اورغورځونکی غر نږدې ۶۰۰ کاله وروسته بېرته فعال شوی دی.
د روسي رسنیو د راپورونو له مخې، دا غر چې په کامچاتکا ټاپووزمه کې موقعیت لري، د تېرې اونۍ له زلزلې وروسته په کې بیا اتشفشانونه راپورته شوي.
د اورغورځونې له امله ګرد او غبار شاوخوا ۶ زره متره پورته ته ختلی، خو چارواکي وايي چې دا غبار اوس له استوګنیزو سیمو لرې روان دی.
په ملګرو ملتونو کې د افغانستان دایمي استازي نصیر احمد فایق له پاکستانه غوښتي چې د افغان کډوالو د ایستلو پرېکړه بیا وڅېړي، په ځانګړې توګه د هغو کسانو په اړه چې زیانمنونکي حالت لري.
فایق په خپله اېکسپاڼه کې لیکلي چې د ملګرو ملتونو له کډوالو سره د مرستې عالي کمېشنري باید د افغان کډوالو اړتیاوو او اندېښنو ته په شفاف او بېړني ډول رسېدنه وکړي.
هغه زیاته کړې چې ډېری افغان کډوال د بېپامۍ، تبعیض او دوهګوني چلند شکایت کوي، چې د جدي پاملرنې وړ مسایل دي.
پاکستان په وروستیو کې د افغان کډوالو د جبري ایستلو بهیر چټک کړی، او راپورونه ښيي چې پولیس د کډوالو پر کورونو چاپې وهي، دروازې ماتوي او خلک په زور نیسي او شړي.
د ايران د بهرنيو چارو وزارت مرستيال او د سياسي او نړيوالو مطالعاتو د مرکز مشر، سعيد خطيبزاده ويلي چې تهران د امريکا له لوري داسې پيغامونه تر لاسه کړي چې د واشنګټن د خبرو اترو د بيا پيل لېوالتيا ښيي.
هغه ټينګار کړی چې ايران د غيرمستقيمو يا هر ډول خبرو لپاره بېړه نه لري، تر څو چې ډاډ ترلاسه نه کړي چې خبرې به نتيجه ورکوي او امريکا به له خپل پخواني چلند تېره شوې وي.
خطيبزاده زياته کړې چې امريکا بايد د هېوادونو حاکميت ته درناوی وکړي او خپلسري بريدونه ودروي.