د جمهوري حکومت د ملي امنیت رئیس رحمت الله نبیل دایکندي کې د ۱۴ هزارهګانو په وژل کېدو خواشیني څرګنده کړې او ویلي یې دي چې دا د تاوتریخوالي بوږنونکې بڼه ده.
نوموړي د پېښې له قربانیانو سره خواخوږي څرګنده کړې.
د نبیل په خبره، دا د ټول افغانستان د روح زخمي کېدو په معنی ده او اوس مهال اړتیا ده چې لاس په لاس شو او د یو نوي روایت پر اساس هېواد جوړ کړو.
د یادونې ده چې د طالبانو حکومت د کورنیو چارو وزارت هم دغه پېښه تائید کړې.
سیمهییزې سرچینې وایي، چې د طالبانو په لیکو کې تاجک قومندان عبدالقیوم صداقت له یاد حکومت لار بېله کړه.
نوموړي چې فاریاب کې یې دنده کوله، وروسته له هغې دا کار کوي چې د دغه ولایت امنیه قومندان څو ورځې وړاندې خپله دنده پرېښوده.
تر اوسه د دغې استعفا دلیل نه دی معلوم.
د یادونې ده چې په تېرو څو ورځو کې دا څویم تاجک طالب قومندان دی چې له دندې استعفا کوي.
ناڅرګندو وسله والو په یو برید کې د غور او دایکندي ترمنځ قردیوال سیمه کې ۱۱ کسان وژلي.
سیمهییزې سرچینې وایي، یاد کسان د غور اوسېدونکي وو.
دغه برید وروسته تر هغې شوی، چې ځینې اوسېدونکي د کربلا زیارت کوونکو هرکلي ته ورغلي وو.
ویل کېږي، چې د تلفاتو شمېر لوړ دی، خو تر اوسه په دې اړه رسمي څه نشته.
لاهم کوم چا د دغه برید مسؤلیت نه دی منلی.
د طالبانو حکومت د عدلیې وزارت ویلي، تر دې وروسته که هر چا د طالبانو حکومت پر قوانینو نیوکه وکړه؛ نو له شرعي چلند سره به مخ شي.
دوی پرته له دې چې د کوم قانون نوم واخلي ویلي، چې د دوی هره ماده او هر قانون د قران پر اساس جوړ شوی او نیوکه پرې په قران او اسلام نیوکه ده.
د طالبانو حکومت د عدلیې وزارت دا څرګندونې داسې مهال کوي چې د یادې ډلې نوی قانون په کور دننه او بهر له سختو نیوکو سره مخ شو.
د هېواد پخوانی ولسمشر حامد کرزی وایي، چې ټاپي پروژه د افغانستان لپاره یوه مهمه ملي اقتصادي پروژه ده.
ښاغلي کرزي ویلي، چې په هیواد کې دننه ددې پروژې د چارو د پیلېدو استقبال کوي.
نوموړي زیاته کړې چې د داسې مهمو پروژو د پرمخ بېولو او د وطن د ترقي لپاره روزلي او مسلکي کدرونه په هره معنی ضروري دي.
هغه دغه راز ویلي، چې د طالبانو پر حکومت غږ کوي چې د نجونو پرمخ ښوونځي او پوهنتونونه پرانیزي او په هیواد کې د تعلیم او روزنې د ودې زمینه برابره کړي.
د تېر جمهوري نظام د چارو ادارې لوی رئیس فضل محمود فضلي وایي، د طالبانو خلاف د امریکایي چارواکو څرګندونې د دغه هېواد د ولسمشریزو ټاکنو د سیاسي ناندریو برخه جوړوي.
د فضلي په خبره، د دغو خبرو بدرګه کول نه یوازې دا چې اوسني وضعیت کې بدلون نشي راوستلی، بلکې د پخوانیو ناکامو تجربو تکرار ته لاره هواروي.
نوموړي زیاته کړې، په تېر کې هم یوه لویه ستونزه دا وه، چې تر ملي ارادې یې د سیاستوالو شعاري خبرو ته ارزښت ورکوو.
فضلي زیاتوي، اوسنۍ ډله هم پر افغانانو بار ده، چې فشار یې بهرنیان نه؛ بلکې افغانان احساسوي.
د جمهوریت پر مهال د کورنیو چارو وزارت ارشد مشاور محمد ادریس ستانکزي د مقاومت په نوم جبهې یو ټویټ ته د تمسخر په ډول لیکلي، که مقاومت جبهه نه وی، امریکا به تباه وه.
یادې جبهې د سپټمبر یوولسمې پر امریکا شوي برید په اړه خبرداری ورکړی او ویلي یې دي، چې ښایي یو وار بیا پر امریکا دا ډول برید وشي.
ستانکزي دغه ټویټ ته غبرګون کې ویلي، ستاسې له خبرداري مننه او که دا جبهه نه وي، نو امریکا به تباه وه.
د البانیا پلازمېنې تېرانا کې د افغان ښځو پر وړاندې د طالبانو حکومت ځپونکو فرمانونو د غندنې لپاره د افغانو ښځو له لوري یوه لویه درې ورځنۍ ناسته بلل شوې، چې د البانیا د بهرنیو چارو وزېرې اېګلي حسني او نورو اورپایي دیپلوماتانو هم برخه اخیستې ده.
په غونډه کې د پخوانۍ ولسې جرګې استازې فوزیې کوفي ویلي چې د یوې تګلارې له مخې طالبان د بشري حقونو پر وړاندې له سرغړونې څخه حساب ورکولو ته چمتو او په کور دننه د افغانو ښځو اقتصادي وضعیت ښه کړي.
په پام کې ده چې د ناستې په پای کې به نړیوالې ټولنې ته یو غوښتنلیک هم وړاندې شي.
د طالبانو حکومت د ملي دفاع سرپرست وزیر مولوي یعقوب مجاهد ویلي، چې غرب او پلویان یې اوس مهال د دوی پر وړاندې سړه جګړه پرمخ وړي.
نوموړي د طالبانو د ملي دفاع وزارت اړوند ویاندویانو سیمینار ته خبرو کې ویلي، چې لویدیځ بېلابېل پروګرامونه په کار اچولي، ترڅو خپل کلتور په افغانانو ومني.
هغه سپارښتنه کړې چې مسؤلین او ویاندویان باید هوښیار اوسي.
دغه کنفرانس ته د طالبانو حکومت ګڼو نورو چارواکو هم بېلابېلې ویناوې کړې دي.
په داسې حال کې چې د طالبانو حکومت افغانستان کې د نشهیي توکو پر کښت، پېر او پلور بندیز لویه لاسته راوړنه بولي؛ تازه د نړیوال کړکیچ ګروپ په یوه راپور کې ویلي چې د طالبانو د واکمنۍ پر مهال په افغانستان کې تولید شوي مخدره مواد اوس هم د نړۍ بازارونو ته صادریږي.
راپور کې راغلي، د کوکنارو یو شمېر کروندګرو په دې برخه کې د طالبانو له حکومت سره کلکه مبارزه کوي.
د دوی په باور، ان کندهار کې هم کروندګرو نشهیي توکي کرلي دي.
د یادونې ده چې واک ته د طالبانو حکومت له رسېدو وروسته افغانستان کې د نشه یي توکو به کښت بندیزونه زیات شوي دي.