د افغان سولې په چارو کې د امریکا د پخواني ځانګړي استازي زلمي خلیلزاد له لورې د حزب اسلامي ګوند مشر ګلبدین حکمتیار په اړه د سختو نیوکو وروسته د پکتیا پخواني والي محمد حلیم فدایي ویلي چې غواړي د طالبانو په اړه د نوموړي دریځ ولري.

ښاغلي فدایي لیکلي، امریکا پرون د حکمتیار ملاتړې وه او خلیلزاد نن د طالبانو ملاتړی دی.

حلیم فدایي وایي، طالبان د زرګونه بې ګناه افغانانو قاتلین دي او ۲۴۰۰ امریکایان یې هم وژلي.

فدایي پوښتلي:« ایا دا د منلو وړ وه چې د افغانستان د اسلامي جمهوریت پر ځای طالبانو ته ترجیح ورکړئ؟ ستاسو د اړخ معامله له دوی سره څه وه؟»

حلیم فدایي خلیلزاد په دروغ ویلو تورن کړ چې د خپلې ګټې لپاره یې افغان سیاسي مشران د پخواني ولسمشر پر وړاندې ودرول او جمهوري نظام یې نسکور کړ.

فدایي خلیلزاد ته لیکلي:«تاریخ به هېڅکله هېر نه کړي، او نه به افغان ولس هېروي. یوه ورځ به د طالبانو جنایتونه دومره څرګند شي چې د هغوی پلویان هم انکار ونه کړي. هغه مهال به تاسو هڅه وکړئ تور پر طالبانو واچوئ؛ خو حقیقت به تل پاتې وي. ستاسو پرېکړې د هغوی د بېرته راتګ لار هواره کړه او تاریخ به تاسو د افغانستان دیموکراسۍ قصاب په نوم یاد کړي.»

وروسته له هغه چې د افغان سولې په چارو کې د امریکا پخواني استازي زلمي خلیلزاد، ګلبدین حکمتیار د کابل قصاب او پاکستان او ایران ته نږدې کس یاد کړ، د چارو شننونکي جاوید همدرد زلمی خلیلزاد بې حافظې او د جهادي ډلو اصلي تمویلونکی وباله چې سپینې ماڼۍ ته یې رسمي بلنې ورکولې.

ښاغلي همدرد په دې غبرګون کې لیکلي:« ښاغلی خلیلزاد زه ستا په اړه اندیښمن یم، ایا تاسې په ریښتیا د حافظې له لاسه ورکولو یا د الزایمر یا کومه بله ناروغۍ لرئ؟»

ښاغلی همدرد وایي، دا ښاغلی زلمی خلیلزاد وو چې د جهادي ډلو سپینولو ته یې کار ویلی وو.

د افغان سولې په چارو کې د امریکا ځانګړي استازي زلمی خلیلزاد په ناببره توګه د حزب اسلامي مشر انجینیر ګلبدین حکمتیار، د کابل قصاب، په کابل کې د ښځینه زده کوونکو په مخونو تیزاب اچونکی، په پیښور کې د نورو مقاومتي ډلو د غړو په وژلو تښتولو تورن کړی دی.

ښاغلي خلیلزاد، ښاغلی حکمتیار د شوروي ځواکونو له وتلو وروسته د کورنۍ جګړې مسول بللی.

هغه ویلي د نوموړي د جنګ جګړو له امله سلګونه افغانان وژل شوي دي.

نوموړي، حکمتیار طالبانو سره په معاملې تورن کړی خو ویلې یې دي چې ملابرادر دې معاملې ته حاضر نه شو.

زلمي خلیلزاد، حکمتیار د ISI او د ایران د قدس ځواک نږدې ملګری یاد کړی دی.

حماسه میډیا ته سرچینو ویلي چې د طالبانو حکومت نن مازدیګر په ننګرهار کې د نوري فایبر انټرنېټ قطعه کړ.

د وایفای شرکتونو ته د طالبانو د یو هئیت په تللو سره چې د امر بالمعروف غړي هم پکې وو، ویلي دي چې د شیخ هبت الله لخوا د شوي امر قدردانی دې وکړي او په وینا یې د «امیرالمومنین» په هره پریکړه کې د دنیا او اخیرت راز پروت دی.

امر بالمعروف په خپل پیغام کې دوی ته ویلي چې باید د شیخ هبت‌الله اطاعت وکړي او پر وړاندې یې نیوکه ونکړي.

د یادونې ده چې تر دې وړاندې د هېواد په یو شمېر نورو ولایتونو کې هم د نوري فایبر انټرنېټ قطعه شوی دی.

مسکو کې د طالبانو حکومت سفیر مولوي ګل حسن حسن د روسیې د ولسمشر له ځانګړي استازي ضمیر کابلوف سره لیدنه کړې ده.

