اسلام اباد کې د افغانستان پخواني سفیر عاطف مشعل ویلي، د پاکستان لپاره وخت رارسېدلی چې د افغانستان په اړه خپلې دودیزې امنیتي او سیاسي تګلارې له سره وارزوي او له نوي سیمهییزو واقعیتونو سره سم چلند وکړي.
مشعل په یوه لیکنه کې ویلي، د پاکستان پوځي او سیاسي جوړښت له اوږدې مودې راهیسې هڅه کړې چې افغانستان د خپلو امنیتي محاسبو له لیدلوري اداره کړي، خو د ده په وینا، افغانانو د تاریخ په اوږدو کې ثابته کړې چې د خپلواکۍ، ملي عزت او خپلواک تصمیم نیولو پر سر له هېچا سره معامله نه کوي.
هغه استدلال کړی چې نړیوال او سیمهییز شرایط د پخوا په څېر نه دي پاتې او پاکستان هم له اقتصادي، سیاسي او ټولنیزو ننګونو سره مخ دی.
د مشعل په باور، د فشار او نفوذ پر بنسټ پخوانۍ تګلارې نورې اغېزناکې نه دي.
د نوموړي په وینا، افغان ولس نن د سیمې د سیاسي بدلونونو او شخړو په اړه تر بل هر وخت زیات پوهاوی لري او هغه روایتونه چې پخوا د سیاسي موخو لپاره کارېدل، خپل پخوانی اغېز له لاسه ورکړی دی.
عاطف مشعل ټینګار کړی چې د پاکستان لپاره تر ټولو غوره لاره دا ده چې افغانستان د یوه خپلواک او برابر ګاونډي هېواد په توګه ومني او اړیکې د متقابل درناوي، اقتصادي همکاریو او ګډو ګټو پر بنسټ تنظیم کړي.
نوموړي زیاته کړې، که د سیمې نوي واقعیتونه په پام کې ونه نیول شي او پخوانۍ تګلارې دوام ومومي، نو د بدلونونو اغېزې به تر هر څه وړاندې هماغه زاړه سیاسي جوړښتونه له نویو ننګونو سره مخ کړي.
