د بلوچستان ازاد غورځنګ (FBM) سیاسي او رسنیز فعال میر یار بلوچ په خپله ایکسپاڼه کې د یوې اعلامیې په خپرولو سره له ملګرو ملتونو، اروپايي اتحادیې، د اسلامي همکاریو سازمان، افریقایي اتحادیې، آسهآن او نورو نړیوالو او سیمهییزو بنسټونو غوښتي چې بلوچستان ته سفر وکړي، څو د سیمې وضعیت او د پاکستان جنګي جرمونه له نږدې وګوري.
نوموړي په خپله اعلامیه کې بلوچستان د «جمهوریت بلوچستان» په نوم یاد کړی دی.
هغه ويلي چې د بلوچستان راتلونکی باید پر سوله، روڼ حکومتولۍ، د قانون پر حاکمیت، اقتصادي پراختیا او نړیوالې همکارۍ ولاړ وي، او د سیمې طبیعي سرچینې باید د بلوچستان د خلکو د هوساینې او اقتصادي ځانبسیاینې لپاره وکارول شي.
میر یار بلوچ همداراز له ملګرو ملتونو غوښتي چې د بلوچستان د طبیعي سرچینو، مهمو زیربناوو او اقتصادي شتمنیو د ساتنې په برخه کې رول ولوبوي.
نوموړي د «نړیوال بلوچستان اقتصادي دهلېز» د جوړېدو طرحه هم یاده کړې، چې د چین–پاکستان اقتصادي دهلېز (CPEC) بدیل یې بللی دی.
هغه ټینګار کړی چې بلوچستان د خپلو معدني سرچینو، انرژۍ، ساحلي سیمو او سوداګریزو امکاناتو په کارولو سره کولای شي په سیمهییز او نړیوال اقتصادي مرکز بدل شي، او د نړیوالې ټولنې د ګډون غوښتنه یې کړې ده.
په پای کې، په اعلامیه کې له نړیوالې ټولنې غوښتل شوي چې د بلوچستان راتلونکی د یوه خپلواک هېواد په توګه په رسمیت وپېژني او د نوموړي په وینا، په دې سیمه کې د لسیزو بشري بحران، جبري ورکېدو او اقتصادي استحصال مخه ونیول شي.