د طالبانو حکومت سفارت د خبرپاڼې له مخې، په دې کتنه کې دواړو لوریو د اړیکو د لا پراختیا ترڅنګ د شانګهای د همکارۍ سازمان د وروستۍ غونډې په اړه هم خبرې کړي دي.

د یادې غونډې په ترڅ کې د ډېری غړو هېوادونو له خوا پر افغانستان د ناظر غړیتوب ورکولو پرېکړه وشوه، چې له مخې به یې افغانستان د دې سازمان په راتلونکو غونډو کې په رسمي ډول ګډون وکړي.

په خبرپاڼه کې ویل شوي، سفیر ګل حسن د افغانستان ګډون په SCO غونډو کې د هېواد لپاره حیاتي بللی او ټینګار یې کړی چې دا به د سیمې له هېوادونو سره د اړیکو د پیاوړتیا او د متقابل تفاهم د رامنځته کولو لپاره یو اړین ګام وي.

‏د افغان سولې لپاره د امریکا پخواني ځانګړي استازي زلمي خلیلزاد له اسلام‌اباده غوښتي چې له افغان طالبانو سره د خبرو له لارې د ترهګرۍ ستونزې حل ته لاره هواره کړي.

نوموړي ټینګار کړی چې پوځي عملیات به د تاوتریخوالي د ډېرېدو سبب شي.

دغه غوښتنه څو ورځې وروسته له هغه شوې، چې د پاکستان لومړي وزیر شهباز شریف کابل ته په څرګنده وویل، چې د پاکستان او ټي‌ټي‌پي ترمنځ انتخاب وکړئ.

په ورته وخت کې عمران خان او خلیلزاد دواړو ټینګار کړی چې یوازینۍ د حل لار خبرې دي، نه جګړه.

عمران خان هم ویلي، د خیبر پښتونخوا ناامنۍ ته دې د طالبانو له حکومت سره د سولې له لارې حل ولټول شي، نه پوځي عملیات.

‏د طالبانو حکومت د اقتصادي کمېسیون د پرېکړې له مخې، د کابل د اورانوس ودونو تالار او اړوند پارکېنګ قراردادونه لغوه شوي او دا سیمه به د قیمتي او نیمه قیمتي ډبرو مارکېټ ته ځانګړې شي.

د «خلیج» او «ممتاز محل» تالارونه به تر خپلو قراردادونو د ختمېدو پورې فعال وي.

همداراز، د نظیف مارکېټ، علاوالدین درې لارې تېلو ټانک او د ظاهر شاهي مارکېټ قراردادونه پای ته رسېدلي او د ازادې داوطلبۍ له لارې نوي مستاجرین ټاکل شوي دي.

اورانوس تالار د تېرو شلو کلونو په اوږدو کې د کابل د ټولنیزو، کلتوري او سیاسي غونډو مهم ځای و.

ځایي سرچینې وايي چې د بدخشان په مرکز فیض‌آباد او یو شمېر نورو سیمو کې د نوري فایبر انټرنېټ خدمتونه بند شوي دي.

ورته ستونزه په کندز او تخار ولایتونو کې هم رامنځته شوې او خلک وايي چې وای فای ته لاسرسی نه لري.

د طالبانو حکومت مشر شیخ هبت‌الله اخندزاده د انټرنېټ د بندېدو امر کړی او تراوسه په بلخ، کندهار، کندز، تخار، هرات، لغمان او بدخشان کې نوري فایبر انټرنېټ قطع شوی دی.

د طالبانو حکومت د دې اقدام دلیل د «منکراتو مخنیوی» بللی دی.

د سیاسي چارو شنونکي جاوید همدرد د افغان سولې لپاره د امریکا په پخواني ځانګړي استازي زلمي خلیلزاد نیوکه کړې چې، چې اوس دې افغان ولس او نړۍ ته دا واضح کړه، چې د طالبانو د لومړۍ دورې او اوسنۍ دورو ترمنځ توپیر څه دی.

همدرد وایي، د زرګونو امریکایي سرتیرو په وژل کیدو او میلیاردونو ډالرو لګولو سربیره خلیلزاد د نویمو کلونو طالبان په هماغه مفکورې په ۲۰۲۱ کال کې په افغانستان واکمن کړل.

زلمی خلیلزاد د دوحې تړون له لاسلیک وروسته د طالبانو حکومت کلک ملاتړی دی.

د طالبانو حکومت د مشر په امر، له منکراتو د مخنیوي په موخه له بلخ وروسته په یو شمېر نورو ولایتونو کې هم د نوري فایبر انټرنېټي خدمتونه بند شوي دي.

د ننګرهار د طالبانو د اطلاعاتو امر قریشي بدلون ویلي، ښايي ډېر ژر دا بندیز په ټول هېواد کې پلي شي.

نوموړي زیاته کړې چې د انټرنېټ پر ځای د بدیلو لارو موندلو، د برقي وسایلو او نړیوالو اپلیکېشنونو د تصفیه کولو چارې روانې دي.