د بریتانیا نوي لومړي وزیر انډي برنهم ویلي چې د ده د نسل سیاستوال باید خپلې کړنې لا ښې کړي او له هغو ستونزو سره مقابله وکړي چې هېواد ورسره مخ دی.
برنهم د دوشنبې په ورځ د بریتانیا د لومړي وزیر د رسمي استوګنځي مخې ته خپلو پلویانو او خبریالانو ته په وینا کې وویل، بریتانیا باید نړۍ ته وښيي چې یو ځل بیا کولای شي خپل ثبات بېرته ترلاسه کړي، او دا د دوی ستره دنده ده.
انډي برنهم د پاچا چارلس له لوري د حکومت د جوړولو له رسمي بلنې وروسته د بریتانیا د ۵۹م لومړي وزیر په توګه دنده پیل کړه.
له دې وړاندې پخواني لومړي وزیر کيیر سټارمر خپله استعفا د بریتانیا پاچا ته وړاندې کړه، چې پاچا ومنله.
برنهم د بکینګهم ماڼۍ کې له پاچا چارلس سره هم وکتل، چې په دغه لیدنه کې ورته په رسمي ډول د نوي حکومت د جوړولو دنده وسپارل شوه.
نوی لومړی وزیر وايي، د بریتانیا لپاره مهمه ده چې سیاسي او اقتصادي ثبات بېرته ټینګ کړي او د هېواد له اوسنیو ننګونو سره په ګډه مبارزه وکړي.
